पर्यटन प्रवर्द्धन र भ्रमण वर्षका लागि जनशक्ति र स्रोत अभाव : मन्त्री भट्टराई

पर्यटन प्रवर्द्धन र भ्रमण वर्षका लागि जनशक्ति र स्रोत अभाव : मन्त्री भट्टराई

A+ A A-

संस्कृति, पर्यटन तथा नागरिक उड्डयनमन्त्री योगेश भट्टराईले पर्यटन प्रवर्द्धनका लागि पर्याप्त स्रोत र जनशक्ति नभएको बताएका छन् ।

प्रतिनिधिसभाको अन्तर्राष्ट्रिय सम्बन्ध समितिमा भएको नेपाल भ्रमण वर्ष, २०२० को कार्यान्वयनको अवस्था विषयक छलफलमा मन्त्री भट्टराईले स्रोत, साधन र जनशक्ति अभाव रहेको बताएक हुन् । भ्रमण वर्ष र पर्यटन प्रवर्द्धनका लागि जनशक्ति र स्रोत, साधन मात्रै नभएर बजेट पनि न्यून रहेको उनको भनाइ थियो ।

‘भ्रमण वर्ष र पर्यटन प्रवर्द्धनका लागि स्रोतहरूको अभाव छ । हामी २०–२५ करोडको कुरा गरिरहेका छाैँ । यो अन्त्यन्तै न्यून बजेट हो’, उनले भने ।

मन्त्री भट्टराईले नेपालको पर्यटन प्रवर्द्धन र भ्रमण वर्षलाई प्रभावकारी बनाउन जनशक्ति थप्दै स्रोत साधन बढाउने कुरामा जोड दिने प्रतिवद्धतासमेत जनाए ।

मन्त्री भट्टराईले नारायणहिटीमा कुनै होटल नबन्ने पनि स्पष्ट पारे । सङ्ग्रहालयको मापदण्डमा नारायणहिटी रहने उल्लेख गर्दै भट्टराईले भने, ‘नारायणहिटी दरबारमा कुनै पनि होटल बन्दैन । यो सङ्ग्रहालयकै रूपमा रहनेछ । सङ्ग्रहालयको मापदण्डभित्र रहनेछ । होटल बनाउने योजना पनि छैन । बन्दा पनि बन्दैन ।’

बरु कफी सपसम्म बन्न सक्ने अरू कुनै व्यापारिक प्रयोजनका लागि संरचना नबन्ने उनले बताए ।

उनले कारोना भाइरसका कारण चीनबाट लक्ष्यअनुसार पर्यटक भित्र्याउन सम्भव नहुने भएकाले अन्य वैकल्पिक बजारको खोजी भएको पनि बताए । चीनबाट यस वर्ष ५ लाख पर्यटक भित्र्याउने लक्ष्यका साथ काम भए पनि कोरोना भाइरसले पूर्ति हुने सम्भावना नरहेको र निजी क्षेत्रहरूसँग छलफल गरी वैकल्पिक बजार खोज्न योजना बनिरहेको उनले जानकारी दिए ।

बैठकमा मन्त्री भट्टराईले त्रिभुवन अन्तर्राष्ट्रिय विमानस्थलमा पहिलेभन्दा धेरै सुधार आएको दाबी पनि गरे । तराई क्षेत्रमा रहेका राजविराज विमानस्थलबाहेक अन्य विमानस्थलहरूमा रात्रिकालीन उडान सुरु भएको उनको भनाइ छ ।