विप्लवको निशानामा एनसेल टावर

A+ A A-

देशभरि विभिन्न क्षेत्रमा विस्फोट र आगजनीका घटना गराउँदै आएको प्रतिबन्धित नेकपा विप्लव समूहले एनसेल कम्पनीका टावरमाथि निशाना बनाएको छ । करछलीको आरोप लाग्दै आएको एनसेलका टावरमा धमाधम बम विस्फोट र आगजनी गर्दै आएको छ ।

शनिबार मात्र गृहमन्त्री रामबहादुर थापा बादलले सुर्खेतमा सम्पन्न गोष्ठीमा विप्लव समूह कमजोर भएर र अब आतंकित गतिविधि गर्न नसक्ने दाबी गरेका थिए । गृहमन्त्रीको यस्तो बयान आएको भाेलिपल्ट आइतबार रातिदेखि नै विप्लव समूहले आगजनीका गतिविधि सक्रिय बनाएको छ ।

एकैपटक मकवानपुर, चितवन, सिन्धुली र रामेछापका एनेसेल टावरमा आगजनी गरेको छ । आगजनीका कारण टावर पूर्ण रूपमा क्षति भएको छ । खैरहनी नगरपालिकामा रहेको एनसेल टावरमा आगजनी भएको छ । खैरहनी नगरपालिका–२ मा केशवराज दवाडीको जग्गामा राखिएको एनसेलको टावरमा आगजनी भएको प्रहरीले जनाएको छ । प्रहरीका अनुसार आगलागीबाट जेनेरेटर र ट्रान्सफर्मरमा क्षति पुगेको छ ।

यस्तै, आइतबार राति करिब १० बजेर ४५ मिनेटमा टावरमा आगजनी गरेको जिल्ला प्रहरी कार्यालय चितवनका प्रहरी नायव उपरीक्षक एकनारायण कोइरालाले जानकारी दिए । उनका अनुसार दमकल, नेपाल प्रहरी र स्थानीयवासीको सहायताले राति नै आगो नियन्त्रणमा लिइएको थियो । आगलागीमा विप्लव समूहको संलग्नता रहेको आशका गरिएको छ ।

यस्तै, आइतबार राति नै मकवानपुरका चार स्थानमा रहेका एनसेल टावरमा पनि आगजनी भएको छ । यहाँको आगजनीको जिम्मेवारी नेकपा विप्लवले लिएको छ । चारवटा एनसेल टावरमा आफूहरूले आगजनी गरेको विप्लव समूह मकवानपुरका सेक्रेटरी पासाङले जानकारी दिए ।

आइतबार राति भीमफेदी गाउँपालिका देउरालीमा रहेको एनसेल टावर, हेटौंडा– १५, रातोमाटेमा रहेको एनसेल टावर र मनहरीको डिल्लीपुरमा रहेको एनसेल टावरमा आगजनी गरेको जनाइएको छ । पार्टी निर्देशनस्वरुप चार स्थानमा रहेको टावरमा आगजनी गरे पनि एक स्थानका बारेमा भने खबर प्राप्त भइनसकेको पासाङले बताए ।

नेपाल कम्युनिस्ट पार्टी विप्लव मकवानपुर सेक्रेटरी पासाङले टेलीफोनमार्फत घटनाको जिम्मेवारी लिएका थिए । आगलागीबाट टावर जलेर पूर्ण रूपमा नष्ट भएका छन् ।

यस्तै, सिन्धुलीको मरिण गाउँपालिका–७ मा रहेको एनसेलको टावरमा पनि आगजनी भएको छ । गएराति एनसेलको टावरमा अज्ञात समूहले आगजनी गरेको हो । जिल्ला प्रहरी कार्यालय सिन्धुलीका प्रहरी नायव उपरीक्षक श्यामबहादुर खत्रीका अनुसार एनसेलको टावर पूर्ण रूपमा क्षति भएको छ ।

उनका अनुसार टावरमा कसले आगजनी गर्‍यो भन्ने खुल्न सकेको छैन । घटनामा संलग्नको खोजी भइरहेको र घटनाको आवश्यक अनुसन्धान भइरहेको जिल्ला प्रहरी कार्यालय सिन्धुलीले जनाएको छ । यस्तै, गएराति रामेछाप जिल्लामा पनि एक एनसेल टावरमा आगजनी भएको छ । अज्ञात समूहद्वारा दोरम्बा गाउँपालिका–७, गुम्सीमा रहेको एनसेल टावरमा अज्ञात समूहले आगजनी गरेको जिल्ला प्रहरी कार्यालय रामेछापका प्रहरी नायव उपरीक्षक वसन्त पाठकले जानकारी दिए ।

उनका अनुसार टावरमा रहेका तारहरू जलेर क्षति पुगेको छ । घटनामा संलग्नको खोजी भइरहेको छ । यस्तै, पाल्पाको बगनासकाली गाउँपालिका–९ स्थित बगनासडाँडामा रहेको एनसेलको टावरमा आगजनी भएको छ । आइतबार राति करिब पौने १० बजेको समयमा टावरमा आगलागी भएको जिल्ला प्रहरी कार्यालय पाल्पाका प्रमुख दीपेन्द्र जिसीले बताए ।

आगलागीबाट टावरमा पूर्ण रूपमा क्षति पुगेको छ । बोरामा खर राखेर आगो सल्काएको पाइएको छ । टावरको जेनेरेटर, बीटीएस सिस्टम, जीएसएम एन्टेना, ब्याट्री प्यानल, मिटरबक्ससहित तार पूर्ण रूपमा जलेको प्रहरीले जनाएको छ ।

घटनाबारे अनुसन्धान भइरहेको प्रहरीले बताएको छ । पटक–पटक खुल्लमखुल्ला रूपमा विभिन्न संरचनामा आगलागी र बम विस्फोट गराउँदै आए पनि प्रहरीले विप्लव समूहलाई नियन्त्रणमा लिन सकेको छैन । अहिले विप्लव समूहले स्थानीय तहका संरचना र एनसेलका टावरमाथि निशाना बनाएर आफ्ना गतिविधि अघि बढाएको छ ।

प्रकाशित मिति: सोमबार, माघ १३, २०७६ १३:१७