स्काई ट्रकमार्फत सुत्केरी महिलाको उद्धार

A+ A A-

डोटीकी एक सुत्केरी महिलाको हेलिकोप्टरमार्फत् उद्धार गरिएको छ । सामाजिक विकासमन्त्री कृष्णराज सुवेदीको पहलमा सिलगढी नगरपालिकाकी २५ वर्षीया अरुणा भण्डारीको नेपाली सेनाको हेलिकोप्टर (स्काई ट्रक) मार्फत् उद्धार गरिएको हो ।

शनिबार राति सिलगढी अस्पतालमा अप्रेसनमार्फत् बच्चा जन्माएकी उनको स्वास्थ्यमा समस्या आएपछि आइतबार सेती प्रादेशिक अस्पताल धनगढी रेफर गरिएको थियो ।

धनगढीमा पनि उनको उपचार सम्भव नभएपछि आज मंगलबार सामाजिक विकासमन्त्री सुवेदीको पहलमा महिला बालबालिका तथा ज्येष्ठ नागरिक मन्त्रालयले हेलिकोप्टरमार्फत् उद्धार गरी काठमाडौं लगिएको हो । अप्रेसन गरी निकालिएको बच्चाको अवस्था भने सामान्य रहेका जनाइएको छ ।

सुत्केरी अरुणाको प्रेसर र अन्य उपचार सुदूरपश्चिममा सम्भव नभएपछि उनको उद्धार गरिएको सामाजिक विकासमन्त्री सुवेदीले बताए । ३ दिनदेखि सेती प्रादेशिक अस्पतालको आईसीयूमा रहेकी उनको उद्धारको पहल सोमबारबाटै थाले पनि आज मंगलबार मात्रै प्रयास सफल भएको उनले बताए ।

प्रदेशका सबै स्वास्थ्य संस्थामा दक्ष चिकित्सकको अभाव र विकटताका कारण यस्तो समस्या देखिने गरे पनि यसको समाधानका लागि प्रत्येक जिल्ला अस्पतालमा सुरक्षित सुत्केरी सेवाका लागि पहल भइरहेको उनले बताए ।

हालसम्म मन्त्रालयको पहलमा प्रदेशका पहाडी जिल्लाबाट ७ जना सुत्केरी महिलाको उद्धार भइसकेको उनले बताए । हेलिकोप्टरमार्फत् उद्धार गरिएकी भण्डारी आफैँ स्वास्थ्यकर्मी हुन् । उनका श्रीमान् पनि जिल्ला अस्पताल डोटीमा कार्यरत छन् ।

प्रकाशित मिति: मंगलबार, माघ २१, २०७६ १६:२२