हेलो सीएम एप प्ले स्टोरबाटै गायब

हेल्लो सिएम मोबाइल एप्लिकेशन सार्वजनिक गर्दै प्रदेश २ का मुख्यमन्त्री लालबाबु राउत लगायत ।

A+ A A-

अपराध न्यूनीकरणका लागि प्रदेश २ सरकारले ल्याएको मोबाइल एप्लिकेशन ‘हेलो सिएम’ गुगलको प्ले स्टोरबाटै गायव भएको छ । संघीय प्रहरीको स्थानीय इकाइसँग समन्वयगरी ल्याइएको हेलो सीएम गायब भएपनि प्रदेश सरकारले यसमा चासो नदेखाउनु रहस्यमय बनेको छ ।

मोबाइल प्रयोगकर्ताले गुगल प्लेस्टोरमा गएर खोज्दा प्रदेश ४ ले तयार पारेको हेलो सीएम एप्लिकेशनमात्र भेटिन्छ ।

सार्वजनिक भएको केहीदिन नबित्दै प्ले स्टोरमा नभेटिएपछि मुख्यमन्त्रीको ‘वेटी पढाउ वेटी बचाउ अभियान’समेत नारामा मात्र सिमित भएको छ । जबकि प्रदेश सरकारले यो एप सार्वजनिक गर्दा महिला हिंसामा न्यूनीकरण गर्न मद्दत गर्ने दाबी गरेको थियो । तर सरकारको यो दाबी घोषणामै सीमित रहेको देखिएको छ ।

प्रदेश २ प्रहरी कार्यालयद्वारा गत ११ कात्तिकमा आयोजित समुदाय–प्रहरी साझेदारी सम्बन्धी एक कार्यक्रममा एप्लिकेशन सार्वजनिक गर्दै मुख्यमन्त्री लालबाबु राउतले महिला हिंसा न्यूनीकरणमा एपले महत्वपूर्ण भूमिका निर्वाह गर्ने बताएका थिए । सार्वजनिक भएको चार महिना यता एन्ड्रोइड मोबाइलमा एप्लिकेशन डाउनलोड भएको छैन । मोबाइलको प्लेस्टोरमा देखिने हेलो सिएम प्रदेश दुई सँग सम्बन्धित नै छैन ।

एप्लिकेशन सार्वजनिक भएयता प्रदेश दुई प्रहरीको नेतृत्व परिवर्तन भएको छैन । एप्लिकेशन सार्वजनिक गर्ने कार्यक्रमको अध्यक्षता गरेका प्रदेश प्रहरी प्रमुख हरिबहादुर पाल अझै उही हैसियतमा कार्यरत छन् । तर, एप्लिकेशन सञ्चालनमा नरहेको बारेमा आफूलाई खासै जानकारी नभएको बताए ।

हिंसामा परेको बेला महिलाले एप्लिकेशन डाउनलोड भएको मोबाइल तीनपटक हल्लाए त्यो जानकारी नजिकको प्रहरी कार्यालयमा आकस्मिक कलको रूपमा पुग्ने र पीडितको लोकेसनपनि प्रहरीले थाहा पाउने एप्लिकेशन निर्माता इन्जिनियर आदित्य राजले दावी गरेका थिए ।

तर एप्लिकेशन सार्वजनिक भएपछि यसको कार्य सञ्चालन प्रणालीका लागि वैधानिक प्रक्रिया तथा पूर्वाधार निर्माण गरिएकोबारे कुनै जानकारी दिइएन । सामान्यतया संवेदनशीलता र गोपनीयता कायम गर्नुपर्ने हुँदा प्रहरी क्रियाशील हुने कुनै पनि प्रणाली प्रहरी नियन्त्रित र परिचालित हुने गर्दछ ।

अरूको साझेदारीमा तयार गरिने सुरक्षा व्यवस्था समेतलाई आफ्नो स्वामित्वमा लिएर प्रहरीले आफैं सञ्चालन गर्ने गरेको छ ।
शहरका विभिन्न संवेदनशील ठाउँमा राखिएको सिसिटिभी क्यामराले कैद गर्ने दृश्य अनुगमनका लागि प्रहरीसँग आवश्यक संयन्त्र र व्यवस्था छन् ।

तर, हेलो सिएम एप्लिकेशनका लागि भने त्यस्तो व्यवस्था छैन । जिल्ला प्रहरी कार्यालय धनुषाका प्रहरी नायब उपरीक्षक दिपेन्द्र शाहीले महिला हिंसासम्बन्धी जानकारी फोनमार्फत प्रहरीलाई आउने गरेको भए पनि हेलो सिएमबारे मुख्यमन्त्रीलाई नै सोध्न सुझाए ।

सार्वजनिक भएको बेला एप्लिकेशनबारे ग्रामीण तहमा समेत सचेतना गराउने भनिएको थियो । इन्जिनियर आदित्यले एप्लिकेशन निर्माणका लागि आफूले व्यक्तिगत तवरबाट ६ लाख रुपैयाँ खर्च गरेको बताए । उनले कन्ट्रोल रूम निर्माण र प्रहरी जनशक्ति व्यवस्थापन तथा तालिमका लागि प्रदेश सरकारले चासो नलिएकाले एप प्लेस्टोरमा नराखिएको जनाए ।

प्रकाशित मिति: मंगलबार, फागुन २८, २०७५ २१:२७