देउवाको शुभकामना सभामुखलाई: संसद् विपक्षीको हो भनेर व्यवहार गर्नुपर्‍यो

A+ A A-

प्रमुख प्रतिपक्षी दलका नेता तथा नेपाली कांग्रेसका सभापति शेरबहादुर देउवाले संसद् प्रतिपक्षी दलको भएकाले सोहीअनुसारको व्यवहार सभामुख र सत्तारुढ दलबाट हुनुपर्ने बताएका छन् ।

प्रतिनिधिसभाको मंगलबारको बैठकमा बोल्दै नेता देउवाले नवनियुक्त सभामुख अग्निप्रसाद सापकोटालाई शुभकामना दिँदै सभामुख तठस्थ र निष्पक्ष पद भएकाले संसद् विपक्षीको हो भनेर बुझ्नुपर्ने बताएका हुन् ।

‘प्रतिनिधिसभाका पूर्वसभामुख दमननाथ ढुंगानाले २०४८ सालमा हामी सत्तापक्षको हुँदा संसद् विपक्षीको हो भनेर भन्नुहुन्थ्यो’, देउवाले भने, ‘त्यसैले संसद्मा प्रतिपक्षी दललाई विश्वासमा लिएर अघि बढ्दा सरकारलाईसमेत सजिलो हुन्छ र सफलता प्राप्त गर्न सक्छ ।’

बैठकमा सम्बोधनको क्रममा प्रधानमन्त्री केपी शर्मा ओलीले लोकतन्त्रको विषयमा धेरै राम्रो कुरा गरे पनि व्यवहारमा त्यस्तो नपाइको जनाए । ‘प्रधानमन्त्रीले लोकतन्त्रको कति राम्रो कुरा गर्नुभयो । व्यवहारमा पनि त्यस्तै हुनुपर्‍यो । लोकतन्त्रको खिलाफमा रहेका विधेयक हटाउनु पर्‍यो नि ?’

देउवाले लोकतन्त्रकाे प्रतिकूल रहेको सूचना प्रविधि विधेयकलगायतलाई संशोधन गर्नुपर्ने बताए । उनले प्रेस स्वतन्त्रताविना लोकतन्त्र चल्न सक्दैन भन्दै प्रजातन्त्र र नागरिक अधिकारको रक्षा गर्न स्वतन्त्र प्रेस अनिवार्य सर्त भएको बताए ।

देउवाले व्यक्तिगत सुरक्षा, गोपनीयताजस्ता अधिकारको हनन हुने गरी टेलिफोन ट्रयापिङका कुरा आएको, शान्ति प्रक्रियाका लागि काम गर्न बाँकी रहेको जनाए ।

आफू प्रधानमन्त्री हुँदा पास भएको एमसीसी सदनबाट पारित गर्न जोड दिँदै उनले भने, ‘ मिलिटरी आउने कुरा सम्झौतामा नलेख्दासमेत यस्तो कुरा कहाँबाट आयो ?’ मिलिटरी एलाइन्सको हल्ला गरिएको भन्दै देउवाले यति ठूलो सहयोग अमेरिकाबाट कहिल्यै नआएको, चिनियाँ दूतावासले आपत्ति नगरेको, नेपालको बिजुली बेच्ने हो भने बुटवलदेखि दक्षिण भारतसम्म ट्रान्समिसनलाईन विस्तार गर्नुपर्ने बताए ।

भारतले नेपालको बिजुली किन्न तयार भएपछि विवाद गर्न नहुने उनको भनाइ छ । देउवाले उखु किसानको समस्यालाई सरकारले सम्बाेधन नगरेको भन्दै उखु किसानले पाउनुपर्ने रकम उपलब्ध गराउन पनि सरकारसँग माग गरे ।

प्रकाशित मिति: मंगलबार, माघ १४, २०७६ १४:४३