राष्ट्र बैंक भन्छः मंसिरमा खाद्य पदार्थको मूल्य बढेन

A+ A A-

काठमाडौं । मंसिर महिनामा खाद्य तथा पेय पदार्थको मूल्य थोरै बढेको छ । गत बर्षको मंसिर महिनाको तुलनामा यो बर्षको मंसिरमा खाद्य तथा पेश पदार्थको मूल्य ०.५ प्रतिशत मात्रै बढेको हो ।

नेपाल राष्ट्र बैंकले प्रकाशित गरेको तथ्यांकले यस्तो देखाएको हो । मंसिर महिनामा खाद्य तथा पेश पदार्थको मूल्य सामान्य मात्रै बढेको भएपनि गैरखाद्य तथा पेश पदार्थको समुहको मूल्य भने ६.३ प्रतिशतले बढेको छ ।

मंसिर महिनाको मूल्य बृद्धि ३.७ प्रतिशत रहेको छ । अघिल्लो वर्षको सोही अवधिमा यस्तो मूल्यबृछि ४.२ प्रतिशत रहेको थियो । खाद्य तथा पेय पदार्थ समूहको मुद्रास्फीति सीमान्त रुपले मात्र बढेको कारण समग्र उपभोक्ता मुद्रास्फीति अघिल्लो वर्षको तुलनामा न्यून रहेको राष्ट्र बैंकको भनाइ छ ।

२०७४ मंसिरको तुलनामा तरकारी, दाल तथा दलहन र चिनी तथा चिनीजन्य पदार्थ उप–समूहका वस्तुहरूको मूल्य घटेका कारण समग्र खाद्य तथा पेय पदार्थ समूहको मुद्रास्फीति न्यून रहेको हो ।

गैर–खाद्य तथा सेवा मुद्रास्फीति समीक्षा अवधिमा गैर–खाद्य तथा सेवा समूहको मूल्यबृद्धि ६.३ प्रतिशत रहेको छ । अघिल्लो वर्षको सोही अवधिमा उक्त मूल्यबृद्धि ५.३ प्रतिशत रहेको थियो । यस समूह अन्तर्गत घरायसी सेवा तथा उपयोगिता, यातायात, लुगा तथा जुत्ता र फर्निसिङ तथा घरायसी उपकरणलगायतका उप–समूहका वस्तु तथा सेवाहरूको मूल्य वृद्धि भएकोले समग्र गैर–खाद्य तथा सेवा समूहको मूल्य बढेको हो ।

हिमालमा सबैभन्दा बढी महंगी
राष्ट्र बैंकका अनुसार हिमालमा ४.१ प्रतिशत, पहाडमा ३.८ प्रतिशत, काठमाडौं उपत्यकामा ३.७ प्रतिशत र तराईमा ३.७ प्रतिशत रहेको छ । अघिल्लो वर्षको सोही अवधिमा यस्तो मूल्यबृद्धि क्रमशः ५.५ प्रतिशत, ४.८ प्रतिशत, ३.४ प्रतिशत र ४.३ प्रतिशत रहेको थियो ।

प्रकाशित मिति: सोमबार, माघ ७, २०७५ १७:२२