मौसमी रुघाखोकीको प्रकोपः मृत्यु हुनेको संख्या सात पुग्यो

A+ A A-

पुस अन्तिम सातादेखि हुम्लाका दुर्गम क्षेत्रमा फैलिएको मौसमी रुघाखोकीको औषधि नपाएकै कारण मृतकको संख्या बढ्दै गएको छ । शनिबारसम्म पाँच जनाको मृत्यु भएकोमा शनिबार राति र आइतबार बिहान गरी मृत्यु हुनेको संख्या सात पुगेको छ । पछिल्लो तीन सातामा चंखेली, सर्केगाड र खार्पुनाथ गाउँपालिकामा सातजनाको ज्यान गएको हो ।

चंखेली गाउँपालिका–६ मासिधारामा ४५ वर्षीय मदन शाही, ५० वर्षीया जनुकला शाही, ६५ वर्षीय दतिराम सार्की, ६० वर्षीया गोरी सार्की र ६० वर्षकै पाउरी शाहीको मृत्यु भएको छ । उनीहरू सबैको २६ पुसयता ज्यान गएको हो । त्यस्तै, सर्केगाड–३ उनापानीमा ५५ वर्षीय रंगमल फडेरा र खार्पुनाथ–३ रायामा ३५ वर्षीया चन्दा बुढाको मृत्यु भएको छ ।

जिल्लाका विभिन्न गाउँमा फैलिएको रुघाखोकी र ज्वरोलाई स्थानीय स्वास्थ्यकर्मीले सिजनल फ्लु भनेका छन् । तर, स्थानीय स्वास्थ्य संस्थामा पर्याप्त औषधि र दक्ष स्वास्थ्यकर्मी नहुँदा नियन्त्रणमा ल्याउन समस्या परेको छ । २६ पुसदेखि सुरु भएको रुघाखोकीको प्रकोपले चंखेलीमा मात्र ५ जनाको ज्यान गएको मासिधाराका हिराबहादुर शाहीले बताए ।

चंखेली गाउँपालिकाका स्वास्थ्य शाखा संयोजक कालिबहादुर बुढा सुर्खेततिर झरेका छन् । स्वास्थ्य संस्थामा औषधि र स्वास्थ्यकर्मी अभाव नभएको उनले दाबी गरे । तर स्थानीय भने औषधि उपचार नपाएरै धमाधम मर्न थालेका छन् । पैदल दूरीमा जिल्ला सदरमुकाम सिमकोटबाट चंखेली पुग्न दुई दिन लाग्छ ।

यता सर्केगाड–३ उनापानीको स्वास्थ्य इकाइमा पनि औषधि छैन । अनमि नन्दा फडेराले दैनिक उपचारका लागि आउने ४०÷५० जना बिरामी रित्तो हात फर्काउनुपरेको बताइन् ।

जिल्ला अस्पातलमा पनि मौसमी रुघाखोकीका बिरामी बढ्न थालेको डा. नवीन रोकायले बताए । ‘खोकी लाग्ने, ज्वरो आउने, नाकबाट पातलो सिँगान बग्ने र हड्डी दुख्ने समस्या उनीहरूमा देखिएको छ,’ डा. रोकायले भने । गतवर्ष चैत्रमा पनि ताँजाकोटमा फैलिएको मौसमी रुघाखोकीकै कारण एक सातामा ९ जनाको ज्यान गएको थियो ।

प्रकाशित मिति: आइतबार, माघ १२, २०७६ ०८:३३