घेरा हालेर नियन्त्रणमा लिइएको थियो वडाध्यक्षसहित १६ जुवाडे (नामावलीसहित)

A+ A A-

आइतबार साँझ करिब साढे ९ बजेतिर जिल्ला प्रहरी कार्यालयमा एक अज्ञात व्यक्तिले फोन गरे । धनगढी उपमहानगरपालिका–३ को मिलचोकमा जनप्रतिनिधिसहित केही व्यवसायीहरू लाखौं रुपैयाँ लिएर जुवा खेलिरहेका छन् भन्ने सूचना दिए ।

सूचना पाएलगत्तै जिल्ला प्रहरी प्रमुख दक्षकुमार बस्नेत आफैंले नेतृत्व गरेर प्रहरीसहित जुवा खेलिरहेको भन्ने स्थानमा पुगे । प्रहरी आइरहेको खबर पाएपछि स्थानीय तिलक अधिकारीको घरमा लाखौं रुपैयाँसहित जुवा खेलिरहेका जुवाडेको भागाभाग भयो । तर त्यतिबेलासम्म प्रहरी घरमा पुगिसकेको थियो ।

प्रहरीले घर घेरा हालेपछि उनीहरू भाग्न पाएनन् । सूचना पाएअनुसार नभन्दै प्रहरीले वडाध्यक्ष नै लाखौं रुपैयाँ लिएर जुवा खालमा बसिरहेको फेला पार्‍यो । ‘करिब साढे नौ बजेतिर हामीले जुवा खेलिरहेको सूचना पायौं । हामी पुग्दासम्म उनीहरूलाई जानकारी भए पनि घर घेरा हालेकाले भाग्न पाएनन् । केहीले छतबाट हाम फाल्न खोजेका थिए । तर बेलैमा नियन्त्रणमा लियौं,’ प्रहरी प्रमुख बस्नेतले भने ।

प्रहरीले माेटो रकमसहित गोदावरी नगरपालिका–३ का वडाध्यक्ष रवीन्द्र शाहीसहित १६ जना जुवाडे पक्राउ परे । उनीहरूले जुवा खालमा राखेको २२ लाख ८२ हजार नगद पनि बरामद गरेको प्रहरी प्रमुख बस्नेतले बताए । प्रहरीले उनीहरूलाई पक्राउ गर्न आइतबार राति १० बजेदेखि ३ बजेसम्म सो क्षेत्रमा अप्रेसन जारी राखेकाे थियो ।

‘यो गिरोह लामो समयदेखि ठूलो रकमसहित जुवातास खेलिरहेका छन् भन्ने हामीलाई सूचना थियो र त्यसैका आधारमा पिछा गर्दै जाँदा प्रकाउ गर्न सफल भयौं’, डीएसपी बस्नेतले भने । उनीहरूलाई जुवातास ऐनअन्तर्गत कारबाही गरिने प्रहरीले जनाएको छ ।

पक्राउ पर्ने जुवाडेहरू

१. जिल्ला कैलाली गोदावरी नगरपालिका १० का रविन्द्र शाही । वडा नम्बर ३ का अध्यक्ष पनि शाही नै हुन् ।
२. जि.कन्चनपुर भीमदत्त नगरपालिका– ३ का ३४ वर्षीय धीरेन्द्र चन्द
३. जिल्ला कन्चनपुर बेलौरी नगरपालिका–१ का ३४ वर्षीय भुवन कुँवर
४. जिल्ला कैलाली धनगढी उपमहानगरपालिका–३ का ३८ वर्षीय तिलक अधिकारी । अधिकारीकै घरमा जुवा खाल बनाइएको थियो ।
५. धनगढी–१३ का ३४ वर्षीय रमेश खड्का
६. वडा नम्बर–४ का ३५ वर्षीय खेमराज भट्ट
७. वडा नम्बर–२ का ४१ वर्षीय जनक दौल्याल
८. गोदावरी–१० का २८ वर्षीय सन्देश तामाङ
९. गोदावरी–३ का ३८ वर्षीय मोहन खड्का
१०. जिल्ला बैतडी दशरथ चन्द नगरपालिका–८ का ३१ वर्षीय अमित गुरु
११. बझाङ, जयपृथ्वी–१० का ३५ वर्षीय प्रेमबहादुर सिंह
१२. बैतडी दशरथ चन्द–४ का ३० वर्षीय सूर्य भट्ट
१३. पुर्चौडी–८ का ५० वर्षीय कालुसिंह धामी
१४. धनगढी उपमहानगरपालिका–३ का ३७ वर्षीय चन्द्रमणि अधिकारी
१५. दार्चुला नौगाड–४ का ३३ वर्षीय जयसिंह धामी
१६. महाकाली–४ का ३८ वर्षीय मंगल ठगुन्ना