बाजुरामा रुघाखोकी फैलिँदै, २ जनाको मृत्यु

A+ A A-

बाजुरा जिल्लाको पूर्वोत्तर क्षेत्रमा रहेको हिमाली गाउँपालिका– ६ बोल्डिकमा फैलिएको रुघाखोकी नियन्त्रण हुन सकेको छैन । रुघाखोखी आसपासका अन्य गाउँपालिकामा समेत फैलिन थालेको छ । रुघाखोकीका कारण २ जनाले ज्यान गुमाएका छन् ।

रुघाखोकीका कारण स्वामीकार्तिक खापर गाउँपालिका– १ जोरुका ९० वर्षीया दल रावल र सोही गाउँकी ५५ वर्षीया प्रेमा कडाराको मृत्यु भएको गाउँपालिकाका स्वास्थ्य संयोजक भक्तबहादुर कैलाले बताए ।

एक सातादेखि फैलिएको रुघाखोकीले गाउँ नै प्रभावित भएको छ, जसका कारण हिमालीमा २ सय ५० जना र स्वामीकार्तिक खापार गाउँपालिकामा ४० जना बिरामी परेका स्वास्थ्य कार्यालय बाजुराले जनाएको छ । रुघाखोकी नियन्त्रणमा आउन नसकेपछि स्वास्थ्य कार्यालय बाजुराले १ जना डाक्टरसहित ३ जनाको टोली प्रभावित क्षेत्रमा पठाएको छ ।

एक साताबाट स्थानीय स्वास्थ्य संस्था र स्वास्थ्यकर्मीले नियन्त्रण गर्न नसकेपछि महामारीको रूप लिने हो कि भन्ने चिन्ता व्याप्त छ । सदरमुकाम मार्तडीबाट जाने गाडीहरू पोरखेको हिउँका कारण जान नसक्दा हिमाली गाउँपालिकाले कालीकोटको बाटो भएर ८३ पेटी औषधि प्रभावित क्षेत्रमा पठाएको छ ।

९० परिवार बसोवास रहेको उक्त गाउँमा रुघाखोकी र ज्वरोले स्थानीय बिरामी परेका छन् । गाउँमै रहेको एन्जल इङ्लिस बोर्डिङ स्कुलमा अध्यनरत बालबालिका सबै बिरामी परेपछि ५ दिनका लागि विद्यालय बन्द गरीएको छ भने धुलाचौरमा रहेको भवानी माध्यमिक विद्यालयसमेतमा नियमित पठनपाठन हुन नसकेको शिक्षिका देवु मल्लले बताइन् ।

मल्लले भनिन्, ‘हरेक घरमा बालबालिका बिरामी छन् । पढ्न आउन सकिरहेका छैनन् । भोलिबाट केही पहल नभए एक साताका लागि विद्यालय बन्द गर्ने तयारीमा छौँ तर धुलाचौर स्वास्थ्य चौकीले चाँडै शिविर चलाउने बताएको छ ।’

३ दिनदेखि गाउँमा २ जना स्वास्थ्यकर्मीले उपचार गरिरहेका छन् । बिरामीको संख्या बढेपछि थप २ जना स्वास्थ्यकर्मी प्रभावित क्षेत्रमा पठाएको हिमाली गाउँपालिकाका स्वास्थ्य संयोजक राज भण्डारीले बताए ।

एन्जल इङ्लिस बोर्डिङ स्कुलमा अध्यनरत बालबालिका भाइरल रुघाखोकीले बिरामी भएपछि बिहीबारदेखि विद्यालय बन्द गरेको हो । खोकी लाग्ने, ज्वरो आउनेजस्ता लक्षण देखापरेको स्वास्थ्यकर्मीले बताएका छन् । चिसोका कारण भाइरल रुघाखोकी देखापरेको स्वास्थ्य संयोजक भण्डारीले बताए ।

‘स्वास्थ्यकर्मीसँगै थप औषधिको व्यवस्थापन भइरहेको छ । अन्य ठाउँमा फैलिन नदिन गाउँपालिकाले उच्च सतर्कता अपनाएको छ । परिवारका सबै सदस्य बिरामी परेपछि उपचारमा समस्या भएको हो’, हिमाली गाउँपालिका अध्यक्ष गोविन्दबहादुर मल्लले भने, ‘जिल्ला स्वास्थ्यबाट डाक्टर र ल्याबसहितको टोली माग गरेका छौँ, त्यो टोली आएलगत्तै शिविर सञ्चालन गरिन्छ ।’

स्वास्थ्य कार्यालय बाजुराका सूचना अधिकारी रामचन्द्र यादवले भने, ‘हामीसँग डाक्टर नभएकाले जिल्ला अस्पतालसँग माग गरेका छौँ । डाक्टरको व्यवस्था हुनेवित्तिकै टोली हिँड्छ । पहिलो दिन गाउँपालिकाका स्वास्थ्यकर्मीले नै धान्छन् भनेको हुँदा केही ढिलो भएको हो ।’

बिरामी परेको खबर आएपछि प्रभावित क्षेत्रमा उपचारका लागि स्थानीय तहसँग समन्वय भइरहेको उनले बताए ।

हिमाली गाउँपालिकाका प्रशासकीय अधिकृत जनकबहादुर शाहीले भने, ‘हाम्रो गाउँपालिकामा भएका स्वास्थ्यकर्मीहरूलाई खटाएका छौँ । काठमाडौंबाट औषधिसमेत आउँदै छ । हामीले सक्नेजति प्रयास गरेका छौँ ।’

चिसोका कारण जिल्लाका अन्य ठाउँमा भाइरलका बिरामी बढिरहेका छन् । अन्य स्थानीय ठाउँमा पनि फाट्टफुट्ट भाइरल रुघाखोकीका बिरामी भेटिएको स्वास्थ्यकर्मीले बताएका छन् ।

प्रमुख जिल्ला अधिकारी गङ्गाप्रसाद न्यौपानेले प्रभावित क्षेत्रमा स्वास्थ्यकर्मीले उपचार गरिरहेको र जिल्लाबाट थप टोली सम्बन्धित क्षेत्रमा हिजो मात्र पठाएको जानकारी दिए ।

प्रकाशित मिति: बुधबार, माघ २२, २०७६ १८:४३