गभर्नर नेपाल भन्छन्, ‘नेपालीले पैसा चिनेनन्’

A+ A A-

गभर्नर डा. चिरंजीबि नेपालले आर्थिक समृद्धिका लागि नेपालीलाई वित्तीयरूपमा साक्षर बनाउने अभियानलाई प्राथमिकताका साथ अघि बढाएको बताएका छन् । मिडिया इन्टरनेसनलको आयोजना र नेपाल राष्ट्र बैंकको प्रवर्धनमा शुक्रबार पाल्पाको तानसेन नगरपालिकाको सभाहलमा भएको कार्यक्रममा गभर्नर नेपालले यस्तो बताएका हुन् ।

गभर्नर नेपालले वित्तीय साक्षरता नै समृद्धिको प्रमुख आधार भएको बताए । ‘नेपालीले पैसा र यसको उपयोगबारे सुक्ष्म ज्ञान पाए भने समृद्धि धेरै टाढा छैन,’ गभर्नर नेपालले भने, ‘यसका लागि केन्द्रीय बैंकले वित्तीय साक्षरताका कार्यक्रमहरूलाई प्रोत्साहन गरिरहेको छ ।’

अहिलेसम्म नेपालीले पैसा नै नचिनेको उनले टिप्पणी गरे । पैसा र यसको महत्त्व थाहा पाएको भए, न नेपालमा गरिब भएर बस्नुपर्थ्यो, न त विदेश नै जानुपर्थ्यो, गभर्नर नेपालले भने, गाउँगाउँमा बैंक तथा वित्तीय संस्था छन्, कर्जा लिएर उद्यम, व्यवसाय गर्न सके पैसाका लागि भौतिरिनु पर्दैन ।

उनले बैंक तथा वित्तीय संस्थालाई सेवाग्राहीको हितमा रहेर काम गर्न निर्देशन पनि दिए ।

नेपाल राष्ट्र बैंक प्रदेश ५ का प्रमुख राजेन्द्र भट्टराईले पैसा चिनेर काम गर्न सके विदेश जानै नपर्ने बताए । ‘बैंक तथा वित्तीय संस्थाबाट कर्जा लिनुहोस्, दिएनन् भने राष्ट्र बैंकलाई खबर गर्नुहोस्, कृषक र उद्यमीलाई सरल र सहुलियत कर्जाहरू छन् ।

कार्यक्रममा लघुवित्त वित्तीय संस्थाका तर्फबाट जनउत्थान सामुदायिक लघुवित्त वित्तीय संस्थाका अध्यक्ष बाबुराम विक, पाल्पा उद्योग वाणिज्य संघका अध्यक्ष राजु महर्जन, शाइन रेसुङ्गा डेभलपमेन्ट बैंकका डीसीईओ प्रकाश गुरुङलगायतले वित्तीय साक्षरताका कार्यक्रमकै कारण पछिल्लो समय वित्तीय पहुँचमा रहेका नागरिकको संख्या बढेको बताए ।

बैंक तथा वित्तीय संस्थामा सर्वसाधरणको पहुँच बढाउने उद्देश्यले पाल्पामा कार्यक्रम गरिएको वित्तीय जागरण राष्ट्रिय अभियानका संयोजक माधव निर्दोषले जानकारी दिए ।

प्रकाशित मिति: शनिबार, माघ ११, २०७६ १५:१७