गण्डकीमा युरो मापदण्डका नयाँ गाडीले ट्रायल दिन सुरु

A+ A A-

गण्डकी प्रदेशमा कारको सवारीचालक अनुमतिपत्रका लागि अब ३ सय रुपैयाँ शुल्क तिर्न नपर्ने भएको छ । ड्याट्सन कम्पनीको युरो मापदण्डका नयाँ गाडीले ट्रायल दिने व्यवस्था सुरु भएसँगै अब कारको सवारीचालक अनुमतिपत्रका ट्रायल दिन २४ रुपैयाँ मात्र तिरे पुग्ने भएको छ ।

सनराइज ड्राइभिङ स्कुलअन्तर्गतको कुसुम सप्लायर्स र यातायात व्यवस्था कार्यालय गण्डकीको सहकार्यमा यस्तो व्यवस्था बिहीबारदेखि कार्यान्वयनमा आएको हो ।

सवारीचालक अनुमतिपत्र गण्डकी प्रदेशका शाखा अधिकृत भरतराज काफ्ले, गण्डकी प्रदेश ट्राफिक प्रहरी कार्यालयका नायव उपरीक्षक टेकबहादुर कार्की, सनराइज ड्राइभिङ स्कुलका अध्यक्ष वसन्त भट्टचन र दीपक गुरुङले संयुक्त रुपमा नयाँ व्यवस्थापनसहितको ट्रायल दिने गाडीको रिबन काटेर उद्घाटन गरेका हुन् ।

सो अवसरमा शाखा अधिकृत भरतराज काफ्लेले नयाँ मोडेलका गाडीले ट्रायल दिँदा केही समय पास हुने रिजल्ट राम्रो नआए पनि दीर्घकालीन रूपमा समाज र सडकमा समेत राम्रो प्रभाव पर्ने बताए । उनका अनुसार गण्डकी प्रदेशभित्र कारको सवारीचालक अनुमतिपत्र लिनका लागि अबदेखि ड्याटसन २०१९ मोडेलकै गाडी सम्झौता भएको र यही गाडीमै ट्रायल हुनेछ ।

नयाँ गाडीले दुई/चार दिन पास नभए पनि दीर्घकालीन रूपमा सडक दुर्घटना कमी हुने र सक्षम भएर मात्र लाइसेन्स लिन सक्ने जनशक्ति तयार गर्नुपर्ने उनको भनाइ छ ।

दोस्रो पटक सवारीचालक अनुमतिपत्रका लागि ट्रायल दिन आएका पोखरा– १३ का राजु ढकालले नयाँ सुविधासम्पन्न गाडीले सस्तो मूल्यमा ट्रायल दिन पाउँदा खुसी लागेको बताए ।

उनले भने, ‘आजदेखि नयाँ गाडीले ट्रायल दिने व्यवस्था सुरु भएको रहेछ, मूल्य पनि एकदमै सस्तो, खुसी लागेको छ । किनभने, पुराना गाडीले ट्रायल दिँदा ट्रायल फेल हुने सम्भावना हुन्थ्यो, साइड लाइट बाल्दा नबल्ने, चिप्लिने, स्टार्ट बन्द हुने, ब्रेक नलाग्ने जस्ता समस्या बढी हुन्थ्यो ।’

सनराइज ड्राइभिङ स्कुलका सञ्चालक लेखनाथ सुवेदीले ट्रायलमा नयाँ मोडेलका गाडीहरु सुरु भएसँगै परीक्षार्थीले घुमाउरो पाराबाट लाइसेन्स लिन नलागी आफैं सक्षम भएर मात्र लाइसेन्स लिन सक्ने बताए । युरो मापदण्डका गाडीमै सिक्ने र ट्रायल दिने व्यवस्थाले सबैलाई सहज हुने उनको कथन छ ।

प्रकाशित मिति: बिहीबार, माघ १६, २०७६ १९:५२