युवा तरकारी खेतीमा रमाउँदै युवा : बारीमै बिक्री

A+ A A-

रुकुमपूर्वका युवा पछिल्लो समय तरकारी खेतीमा आकर्षित हुँदै गएका छन् । जिल्लाको सिस्ने गाउँपालिका–५ का टाकुरा, ह्याप्ला, दुधिल्लागैरा- ६ का पाखागाउँ, दाङ्चा, ढकालबारा, लुस्पालगायतका विभिन्न ठाउँमा तरकारी खेती गरेर युवाले मनग्य आम्दानी लिइराखे छन् ।

सिस्ने गाउँपालिका–५ का प्रकाश बिसी र विमल बिसीले बेमौसमी तरकारी खेतीबाट आम्दानी लिएको जानकारी दिए । उनीहरु सहोदर दाजुभाइ हुन् । उनीहरुले तरकारी खेतीबाटै वार्षिकरूपमा ६ देखि सात लाख रुपैयाँसम्म आम्दानी गर्दै आएका छन् ।

२०६३ सालबाट शुरु गरेको तरकारी खेतीलाई ती दाजुभाइले निरन्तरता दिएका हुन् । बारीमा बन्दा, काउली, टमाटर, लसुन, प्याज, सागलगायतका तरकारी उत्पादन गर्दै आएका छन् । अहिले पनि उनकाे बारीमा टमाटर लटरम्म फलेको छ ।

त्यसैगरी प्याज, मुला, सागलगायतका तरकारी छन् । पछिल्लो समय रुकुमकोट रुकुमपूर्वको सदरमुकाम बनेपछि उत्पादित तरकारी सबै खपत हुने गरेको प्रकाश बिसीले जानकारी दिए ।

उत्पादित सबै तरकारी बजार लग्नुपर्ने बाध्यता छैन , उनले भने, तरकारी खोज्दै मानिसहरु घरमै किन्न आउँछन् ।

अर्गानिक तरकारी उत्पादन गर्ने भएकाले मानिसले आफूले उत्पादन गरेको तरकारी सबैले मन पराउने गरेको जनाइएको छ । सिस्ने गाउँपालिका–६ की सुगन्धा मल्लले छ रोपनी जग्गामा तरकारी खेती गर्दै आएकी छन् । उनले तरकारी खेतीबाट मात्रै वार्षिक पाँचदेखि ६ लाख रुपैयाँसम्म आम्दानी गर्दै आएकी छन् ।

तरकारी मात्र नभएर उनले विभिन्न प्रकारका बिरुवा पनि उत्पादन गर्दै आएको जानकारी दिइन् । पछिल्लो चरणमा रुकुमकोटमा विस्तार हुँदै गरेको बजार, बढिरहेको जनसङ्ख्याले गर्दा बजारको समस्या नरहेको उनले बताइन् ।

तरकारी बिक्रीका लागि बजारको चिन्ता गर्नु पर्दैन, ग्राहक बारीमै पुगेर ताजा तरकारी लिने गरेका छन् , उनले भनिन् ।

रुकुमकोटमा उत्पादित तरकारी अहिले रुकुमकोट उपत्यकामै खपत हुने गरेको छ । जिल्लामा विषादी प्रयोग अझै नभित्रिएकाले युवाले गरेको अर्गानिक तरकारी उत्पादन सबैको रोजाइमा पर्ने गरेको छ ।

यहाँका युवाले प्रदेशको लगानीबाट तरकारी खेती गरिरहेका छन् । कतिपयले आफ्नै लागानीबाट पनि तरकारी खेती गरिरहेका छन् । प्रदेश सरकारले अनुदान उपलब्ध गराएपछि आफू कृषिमा होमिन उत्साहित भएको सिस्ने गाउँपालिका- ५ की रत्ना बिसीले बताइन् ।

तरकारी उत्पादनमा युवाहरु आकर्षण भए विभिन्न रोगले उनीहरुलाई आतङ्कित बनाउने गर्दछ । बारीभरि तरकारी लगाएर मेहनतको फल पाउने बेलामा विभिन्न किसिमका किरा, भुसुना लागेर क्षति पुर्‍याउने गरेको सिस्ने गाउँपालिका–५ भाटलराउनेका टेकबहादुर रोकाले बताए ।

किराले बेलाबेलामा सताइरहने हुँदा माटो परीक्षण, उपयुक्त बीउ, दक्ष प्राविधिक, रोगको पहिचान, तरकारी खेतीसम्बन्धी तालीमलगायतका विषयमा व्यवस्थापन गर्न स्थानीय सरकारले सहयोग गर्ने अपेक्षा आफूले गरेको पनि उनले बताए ।

प्रकाशित मिति: शनिबार, माघ १८, २०७६ १९:३१