बन्चरे डाँडामा शहरी विकासमन्त्रीकाे छड्के अनुगमन

A+ A A-

काठमाडौं उपत्यकाको फोहोर व्यवस्थापनका लागि निर्माणधीन बन्चरे डाँडा स्यानिटरी ल्याण्डफिल्ड साइट निर्माणमा फेरि अवरोध आएपछि शहरी विकास राज्यमन्त्री रामवीर मानन्धरले निर्माणस्थलको फेरि छड्के अनुगमन गरेका छन् । उपत्यकाको फोहाेर व्यवस्थापनमा कोसेढुंगा मानिएको नुवाकोट र धादिङको सिमानामा पर्ने बन्चरेडाँडामा निर्माण कार्य ठप्प भएपछि मन्त्री मानन्धर सडक विभागका इन्जिनियरहरूसहित निर्माणस्थल पुगेका हुन् ।

बन्चरेडाँडालाई मेलम्ची-२ बनाउन खोज्नेहरू सलबलाइरहेको बताउँदै मन्त्री मानन्धरले राज्यको लगानीमाथि खेलवाड गर्नेहरूलाई कारबाही गरिछाड्ने बताएका छन् । समृद्ध नेपाल सुखी नेपालीको राष्ट्रिय आकांक्षा पूरा गर्न र प्रधानमन्त्रीको सपना साकार पार्न यो परियोजना तोकिएकै समयमा सक्नुको विकल्प नभएको बताउँदै मन्त्री मानन्धरले आयोजनालाई दुहुनो गाई बनाउन खोज्नेहरूको नाम सार्वजनिक गर्ने चेतावनी दिएका छन् ।

मेलम्ची खानेपानी आयोजना सकिन कति वर्ष लाग्यो ? यसअघि दर्जनौं सरकार आए, तर कम्युनिस्ट सरकारहरू नै जनताप्रति उत्तरदायी भएर काम गरेको इतिहास छ, मन्त्री मानन्धरले भनेफ, बन्चरेडाँडालाई पनि मेलम्चीकै हालतमा पुर्‍याउन खोज्नेहरू सलबलाइरहेका छन् । अब मेलम्चीको पानी काठमाडौंमा आउन रोक्नेहरूको र बन्चरेमा फोहाेर व्यवस्थापनमा अवरोध गरेर उपत्यकालाई सर्वसम्पन्न शहर निर्माण हुन नदिनेहरूका दिन सकिए । किनकि नेपालमा नेकपाको सरकार छ । हामी जनताको सेवक हौं ।

मन्त्रीसहितको टोली पुग्दा निर्माणस्थलमा क्रसर उद्योगले गिटी, बालुवा र ढुंगा पैठारी गरिरहेको पाइएको छ । ल्याण्डफिल्ड साइट निर्माण गरिरहेको शहरी विकास तथा भवन निर्माण विभागको हेलचेक्रयाइँका कारण निर्माणस्थलमा अवरोध आएको स्थानीयले आरोप लगाएका छन् । गत पुस पहिलो साता मन्त्री मानन्धरसँगै बन्चरेडाँडा पुगेका शहरी विकास तथा भवन निर्माण विभागका महानिर्देशक मणिराम गेलाल र आयोजना निर्देशक पदम मैनालीले फागुन पहिलो साताभित्र फोहाेर व्यवस्थापन गर्नेगरी तीन सिफ्टमा काम गर्ने प्रतिवद्वता जनाएका थिए ।

तर विभागकै कारण काम रोकिएपछि स्थानीय थप आक्रोशित बनेका छन् । सोमबार मध्यान्ह मन्त्री मानन्धरसँगै सडक डिभिजन कार्यालय काठमाडौंका डिजी कुबेर नेपाली, इन्जिनियर अशोक शाक्य र मधुसुदन लामिछाने पनि पुगेका थिए । बन्चरेडाँडासम्म पुग्ने सडक पिच तत्काल गर्नेगरी काम अघि बढाइएको नेपालीले बताए ।

बन्चरेडाँडा पुग्ने छोटो दूरीको सडक निर्माणका बारेमा पनि अध्ययन थालिनेछ । उपत्यकाको फोहाेर व्यवस्थापनमा चासो दिँदै आएका मन्त्री मानन्धरले कामलाई तीव्रता दिन आयोजना प्रमुखसहित ठेकेदार कम्पनीलाई पटकपटक निर्देशन दिएका छन् । मन्त्री मानन्धर गत बिहीबार पनि एक्लै आयोजना स्थल पुगेका थिए । मन्त्री मानन्धरले आयोजना स्थलमा देखिएको अवरोध अन्त्यका लागि पहलस्वरूप बन्चरेडाँडा गएको बताए ।

ठेकेदारले काम रोकेको खबर पाएपछि अनुगमनमा गएको बताउँदै मन्त्री मानन्धरले आयोजना सम्पन्न गर्नका लागि बजेटको अभाव नभएको बताए । शहरी विकास तथा भवन निर्माण विभागका अधिकारीहरूले बजेट अभाव नभएको बताए पनि नियोजित रूपमा काम रोकिएको छ । मन्त्री मानन्धरका प्रमुख स्वकीय सचिव ओम राजवाहकले भने, काम रोक्ने ठेकेदार र आयोजना प्रमुखसँग मन्त्रीज्यूले स्पष्टीकरण लिने तयारी गर्नुभएको छ ।

प्रधानमन्त्रीले काठमाडौंको फोहाेर व्यवस्थापन दिर्घकालीन रूपमा समाधान हुने यो आयोजनालाई तीव्र रूपमा अघि बढाउन निर्देशन दिनुभएको छ मन्त्री मानन्धरले भने, आयोजना प्रमुखहरूले गलत रिपोर्टिङ गर्ने र ठेकेदारले काम राेक्ने दोहोरो चरित्र देखियो । अब कारबाहीको प्रक्रिया अघि बढाउँछु । आफू मन्त्री भएपछि पाँच पटक आयोजनाको अनुगमन गरिसकेको बताउँदै मन्त्री मानन्धरले संघीय राजधानी काठमाडौं उपत्यकाको फोहाेर व्यवस्थापनमा बाधा उत्पन्न गराउने र अनावश्यक बखेडा निकालेर काम रोक्नेहरूलाई कारबाही गर्ने बताए ।

कम्तिमा सय वर्षका लागि उपत्यकाको फोहाेर व्यवस्थापन गर्न सकिने गरी निर्माणाधीन बन्चरेडाँडा ल्याण्डफिल्ड साइटको पहिलो फेज फागुन पहिलो साताभित्र सम्पन्न गर्ने लक्ष्य राखिएको थियो । स्थानीयसँग निरन्तर सम्पर्कमा रहेको बताउँदै मन्त्री मानन्धरले हाल स्थानीय आयोजनामा देखिएको अवरोध अन्त्य गर्न सहमत भइसक्दा पनि काम रोकिनु गलत भएको बताए ।

आयोजना निर्माणको पहिलो चरणको लागत ३४ करोड ६८ लाख रूपैयाँ रहेको छ । आयोजना सम्पन्न गर्न सरकारले १ अर्ब ५६ करोड रूपैयाँ बजेट विनियोजन गरेको छ । बन्चरेडाँडा स्यानेटरी ल्याण्डफिल्ड साइट निर्माणका लागि सरकारले स्थानीयको १७ सय रोपनी जग्गा अधिग्रहण गरिसकेको छ ।

प्रकाशित मिति: मंगलबार, माघ १४, २०७६ ११:४५