बराहक्षेत्रमा २२ करोड लगानीकाे खानेपानी आयोजना सञ्चालनमा

A+ A A-

सुनसरीको बराहक्षेत्र नगरपालिका क्षेत्रमा खानेपानी आयोजना सञ्चालनमा ल्याइएको छ । आयोजना सञ्चालनमा ल्याएर घर–घरमा धारामार्फत शुद्ध पिउने पानी वितरण गर्न थालिएपछि स्थानीय बासिन्दा हर्षित भएका छन् ।

बराक्षेत्र नगरपालिकामा मानव स्वास्थ्यका लागि आवश्यक शुद्ध तथा सफा पिउने पानी सहज रूपमा उपलब्ध गराउने गरी काम हुन थालेपछि स्थानीयवासी हर्षित भएका हुन् ।

ट्यूबेलबाट सहज रूपमा पानी नआउने, र आए पनि आर्सेनिकयुक्त फलाम मिसिएको पानी आउनाले सो क्षेत्रका बासिन्दा दुषित पानीबाट प्रभावित हुँदै आएको बेला सो खानेपानी आयोजना सञ्चालनमा आएको छ । सञ्चालनमा आएको महेन्द्रनगर साना शहरी खानेपानी तथा सरसफाइ उपभोक्ता संस्थाले धारा वितरण गर्न थालेपछि बराहक्षेत्रवासी लाभान्वित वन्न थालेका हुन् ।

विगतका वर्षहरूमा सो ठाउँका स्थानीय बासिन्दाहरूले सहज रूपमा पिउने पानी उपभोग गर्न नपाइरहेको तर्फ मध्यनजर गर्दै एसियाली विकास बैकको ७० प्रतिशत सहयोग, नगर विकास कोषको २५ प्रतिशत र उपभोक्ताहरूको ५ प्रतिशत गरी कुल २२ करोडभन्दा बढकिो लागतमा खानेपानी आयोजना सम्पन्न भएपछि यस क्षेत्रका उपभोक्तालाई धारा वितरण गर्न थालिएको महेन्द्रनगर साना शहरी खानेपानी तथा सरसफाइ उपभोक्ता संस्थाकी कोषाध्यक्ष अनु गुरूङले बताइन् ।

बराहक्षेत्रवासीलाई लक्षित गरी ४ हजार ५ सय धारा वितरणको योजनासहित आयोजनाको काम थालिएकोमा हालसम्म २७ सय धारा वितरण गरिसकेको महेन्द्रनगर साना शहरी खानेपानी तथा सरसफाइ उपभोक्ता संस्थाका अध्यक्ष भवानी धिमालले जानकारी दिए । उनले सुरुमा केही कठिनाइहरू आए पनि हाल आएर उपभोक्ताहरू धारा जडानका लागि आउने क्रम बढेको र यससँगै खानेपानीको धारा वितरण कार्य विस्तार गरिँदै लगिएको बताए ।

सप्तकोशी नदीआसपासको क्षेत्र भएर पनि ट्यूबेलमा सहज रूपमा पानी नआउने र आए पनि आर्सेनिकयुक्त पानी आइरहेको अवस्थामा आयोजनामार्फत सफा र स्वस्थ पानी पिउन पाएको स्थानीय टेकबहादुर घिमिरेले हर्षित हुँदै बताए । सो खानेपानी आयोजना महेन्द्रनगर साना शहरी खानेपानी तथा सरसफाइ उपभोक्ता संस्थाले २०७२ सालदेखि निर्माण कार्य थालेको थियो ।

प्रकाशित मिति: बुधबार, माघ १५, २०७६ २३:१६