‘सेन्टी भाइरस’को ट्रेलर रिलिजभरि नै सेन्टी बने धुर्मुस

A+ A A-

बिहान उठेदेखि राति नसुतेसम्म क्रिकेट रंगशालाको निर्माणमा खटिइरहेका सीताराम कट्टेल (धुर्मस) र श्रीमती कुञ्जना घिमिरे सुन्तलीसहित बुधबार हतारहतार काठमाडौँ आए । उनीहरू हतारिएर काठमाडौँ आउनुको कारण थियो– फिल्म ‘सेन्टी भाइरस’को ट्रेलर रिलिज गर्नु ।

धुर्मश–सुन्तली फाउन्डेसनले निर्माण गरिरहेको गौतमबुद्ध क्रिकेट रंगशालाको सहयोगार्थ निर्माण भएको फिल्म हो ‘सेन्टी भासरस’ ।

फिल्मको ट्रेलर रिलिज गर्न काठमाडौँ आएका धुर्मुस फिल्मको ट्रेलर रिलिजभरि सेन्टी नै भए । कार्यक्रममा फिल्मको भन्दा धेरै कुरा आफ्ना सामाजिक कामका बारेमा बोले उनीहरूले । धुर्मुसले आफू सामाजिक अभियन्ता बनेर कलाक्षेत्रको माया मार्नुपरेको कथाव्यथा सुनाए ।

‘मुलुकको आवश्यकता, नागरिकका चाहना बुझेर सरकारले काम गरिदिएको भए हामी कलाकार सामाजिक अभियन्ता बन्नुपर्ने थिएन,’ उनले भने, ‘हामीलाई कला क्षेत्र नै प्यारो थियो, घुमिन्थ्यो, रमाइन्थ्यो, आनन्द थियो । जहाँ गए पनि बुढाबुढीसँगै गइन्थ्यो । तर अहिले बिहान ४ बजेदेखि आफ्नो पेशा, परिवार, सानी छोरी सबै छोडेर राति १० बजेसम्म देशका लागि खटिइरहेका छौँ ।’

उनले अहिले सुन्तली कहाँ आफू कहाँ भएको बताए । ‘बुढाबुढीसँगै रमाउँदै हिँड्थ्यौँ, आज बुढी कहाँ छ, म कहाँ छु, अत्तोपत्तो छैन । मेरा बुबा, आमा र छोरी कहाँ छन, मलाई थाहा छैन । के बार के दिन के महिना मैले थाहा पाउँदिनँ । म सुत्दा पनि रंगशाला, उठ्दा पनि रंगशाला, एउटै सोच्छु,’ उनले भने ।

देशका युवाहरू विदेशिनुपरेको स्थिति चाँडै अन्त्य हुनुपर्ने कुरामा उनले जोड दिए । उनले अब विदेशीहरू नेपालमा आएर काम गर्ने वातावरण देशमा बन्नुपर्ने बताए । फिल्म ‘सेन्टी भाइरस’ आगामी ९ फागुनमा महाशिवरात्रिको दिन रिलिज हुँदै छ । फिल्मको ट्रेलर र गीत रिलिज गरिएको छ ।

अहिले फिल्मको प्रचारप्रसार भइरहेको छ । फिल्ममा धुर्मस–सुन्तलीका साथै दायाहाङ राई, बुद्धि तामाङ, विल्सनविक्रम राई, सन्दिप क्षेत्रीलगायतका कलाकारको अभिनय छ । फिल्मको कथा कुमार कट्टेल र दीपक आचार्यले लेखेका हुन् भने रामबाबु गुरुङले निर्देशन गरेका हुन् ।

प्रकाशित मिति: बिहीबार, माघ १६, २०७६ १३:३३