एक सातादेखि ठप्प पीएन क्याम्पसको पठनपाठन सुचारू

A+ A A-

गण्डकी प्रदेशकै ठूलो पृथ्वीनारायण (पीएन) क्याम्पसको पठनपाठन सुचारू भएको छ । क्याम्पसमा कार्यरत आंशिक शिक्षकहरू करार नियुक्तिको माग गर्दै एक सातादेखि कक्षा बहिष्कार गर्दै आएका थिए ।

आशिंक शिक्षकहरूको कक्षा बहिष्कारका कारण एक साता क्याम्पसको पठनपाठन पूर्ण रूपमा वन्द थियो । आशिंक प्राध्यापकहरूले आन्दोलनमा उठाएका मागप्रति त्रिभुवन विश्वविद्यालयका प्रतिनिधि, पृथ्वीनारायण क्याम्पस प्रशासन र आशिंक प्राध्यापक संघका प्रतिनिधिबीच भएको त्रिपक्षीय वार्तामार्फत समस्या समाधान गर्न सहमति भएपछि शिक्षकहरूले तत्कालका लागि आन्दोलन स्थगित गरिएको आशिंक प्राध्यापक संघका अध्यक्ष सुनील गौतमले जानकारी दिए ।

उनले भने, ‘आन्दोलन एक अभियान हो । हाम्रो चाहना विद्यार्थीले पढ्ने अधिकारलाई रोक्ने कदापि होइन, त्यसैले नजिकिँदै गरेको स्ववियू निर्वाचनलाई दृष्टिगत गरी समस्याको समाधान गर्नेतर्फ अग्रसर भएर सहमतिको प्रयास गरेका छौँ । आन्तिरिक रूपमा चलेका परीक्षा र हिउँदे बिदापछाडि सुरू हुने पढाइलाई ध्यानमा राखेर आन्दोलन तत्कालका लागि स्थगन गरेका हौँ ।’

क्याम्पस प्रमुख प्राध्यापक चन्द्रबहादुर थापाले जसरी पनि आशिंकको मागलाई सम्बोधन गरिने प्रतिवद्धता जनाए । ‘यो समस्या आशिकको मात्रै होइन, मेरो र समग्र त्रिभुवन विश्वविद्यालयको भएकाले जति सक्दो छिटो समस्या समाधान गर्नेतर्फ हामी लागिपर्छौं ।’

विगत १४ वर्षदेखि दैनिक ज्यालादारीका रूपमा अध्यापन गराइरहेका २ सय १८ जना आंशिक प्राध्यापकहरूले सामूहिक राजीनामा दिने भन्दै आन्दोलनमा उत्रिएका थिए । पाठ्यक्रमले प्रस्ट रूपमा १ सय ५० पिरियड अध्यापन हुने निर्धारण गरेको भए पनि मुश्किलले एक शैक्षिक सत्रमा १ सय दिनको पारिश्रमिकमा आंशिक प्राध्यापकहरूलाई पूरा शैक्षिकसत्र प्राध्यापन गर्न बाध्य पारिएको संघका सचिव खिमानन्द पौडेलले बताए ।