गोकर्णेश्वरमा कविता महोत्सव हुँदै, प्रथम हुनेलाई ५१ हजार

A+ A A-

गोकर्णेश्वर नगरपालिकाले आगामी १६ फागुनदेखि देशव्यापी राष्ट्रिय कविता प्रतियोगितात्मक महोत्सवको आयोजना गर्ने भएको छ ।

गोकर्णेश्वर नगरपालिकालाई साहित्यको केन्द्र बनाउने उद्देश्यले महोत्सव गर्न लागिएको गोकर्णेश्वर नगरपालिकाका प्रमुख सन्तोष चालिसेले बताए । महोत्सवलाई सफल बनाउन प्रमुख चालिसेको संरक्षकत्व एवम् वरिष्ठ साहित्यकार गोविन्द घिमिरे वेदमणिको संयोजकत्वमा १ सय १ सदस्यीय मूल आयोजक समिति गठन गरिएको छ ।

मूल आयोजक समितिमातहत विभिन्न उपसमिति गठन गरिएको संयोजक घिमिरेले जानकारी दिए । देशको संविधान र कानुनविरुद्ध नहुने शीर्षकमा आधारित बढीमा २ सय शब्दसहितको कविता प्रतियोगिताका लागि योग्य मानिने घिमिरेले बताए ।

प्रतियोगिता प्रदेशस्तरको पनि हुने भएकाले पहिलो, दोस्रो, तेस्रो एवम् सान्त्वना पुरस्कारका लागि केन्द्रस्तरमा सर्वोत्कृष्ट कविताहरू छुट्याएपछि मात्र बाँकी रहेका तिनै कविताहरुमध्येबाट प्रदेशस्तरका उत्कृष्ट तीन कविताहरू छुट्याइने घिमिरेले जानकारी दिए ।

प्रतियोगितामा निष्पक्षता र विश्वसनीयता कायम गर्नका लागि स्थापित मूल्यांकन पद्धतिका आधारमा विज्ञ समूहबाट मूल्यांकन गराइने र उक्त मूल्यांकनबाट उच्चतम श्रेणीमा आएका कविताहरूमध्ये बढीमा ४० जनासम्मलाई वाचनका लागि सिफारिस गरिने भएको छ ।

पहिलो, दोस्रो, तेस्रो एवं सान्त्वना दुईसमेत गरी पाँच जनालाई क्रमशः ५१ हजार, ३१ हजार, २१ हजार, १० हजार र प्रतिप्रदेश ३ जनाको दरले २१ जनालाई जनही ५ हजारका दरले नगद पुरस्कार र प्रमाणपत्र प्रदान गरिने घिमिरेले जनाए । प्रतियोगिता आरुबारी चोकमा हुने आयोजकले बताएका छन् ।

प्रकाशित मिति: शुक्रबार, माघ १७, २०७६ १८:४४