सुदूरपश्चिमका आधुनिक सडक आयोजना अन्योलमा

A+ A A-

क्षेत्रीय शहरी विकास आयोजनाले ठेक्का प्रक्रिया टुंग्याउन नसक्दा सुदूरपश्चिम प्रदेशका आधुनिक सडक निर्माण आयोजनाहरू अन्योलमा परेका छन् ।

गत असारमै संघीय आयोजना कार्यान्वयन इकाईले सडक विस्तार कार्यक्रमको प्राविधिक टेन्डरको मूल्यांकन गरी स्वीकृतिका लागि सार्वजनिक खरिद अनुगमन कार्यालयमा पठाइसकेको छ ।

तर ६ महिनासम्म प्राविधिक मूल्यांकन स्वीकृत भएर आउन नसक्दा ठेक्का प्रक्रियाको आर्थिक मूल्यांकनलगायत सडक निर्माणमा समेत ढिलाइ भएको छ ।

सार्वजनिक खरिद अनुगमन कार्यालयले रमण–पप्पु जेभीलाई कालोसूचीमा राखेपछि सडक योजनाहरू थप अन्योलमा परेका छन् ।

क्षेत्रीय शहरी विकास कार्यक्रमअन्तर्गत विस्तार गरिने सडकहरूमा निर्माण कार्य सुरु हुन नसक्दा धनगढी चौराहादेखि कैलाली पुलसम्मको सडक, क्याम्पस रोड सडक, डिभोटी चोक पिपल चौतारा सडक र मालपोत रोडमा जताततै खाल्डाखुल्डी परेका छन् ।

सडक निर्माणमा ढिलाइ हुँदा निकै समस्या खेप्नुपर्ने बाध्यता रहेको धनगढी ५ तारानगरका बलदेवप्रसाद भट्टले गुनासो गरे । सडक निर्माण कार्य यथाशीघ्र अगाडि बढाउनुपर्ने स्थानीयहरूको माग छ ।

कार्यक्रमको समयावधि सकिन लागेकाले कुनै पनि बहानामा ढिलाइ गर्न नहुने स्थानीय भवानी सिंह भण्डारीले बताए । ठेक्कामा बाधा गरिरहेको विषयलाई छिट्टै टुंग्याएर सडक निर्माणको काम अगाडि बढाउनुपर्ने उनको भनाइ छ ।

सार्वजनिक खरिद अनुगमन कार्यालयले रमण–पप्पु जेभीलाई कालो सूचीमा राखेपछि चारवटा स्थानीय तहमा लागू भएको सो कार्यक्रमअन्तर्गतका सडक योजनाहरू अन्योलमा परेका छन् ।

क्षेत्रीय शहरी विकास कार्यक्रमका उपनिर्देशक श्याम बुढाथोकीले रमण पप्पु जेभीलाई कालो सूचीमा राखिए पनि हालसम्म विभागबाट कुनै सुझाव नआएको बताए ।

कालो सूचीमा राख्नुभन्दा पहिले नै ठेक्का प्रक्रियामा भाग लिएकाले रमण पप्पु जेभीलाई थप काम दिन सकिने वा नसकिने भन्ने विषय परामर्शकै क्रममा रहेकाले आयोजना कार्यान्वयनमा ढिलाइ भएको उनको भनाइ छ ।

छ महिनासम्म प्राविधिक मूल्यांकन स्वीकृत भएर आउन नसक्दा ठेक्का प्रक्रियाको आर्थिक मूल्यांकनलगायत सडक निर्माणमा समेत ढिलाइ भएको छ ।

कार्यक्रममा परेका सडकहरूमा स्थानीय र प्रदेश सरकारले मर्मतमा समेत लगानी नगरेपछि अधिकांश सडकहरूको अवस्था बिग्रिएको छ । धनगढी उप–महानगरपालिकाका मेयर नृप वड परियोजना कार्यान्वयनका लागि पहल भइरहेको बताए ।

आयोजनाअन्तर्गत धनगढीमा १०.५, गोदावरीमा १५, भीमदत्तनगरमा १५ र शुक्लाफाँटा नगरपालिकामा ४ किलोमिटर अत्याधुनिक सडक बन्न लागेको हो ।

सो सडकहरूका लागि धनगढीमा १ अर्ब १० करोड, गोदावरीमा ९० करोड, भीमदत्तमा १ अर्ब ३३ करोड र शुक्लाफाँटामा ३३ करोड गरी ३ अर्ब ६६ करोड रुपैयाँ विनियोजन भएको छ । तर, पहिलो चरणको निर्माण काम सुरु नहुँदै कार्यक्रमको आधा समयावधि सकिएको छ ।

प्रकाशित मिति: आइतबार, माघ १९, २०७६ १४:४७