प्रदेश २ को राजधानी जनकपुरधाम, नाममा अझै मिलेन विवाद

A+ A A-

प्रदेश २ को स्थायी राजधानी जनकपुरधाम नै कायम हुने भएको छ । प्रदेशको नामाकरण र राजधानी टुंगो लगाउने सन्दर्भमा सभामुख सरोजकुमार राय यादवको संयोजकत्वमा गठित संसदीय विशेष समितिमा प्रदेशको राजधानी जनकपुरधाम तोक्ने सहमति जुटेको हो ।

राजधानी जनकपुरधाम नै कायम गर्ने निर्णय समितिमा सर्वसम्मतिले पारित भएको समिति संयोजकसमेत रहेका सभामुख सरोजकुमार यादवले जानकारी दिएका छन् ।

समितिले प्रदेश राजधानीको सीमा पनि टुंगो लगाएको छ । यो प्रस्ताव प्रदेशसभाको दुईतिहाइ बहुमतले पारित गरेपछि राजधानीको अन्तिम टुंगो लाग्नेछ ।

‘उत्तरमा धनुषाको मिथिला नगरपालिकाको ढल्केवर, दक्षिणमा भारतको अन्तर्राष्टिय सीमा तथा पूर्व र पश्चिमतर्फ मिथिला माध्यमिकी परिक्रमा क्षेत्रसम्म राजधानीको सिमाना तोक्ने सहमति जुटेको छ,’ सभामुख यादवले भने, ‘समितिमा सर्वसम्मतिले उक्त प्रस्ताव पारित गर्न सफल भएका छौं ।’

विभिन्न दलका प्रस्तावक तथा समर्थक, प्रस्तावका संशोधनकर्तासमेतलाई बोलाएर छलफल गरी उक्त निर्णयमा पुगिएको सभामुख यादवले बताए । पारित भएको प्रस्ताव नेकपा, समाजवादी र राजपाले दर्ता गरेका थिए भने नेपाली कांग्रेसले जनकपुरधाम उपमहानगरपालिकाभित्र राजधानी हुनुपर्ने प्रस्ताव गरेको थियो ।

‘भोलि राजधानी भएका कारण जनकपुरधाम उपमहानगरबाट महानगरमा परिणत हुने हुँदा उपमहानगरभित्र सीमित गर्न हुँदैन भनेर कांग्रेसलाई मनाउन सफल भयौं,’ सभामुख यादवले भने ।

उक्त समितिमा उपसभामुख उपमा देव, नेकपाका संसदीय दलका नेता सत्यनारायण मण्डल, सांसद रामकुमार यादव, नेपाली कांग्रेसका संसदीय दलका नेता रामसरोज यादव र सांसद नरेश यादव, समाजवादी पार्टीका प्रमुख सचेतक शैलेन्द्रकुमार यादव र संसदीय दलका उपनेता रामआशिष यादव, राजपा नेपालका प्रमुख सचेतक परमेश्वर साह र सांसद रानी शर्मा तिवारी तथा नेपाल संघीय समाजवादीकी सांसद सावित्रीदेवी साह सदस्य छन् ।

प्रदेशको राजधानी र नामसम्बन्धमा विभिन्न दलका सांसदहरूले प्रदेशसभामा ५ भदौमा प्रस्ताव दर्ता गरेका थिए । प्रस्ताव दर्ता भएपछि प्रदेशसभाको बैठकबाट नै सभामुख यादवको संयोजकत्वमा ११ सदस्यीय विशेष समिति गठन गरिएको थियो ।

प्रदेशसभा सचिवालयका सचिव रञ्जितकुमार यादवका अनुसार काम सुरू गरेको मितिले १ महिनाभित्र उक्त विशेष समितिले प्रतिवेदन प्रदेशसभामा पेश गर्नुपर्ने थियो ।

गत ११ पुसदेखि काम थालेकोमा एक महिना पूरा भएको छ । समिति प्रदेशको नामका सम्बन्धमा भने टुंगोमा पुग्न सकेको छैन ।

‘प्रदेशसभाको बैठक नै लामो समयदेखि बस्न नसकेका कारण समितिको म्याद थप्न सकिएको छैन,’ सभामुख यादवले भने, ‘प्रदेशसभाको बैठक सुरू भएपछि समितिको म्याद थपिनेछ ।’

नामका लागि पनि १३ माघमा (सोमबार) बैठक बोलाइएको छ । प्रस्तावक, समर्थक र संशोधनकर्तासमेतलाई बैठकमा बोलाइएको उनले बताए ।

‘छिट्टै बैठकमा सबै पक्षलाई राखेर नामको सवालमा समेत सर्वसम्मति जुटाउने प्रयास गर्नेछौं,’ सभामुख यादवले भने, ‘जसरी राजधानीमा सर्वसम्मति भएको छ, त्यसैगरी नामको विषय पनि सर्वसम्मतिले नै पारित हुनेमा मलाई पूर्ण विश्वास छ ।’

सत्ता पक्षधर समाजवादी र राजपाले मधेस प्रदेश, नेकपाले जानकी प्रदेश र कांग्रेसले मिथिला–भोजपुरा प्रदेश प्रस्ताव गरेका छन् । यही तीन प्रस्तावमा केन्द्रित भएर छलफल भइरहेको छ ।

प्रदेशसभा गठन भएको २१ माघमा २ वर्ष पूरा हुँदै छ । दोस्रो वार्षिकोत्सव मनाउने समय आउँदा पनि प्रदेशसभाले प्रदेशको नाम र स्थायी राजधानीको टुंगो लगाउन सकेको छैन । माघ २१ भित्रै नसकिए पनि माघ महिनाभित्र प्रदेशको नाम र स्थायी राजधानीको विषय प्रदेशसभाबाट टुंगो लाग्ने सभामुख यादव बताउँछन् ।

सभामुख यादवका अनुसार संसदीय समितिले पारित गर्ने प्रतिवेदन प्रदेशसभाको बैठकमा लगिनेछ र त्यस प्रतिवेदनको प्रस्तावउपर मतदान हुनेछ । दुईतिहाइ बहुमतले प्रस्ताव पारित भएपछि नामकरण र राजधानी टुंगो लाग्नेछ ।

प्रदेश २ मा कुल १ सय ७ सांसद छन् । अन्य प्रदेशमा नेकपासँग दुईतिहाइ बहुमत भए पनि प्रदेश २ मा कम्तिमा ३ दल मिल्नुपर्ने बाध्यात्मक अवस्था छ ।

प्रकाशित मिति: आइतबार, माघ १२, २०७६ १९:२२