पोखरामा ‘प्याराग्लाइडिङ विश्वकप प्रतियोगिता हुने

A+ A A-

पोखरामा प्याराग्लाइडिङ विश्वकप प्रतियोगिता हुने भएको छ । आगामी फागुन ११ देखि १७ गतेसम्म प्याराग्लाइडिङ विश्व कप–एसियन टुर २०२० हुने भएको हो ।

नेपाल प्याराग्लाइडिङ ह्याङग्लाइडिङ संघ र प्याराग्लाइडिङ पाइलट्स क्लबको संयुक्त आयोजनामा पहिलो पटक प्याराग्लाइडिङ विश्वकप आयोजना गरिएको हो ।

पर्यटकीय नगरी पोखरामा खेल पर्यटन प्रवर्द्धन गर्ने उद्देश्यले प्याराग्लाइडिङ विश्वकपको आयोजना गरिएको नेपाल हवाई खेलकुद संस्था (ना) का निर्वतमान अध्यक्ष योगेश भट्टराईले बताए ।

विश्वकपमा सहभागी हुने पाइलटहरूले एफएआई (फेडेरेसन एरोनोटिक इन्टरनेशनल) बाट अनुमतिपत्र प्राप्त प्यारा पाइलटले मात्रै सहभागिता जनाउने पाउने प्रतियोगिताका संयोजक समेत रहेका भट्टराईले जानकारी दिए ।

‘एफएआईको लाइसेन्स प्राप्त पाइलटहरूले मात्र विश्वकपमा सहभागिता जनाउन पाउनेछन्,’ उनले भने, ‘प्रतियोगितामा भाग लिन आधिकारिक संस्थाको सदस्य हुनुपर्छ ।’

प्रतियोगितामा पहिलोपटक नेपाली सेनाकाे तर्फबाट पाइलट सागर जलारीले प्रतिस्पर्धा गर्नेछन् । आठौँ राष्ट्रिय खेलकुद प्रतियोगितापछि नेपाली सेनाले प्याराग्लाइडिङ तर्फ चासो दिँदै आएको छ ।

प्याराग्लाइडिङ विश्वकपमा ३० राष्ट्रका १ सय २५ पाइलटको सहभागिता रहनेछ । नेपालसहित अमेरिका, बेलायत, स्वीट्जरल्याण्ड, फ्रान्स, जर्मनी, अष्ट्रेलिया, रूस, बेल्जियम, युक्रेन, चीन, जापान, भारत, कोरिया, इरान, भियतनाम र चाइनालगायतका देशबाट प्रतियोगितामा सहभागिता रहने भट्टराईले बताए ।

संयोजक भट्टराईका अनुसार चीनबाट ११ जना पाइलटले प्रतियोगितामा सहभागिता जनाउन नाम दर्ता गराई सकेका छन् ।

चीनमा पछिल्लो समयमा कोरोना भाइरसको संक्रमण फैलिए पनि चीनबाट प्रतियोगितमा भाग लिने पाइलटहरू सहभागिता जनाउने भट्टराईले प्रष्ट्याए । ‘प्रतियोगितामा चिनियाँ पाइलटहरूले सहभागिता जनाउनेछन्,’ उनले भने, ‘अन्तिमसम्म प्रतीक्षामा छौँ । अहिलेसम्म निश्चित अवस्था छ ।’

प्रतियोगितामा एक्युरेसी र क्रसकन्ट्री विधामा समेत प्रतिस्पर्धा हुनेछ । क्रसकन्ट्रीका लागि ७ टास्क पूरा गर्नुपर्छ ।

एक सातासम्म सञ्चालन हुने प्रतियोगिताअन्तर्गतको क्रसकन्ट्रीमा मौसमी समस्या आएको अवस्थामा एकै दिन पाइलटले पूरा गरेको टास्कअनुसार क्रसकन्ट्रीको विजेता छानिने प्रतियोगिताका व्यवस्थापक विमल अधिकारीले जानकारी दिए ।

२०१८ मा इण्डोनेसियमा आयोजित एशियन गेम्समा नेपालले क्रसकन्ट्रीमा रजत पदक जितेको थियो ।
त्यस प्रतियोगितामा अधिकारी कप्तानको भूमिकामा सहभागी भएका थिए ।

विश्वकप आयोजना गर्नका लागि ८० लाख रूपैयाँ खर्च लाग्ने अनुमान गरिएको छ । नेपाल पर्यटन बोर्ड र गण्डकी प्रदेश सरकारको सहकार्यमा प्रतियोगिता हुनेछ ।

प्रतियोगितामा भाग लिने पाइलटको उद्दार एवं सुरक्षा व्यवस्थापनको जिम्मेवारी नेपाली सेनाले लिएको छ ।

प्रत्येक दिनको टास्क पूरा गर्ने खेलाडीलाई उत्कृष्टताको आधारमा पदक प्रदान गरिने संयोजक भट्टराईले बताए । प्रतिस्पर्धामा ओभरअल च्याम्पियनसिपसँगै दशौँस्थानसम्म आउने खेलाडीलाई ट्रफी, पदक र प्रमाणपत्र प्रदान गरिनेछ ।

प्रकाशित मिति: सोमबार, माघ २०, २०७६ ११:२९