शिक्षा सुधारका लागि कचनकवल गाउँपालिकाको विशेष अभियान

A+ A A-

निजीको तुलनामा सामुदायिक विद्यालयको शैक्षिक गुणस्तर खस्किँदै गइरहेको भन्दै दक्षिणी झापाको कचनकवल गाउँपालिकाले नीति तथा कार्यक्रममै शिक्षा सुधारका लागि विशेष अभियान सुरु गरेको छ । अभियानसँगै गाउँपालिकाले एक वडा, एक नमुना बाल विकास केन्द्र स्थापना गरेको छ ।

गाउँपालिकाले चालू आर्थिक वर्ष २०७६/७७ मा सामुदायिक विद्यालयको शैक्षिक गुणस्तर अभिवृद्धिका लागि छुट्टै बजेट विनियोजना गरेको छ ।

सोही बजेटबाटै गाउँपालिकाले यस वर्षदेखि ‘एक वडा, एक नमुना बाल विकास केन्द्र’ स्थापना कार्यको थालनी गरेको छ । गाउँपालिकाको शिक्षा, युवा तथा खेलकुद शाखाले कचनकवल– ५ डाँगाबारीस्थित पशुपति प्राथमिक विद्यालयमा नमुना बाल विकास केन्द्रको स्थापना गरेको छ ।

नमुना बाल विकास केन्द्रको उद्घाटन संघीय सांसद राजेन्द्र लिङदेनले गरेका छन् । गाउँपालिका र संघीय सांसदको क्षेत्र विकास कोषबाट प्राप्त बजेटले यस वर्ष गाउँपालिकाका सातवटै वडामा सातवटा नमुना बाल विकास केन्द्रको स्थापना गर्ने योजना छ । विकासको मूल जड नै शिक्षा रहेकाले बाल विकास केन्द्रको सञ्चालनमा जोड दिइएको गाउँपालिका अध्यक्ष अञ्जार आलमले बताए ।

पशुपति प्राविमा स्थापना गरिएको नमुना बाल विकास केन्द्रसँगै गाउँपालिकामा शैक्षिक सुधारको कामको सुरुवात भइसकेको उनले बताए । नमुना केन्द्रमा मण्टेश्वरी विधिसहित खेल सामग्री, सिकाइ सामग्री, टेलिभिजन, शौचालय, स्वच्छ खानेपानी र पङ्खा जडान गरिएको गाउँपालिकाको शिक्षा, युवा तथा खेलकुद शाखाका प्रमुख छवि बस्नेतले बताए ।

आदिवासी समुदायको बाहुल्य रहेको गाउँमा २०२९ सालमा पशुपति प्राविको स्थापना भएको हो । निजी विद्यालय विस्तार हुनुअघि विद्यालयमा विद्यार्थीको चाप उच्च भए पनि अहिले विद्यार्थीको संख्या घट्दो क्रममा रहेको विद्यालयका प्रधानाध्यापक अनिलकुमार गणेशले बताए ।

गाउँपालिकामा रहेका २९ वटा सामुदायिक विद्यालयमा अध्ययनरत विद्यार्थीका लागि गाउँपालिकाले चाल्र आवमा १२ कक्षासम्म निःशुल्क र छात्रालाई कलेजमा निःशुल्क शिक्षाको व्यवस्था गरेको छ ।

प्रकाशित मिति: शुक्रबार, माघ १७, २०७६ १९:४५