कुष्ठरोगीको उपचार गर्न चिया बेच्दै तान्त्रिक

A+ A A-

जनकपुरधामको जनक चोकमा चिया खानेहरूको भीड लागेको थियो । चिया खान धनुषाका प्रमुख जिल्ला अधिकारीसहित नगरका थुप्रै चर्चित व्यक्तित्वहरू त्यहाँ लाम लागेका थिए । चिया बेचिरहेका थिए तान्त्रिकका रूपमा चर्चित विभाष बाबा ।

उनलाई चियाको कप बाँड्न भ्याई नभ्याई थियो । करिब दुई घण्टामा उनले त्यहाँ अढाइ सय कप चिया बेचे । चियाको मूल्य ३० रुपैयाँ लेखिएको मूल्यसूची राखिए पनि ग्राहकहरू इच्छानुसार एक कपको ५० देखि ५ सय रुपैयाँसम्म तिरिरहेका थिए ।

विभाष बाबाले आम्दानीका लागि भने चिया बेच्ने पेशा सुरु गरेका होइनन् । त्यो कामख्या परिवार नेपालले आयोजना गरेको चिया बेच्ने कार्यक्रम थियो । ६७औं कुष्ठरोग दिवसको अवसरमा कुष्ठ प्रभावित एक दम्पतीको जीवनयापनको भरपर्दो आधार निर्माण गर्न सो कार्यक्रम आयोजना गरिएको हो । विभाष बाबा कामख्या परिवार नेपालका अध्यक्ष हुन् ।

बाराको पचरौटा–४ निवासी सञ्जयप्रसाद यादव १६ वर्षदेखि कुष्ठरोगको शिकार भएका छन् । हातमा कुष्ठको संक्रमण देखिएपछि उनलाई आफ्नै परिवारले समेत बहिष्कार गरेको थियो । सञ्जयकी श्रीमती पनि कुष्ठ प्रभावित हुन् ।

जब आफ्नै परिवारले तिरष्कार गर्‍यो, धनुषास्थित लालगढ कुष्ठरोग केन्द्रले उनीहरूलाई साथ दिएको थियो । कुष्ठरोग केन्द्रमातहत रहेको सामाजिक आर्थिक पुनर्स्थापना केन्द्रकी प्रमुख ललिता लाभले उनीहरूलाई निकै सहयोग गरिन् । उनीहरूको विवाह पनि लाभकै पहलमा भएको थियो ।

कुष्ठ प्रभावित भएपछि विवाहका लागि जोडी भेट्न नसक्ने भएपछि बाँकी जीवन एक्लै अन्धकारमा बित्ने डर थियो । केन्द्रका प्रतिनिधिले जति सम्झाए पनि घरका सदस्यले कुष्ठरोगलाई अन्य रोगसरह सोचेर उनलाई अरु सदस्यजस्तो माया दिएनन् । अझ कुष्ठरोगीसँगै विवाह गरेपछि त उनीहरूले थप तिरस्कार गरे ।

‘कुष्ठरोग पनि अन्य रोग वा बिरामीजस्तै समस्या हो । तर, नेपाली समाजमा कुष्ठ प्रभावितलाई पापको फल भनेर परिवार र समाजमा अवहेलना र बहिष्कार गरिन्छ । सञ्जय र रेखा पनि त्यही सोचका कारण परिवारको बहिष्कारमा परेका हुन्,’ लाभले बताइन् ।

आर्थिक निर्भरताका लागि केन्द्रकै तर्फबाट उनीहरूलाई पोते बनाउने तालीम प्रदान गरियो । उनीहरूले बनाएको पोतेको बजार नेपाल हुँदै जर्मनीसम्म फैलियो । तर, लामो समयसम्म टिक्न सकेन ।

आइतबार चिया बेच्ने कार्यक्रममा लाभले पनि मनग्गे सहयोग गरिरहेकी थिइन् । चिया बेचेर संकलित रकमले ती दम्पतीलाई खाजा पसल सञ्चालन गर्न सहयोग गरिएको उनले बताइन् । कार्यक्रम सम्पन्न भएपछि प्रमुख जिल्ला अधिकारी प्रदिपराज कणेलले चिया बेचेर उठेको रकमसञ्जय दम्पतीलाई हस्तान्तरण गरे ।

‘विभाष बाबा’ (विभाष लाभ) जनकपुर र आसपासको जिल्लासँगै भारतको विभिन्न प्रान्तमा चर्चित छन् । चिकित्साशास्त्र पढेका उनले एमबीबीएस गरेका छन् । तर उनी डाक्टर भन्दा पनि तान्त्रिकका रूपमा बढी चर्चित छन् ।

जनकपुरधामको देवी चोकस्थित उनको निवासमा बिहानदेखि रातिसम्म अनुयायीहरूको भीड लागिरहेको हुन्छ ।

प्रकाशित मिति: सोमबार, माघ १३, २०७६ १४:५९