प्रदेश १ का राजमार्गमा यात्रुवाहक सवारीका लागि ‘टाइम कार्ड’

A+ A A-

प्रदेश १ का तीन जिल्ला झापा, मोरङ र सुनसरीमा पर्ने राजमार्गलाई लक्षित गर्दै सार्वजनिक यात्रुवाहक सवारीसाधनमा ‘टाइम कार्ड’ प्रणाली लागू गरिएको छ । तीव्र गति रोक्न, चालकलाई जिम्मेवार र सचेत बनाउन तथा दुर्घटना न्यूनीकरणको मुख्य उद्देश्यले यातायात व्यवसायीसँगकै समन्वयमा ट्राफिक प्रहरीले पहिलो पटक तराईका यी तीन जिल्लामा एकै पटक ‘टाइम कार्ड’ प्रणाली लागू गरेको हो ।

अबदेखि पूर्व–पश्चिम राजमार्गअन्तर्गत झापाको काँकडभिट्टादेखि सुनसरीको कोशी ब्यारेजसम्म र कोशी राजमार्गअन्तर्गत विराटनगरदेखि धरानसम्म गुड्ने सार्वजनिक यात्रुवाहक सवारीसाधनका लागि यो नियम लागू हुनेछ ।

प्रदेश १ प्रहरी प्रमुख डीआईजी ठाकुरप्रसाद ज्ञवालीले मोरङको सुन्दरहरैंचा नगरपालिका–७, गछियामा औपचारिक रूपमा यसको शुभारम्भ गरेका हुन् ।

प्रदेश १ ट्राफिक प्रहरी प्रमुख प्रहरी उपरीक्षक भीमबहादुर दाहालले छोटो तथा मध्यम दूरीकालाई लक्षित गरेर ‘टाइम कार्ड’ लागू गरिएको जानकारी दिए । विशेष गरेर राजमार्गमा सबैभन्दा बढी दुर्घटना भएको पाइएपछि राजमार्ग केन्द्रित गरिएको उनको भनाइ छ ।

प्रदेश १ मा चालू आर्थिक वर्षको पुस मसान्तसम्ममा भएका चार सय ४७ वटा दुर्घटनामा १ सय ७७ जनाको मृत्यु भएको छ । त्यसमध्ये १ सय ९ जनाको मृत्यु राजमार्गमा भएको दुर्घटनाबाट भएको प्रहरी उपरीक्षक दाहालले बताए ।

उनका अनुसार बढ्दो दुर्घटना, सवारीसाधनको तीव्र गति र राजमार्गको अस्तब्यस्ततालाई नियमन गर्न तथा अनुशासित बनाउन ‘टाइम कार्ड’ प्रणाली प्रभावकारी बन्नेछ ।

‘यात्रु उठाउन होडबाजी र अस्वस्थ प्रतिस्पर्धा गर्दै राजमार्गमा सवारीसाधन तीव्र गतिमा कुदाइँदा दुर्घटना बढिरहेको पाइयो,’ दाहालले भने, ‘एकले अर्कोलाई उछिन्न र तीव्र गतिमा कुदाउन नपाइने नियमको अब कडाइका साथ अनुगमन गरेर कारबाही अघि बढाइनेछ ।’

किलोमिटरका आधारमा ‘टाइम कार्ड’ लागू गरिएसँगै अब ट्राफिक प्रहरीले तोकेको र कार्डमा उल्लेख भएको समयमा यात्रुवाहक सवारीसाधन गन्तव्यमा पुग्नुपर्ने हुन्छ । तोकेको समयभन्दा अगाडि नै पुग्नेले कारबाहीको भागिदार बन्नुपर्ने दाहालले बताए ।

विशेष गरेर यो नियम कार्यान्वयन भए नभएको बारेमा कडाइका साथ अनुगमन गर्न ट्राफिक प्रहरी परिचालन गरेर १३ ठाउँमा टाइमकार्ड चेकजाँच स्थल स्थापना गरिएको छ ।

झापाको काँकडभिट्टा, बिर्तामोड, दमक, ताराबारी, मोरङको बेलबारी, गछिया, कंचनबारी, विराटनगर बसपार्क, सुनसरीस्थित धरानको तीनकुने, इटहरीको कलंकी मोड, पोकली, कोशी कटान र भण्टाबारीलाई चेकजाँच स्थल कायम गरिएको र यी स्थानबाट नियमित चेकजाँच हुने जानकारी प्रहरी उपरीक्षक दाहालले दिए । उनका अनुसार ‘टाइम कार्ड’ लागू भएका सवारीसाधनले एक किलोमिटर दूरी पार गर्न अब न्यूनतम १ मिनेट ४८ सेकेन्ड समय लगाउनुपर्नेछ ।

सबै सवारीसाधनका चालकका हातमा थमाइएको ‘टाइम कार्ड’ हेण्डबुक आकारको छ । चालकले प्रत्येक चेक प्वाइन्टमा गाडी रोकेर उक्त हेण्डबुकमा आफ्नो समय दर्ता गराउनुपर्ने प्रदेश १ ट्राफिक प्रहरी कार्यालय इटहरीका प्रहरी नायव उपरीक्षक लक्ष्मीराज अधिकारीले बताए ।

ट्राफिक प्रहरीले ‘टाइम कार्ड’मा छुटेको स्थान, पुग्ने स्थान, पुगेको समय र दस्तखत र छापसमेत लगाउने मोरङ ट्राफिक प्रमुख प्रहरी निरीक्षक रोकशकुमार पोदारले बताए । प्रदेश १ मा बस, मिनी बस र माइक्रो गरेर ६ हजारको हाराहारीमा सार्वजनिक यात्रुवाहक सवारीसाधन रहेको ट्राफिक प्रहरीले जनाएको छ ।

प्रकाशित मिति: शुक्रबार, माघ १७, २०७६ १९:३०