धर्मभक्तको पूर्ण कदको शालिक अनावरण

A+ A A-

जहानियाँ राणा शासनविरूद्ध नेपाली जनताको स्वतन्त्रता र अधिकार प्राप्तिको संघर्षका क्रममा सहादत प्राप्त गरेका धर्मभक्त माथेमाको सम्झनामा पूर्ण कदको शालिक निर्माण भएको छ । माथेमालाई तत्कालीन शासकले भुण्ड्याएर मृत्युदण्ड दिएको सिफलको उकालो बकाइनाको रूख भएकै स्थानमा उनको पूर्ण कदको शालिक निर्माण भएको हो ।

काठमाडौं महानगरपालिकाले निर्माण गरेको सो शालिक आज काठमाडौं महानगरपालिकाका मेयर विद्यासुन्दर शाक्यले अनावरण गरे । करिब १७ लाखको लगानीमा निर्माण भएको सो शालिकको अनावरण गर्दै मेयर शाक्यले जनताको स्वतन्त्रता र अधिकार प्राप्तिको संघर्षका क्रममा सहादत प्राप्त गर्ने चार सहिद अहिले पनि हरेक नेपालीको मन–मुटुमा रहेको स्मरण गरे ।

‘उहाँहरूले (चार शहीद धर्मभक्त माथेमा, शुक्रराज शास्त्री, गंगालाल श्रेष्ठ, दशरथचन्द्र ठाकुर) मेरो र मेरो परिवारका लागि होइन राष्ट्र र जनताका लागि केही गर्नुपर्छ भन्ने नि:स्वार्थ भावनाले तत्कालीन राणा शासनविरूद्धमा आन्दोलन गर्नुभयो,’ मेयर शाक्यले धर्मभक्तको पूर्णकदको शालिक अघिल्लतिर उँभिएर चार सहिदको सम्झना गर्दै भने, ‘उहाँहरूले आफ्ना लागि केही माग्नु भएन । जति माग्नुभयो देश र जनताका लागि माग्नुभयो, त्यसकारण पनि हामी उहाँलाई सम्झिरहन्छौैँ र हाम्रो पुस्ताले पनि उहाँहरूलाई सम्झिरहनुपर्छ ।’

मेयर शाक्यले अहिले पनि आफू र आफ्नो परिवारभन्दा पनि राष्ट्र र जनताका लागि भनेर संघर्ष गर्नेहरूको सङ्ख्या निकै थोरै भएको भन्दै त्यतिबेला आफ्नो परिवारको सन्तान गुमाउने सहिद परिवारको सम्मानका लागि पनि महानगरपालिकाले चार सहिदका पूर्णकदका लागि निर्माण गर्ने योजना बनाएको र त्यसले पूर्णता प्राप्त गरेको बताए ।

‘हामीले आज यहाँ धर्मभक्तको पूर्णकदको शालिक निर्माण गरेको छौँ,’ शाक्यले भने, ‘अब माघ १५ गते गंगालाल श्रेष्ठ र दशरथ चन्द ठाकुरलाई गोली हानेर मृत्यु दण्ड दिएको शोभा भगवतीमा उहाँहरूको पूर्णकदको शालिक अनवरण गर्ने कार्यक्रम छ ।’ सहिद सप्ताह मूल समारोह समितिका संयोजकसमेत रहेका मेयर शाक्यले सहिदहरूको सम्झनामा महानगरपालिकाले सप्ताहव्यापी कार्यक्रमकै आयोजना गरेको पनि बताए ।

‘हामीले चार सहिदको सम्झनामा आयोजना गरेको सप्ताहव्यापी कार्यक्रमअन्तर्गत नै माघ १० गते बिहान शुक्रराज शास्त्रीले अमरत्व प्राप्त गरेको टेकु खरिबाेटनजिक रहेको शास्त्रीको पूर्णकदको शालिकमा माल्यार्पण गर्‍याैं,’ उनले भने, ‘सप्ताहव्यापी कार्यक्रमको अन्तिम दिन अर्थात् माघ १६ गते शान्तिबाटिका भेला भएर सुरक्षा निकायको व्याण्ड र सहिदहरूको तस्वीर राखिएको बग्गीसहितको प्रभातफेरी सहिद पार्क लैनचौरमा पुगेर श्रद्धाञ्जली सभामा परिणत हुनेछ ।’

सो सभामा प्रधानमन्त्री, मन्त्री, सरकारका उच्चपदस्थ अधिकारी, जनप्रतिनिधिको सहभागिता रहनेछ । सभामा नेपाली सेनाले सहिदको सम्मानमा ‘सम्मा गारद’ अर्पण गर्नेछ । त्यसै दिन मध्यान्न १२ बजे एक तोपको सलामी अर्पण गरिनेछ । कार्यक्रममा बोल्दै उमेयर हरिप्रभा खड्की श्रेष्ठले पनि सहिदहरूको सम्मानमा महानगरपालिका लागि परेको बताए । उनले पनि चार शहीदकै पूर्णकदको शालिक निर्माणमा महानगर लागिपरेको बताए ।

वडा नम्बर–७ का अध्यक्ष शुद्धकुमार डंगोलले यो वर्ष धर्मभक्तको पूर्ण कदको शालिक निर्माणमा जुटेका कारण सहिदहरूको सम्झनामा अन्य कार्यक्रम गर्न नभ्याएको भन्दै आगामी वर्षमा उनीहरूको सम्झनामा विभिन्न कार्यक्रम गर्ने योजना रहेको बताए । शास्त्रीलाई १९९७ साल माघ १० गते टेकु मचलीस्थित खरिबोटमा र माथेमालाई माघ १३ गते सिफल उकालो बकाइनाका रूपमा झ्ण्ड्याएर मृत्युदण्ड दिइएको थियो ।