‘कोरोना भाइरस’ नियन्त्रणमा सरकार बल्ल सचेतः नेपालमै परीक्षण, विमानस्थलमा थर्मल स्क्यानर

‘कोरोना भाइरस’ नियन्त्रणमा सरकार बल्ल सचेतः नेपालमै परीक्षण, विमानस्थलमा थर्मल स्क्यानर

A+ A A-

चीनबाट फर्किएका एक विद्यार्थीमा ‘नोवेल कोरोना भाइरस’ संक्रमण भएको पुष्टि भएसँगै अहिले नेपालमा त्रास फैलिएको छ । चीनबाट नेपाल आएका थप दुई जनामा पनि ‘कोरोना भाइरस’को संक्रमण भएको आशंका गरिएको छ । अहिले धेरै मानिस ‘कोरोना भाइरस’ संक्रमणको आशंकामा शुक्रराज ट्रपिकल तथा सरुवा रोग अस्पतालमा चेकजाँच गर्न पुग्ने गरेका छन् ।

चीनबाट नेपाल फर्किएका मानिसमा ‘कोरोना भाइरस’ देखिएसँगै नेपालमा यसको जोखिम उच्च रहेको छ । चीनबाट धेरै पर्यटक नेपालमा आउने र चीनमा रहेका नेपाली फर्किंदा पनि यो भाइरस नेपालमा आउनसक्ने सम्भवाना रहन्छ । चीनमा अध्ययनरत नेपाली विद्यार्थीमा भाइरसको संक्रमण भएको आशंका गरिएको छ ।

कोरोना भाइरसको संक्रमण पाइएसँगै सरकारले नियन्त्रणको पहल सुरु गरिसकेको छ । विमानास्थलमा स्क्यानर राख्नेदेखि नेपालमै परीक्षण सुरु भएको छ ।

विमानस्थलमा थर्मल स्क्यानर

हवाइ माध्यमबाट आउने पर्यटक तथा यात्रुबाट नेपालमा कोरोना भाइरस भित्रिने जोखिम बढी छ । त्यसैको नियन्त्रणका लागि जनसंख्या तथा स्वास्थ्य मन्त्रालयले विमानस्थलमा थर्मल स्क्यानर सञ्चालनमा ल्याएको छ । स्क्यानरले यात्रुको शरिरको तापक्रम स्वचलित रुपमा मापन गर्ने, भाइरस संक्रमण भएको पाइएमा निजलाई निरीक्षणमा राखिने र थप समस्या देखिएमा उपचारका लागि अस्पताल लैजाने व्यवस्था मिलाइको छ ।

नेपालमै कोरोना भाइरसको परिक्षण

नेपालमा देखिएको कोरोना भाइरस संक्रमणको पहिलो परीक्षण सिंगापुरमा गरिएको थियो । नेपालमा स्याम्पल लिएर विदेश पठाएर परीक्षण गर्नुपर्ने झन्झटबाट मुक्ति दिलाउन राष्ट्रिय जनस्वास्थ्य प्रयोगशालामा यसको परिक्षण गर्ने व्यवस्था मिलाइएको छ ।

अहिले प्रयोगशालामा केही स्याम्पलको परीक्षण गरिएपनि रिपार्ट भने आएको छैन । नेपालमा परीक्षण गरिएको रिपोर्ट र विदेशमा गरिएको परीक्षणको रिपोर्टबीच तुलना गरेर तथ्यांक सही भएको पुष्टी गरेर मात्रै रिपोर्ट प्रदान गरिनेछ । कोरोना भाइरस संक्रमण परीक्षणको रिपोर्ट १ दिनमा तयार हुनेछ ।

कोरोना भाइरस संक्रमण परीक्षणका लागि न्यूनतम २ हजार रुपैयाँ शुल्क लाग्ने प्रयोगशालाकी निर्देशक रुणा झाले बताइन् । तर संक्रमितको परीक्षण भने निःशुल्क रुपमा हुनेछ ।

तर, सामान्य रुघाखोकी लाग्दैमा भने कोरोनाको परीक्षण नहुने निर्देशक झाले प्रष्ट्याइन् । अस्पतालले कोरोनाको आशंका गरि सिफारिस गरेमा मात्र परीक्षण गरिनेछ । चीनबाट नेपाल आउने हरुको भने तत्काल परीक्षण गरिने उनले बताइन् ।

चीनमा रहेका विद्यार्थीलाई दुतावाससँग सम्पर्क गर्न अनुरोध

हाल चीनमा करिब १० हजार नेपाली विद्यार्थी अध्ययनरत छन् । उनीहरुमा ‘कोरोना भाइरस’को संक्रमण हुनसक्ने सम्भावना उच्च रहेको छ । चीनमा रहेका विद्यार्थीमध्ये अहिले १ सयजना मात्र दुतावासको सम्पर्कमा आएका छन् ।

प्रधानमत्री केपी शर्मा ओलीले आवश्यक परेमा उनीहरुलाई हेलिकप्टर चार्टर गरेर उद्धार गरिने बताएका छन् ।स्वास्थ्य मन्त्रालयका प्रवक्ता महेन्द्र श्रेष्ठले चीनमा रहेका विद्यार्थीमा संक्रमण देखिएमा वा आशंका लागेमा दुतावासमा सम्पर्क गर्न अनुरोध गरेका छन् ।

के हो कोरोना भाइरस ?

‘कोरोना भाइस’ जनावरबाट मानिसमा सर्ने रहस्यमयी भाइरस हो । गत ३१ डिसेम्बरमा मानिसमा फेला परेको ‘नोवेल कोरोना भाइरस’ यो वर्गमा नयाँ प्रजातीको भाइरस हो । ‘कोरोना भाइरस’ धेरै प्रकारका हुन्छन् जसमध्ये ६ वटा मात्रै मानिसमा सर्ने गर्दछन् ।

अहिले फेला परेको ‘नोवेल कोरोना भाइरस’को अन्य प्रकारका भन्दा मानिसमा सर्ने खतरा बढी हुन्छ । चीनमा यसले ठूलो समस्याको रुप लिइसकेको छ । यसको संक्रमणबाट अहिलेसम्म २५ जनाकोे मृत्यु भइसकेको छ भने ५ सयभन्दा बढी संक्रमित भएका छन् ।

कोरोना भाइरसको संक्रमण भएमा ज्वरो आउने, श्वासप्रश्वासमा अत्यधिक समास्या हने, रुघाखोकी लाग्ने, घाँटी–टाउको दुख्नेलगायतका लक्षण देखिन्छ । संक्रमणको असर अत्यधिक भएमा विरामीको मृत्यु पनि हुन सक्छ ।

यसको संक्रमणबाट बच्न नियमित साबुन पानीले हात धुने, जंगली तथा घरेलु पशुपन्छीको असुरक्षित सम्पर्कबाट टाढा रहने, पुशुजन्य अण्डा–मासु राम्रोसँग पकाएर मात्र खाने गर्नुपर्छ । साथै, रुघाखोकी लागेका व्यक्तिसँग सोझो सम्पर्क नराख्ने, भिडभाडमा रहँदा सावधानी अपनाउने र सरसफाईमा ध्यान दिएमा पनि संक्रमणको सम्भावना न्यूनिकरण गर्न सकिन्छ ।

प्रकाशित मिति: सोमबार, माघ १३, २०७६ २०:०६