पूर्वमा फैलिँदै सी चिनफिङ, नेकपाले निःशुल्क बाँड्याे जीवनी

A+ A A-

मोरङका विभिन्न स्थानमा चीनका राष्ट्रपति सी चिनफिङबारे लेखिएको पुस्तक वितरण गरिएको छ ।चीनको अर्थिक समृद्धिका लागि सीको सोच र उनले अघि सारेका योजनालगायतका विषय समेटेर प्रकाशित भएको पुस्तक जिल्लाका विभिन्न स्थानीय तह, क्लब तथा सामुदायिक विद्यालयहरूमा वितरण गरिएको हो । मोरङको रतुवामाई नगरपालिकामा पनि उक्त पुस्तकबारे चर्चा गर्दै सहभागीलाई वितरण गरिएको छ ।

मनमोहन स्पोर्ट्स एकेडेमीको आयोजनामा रतुवामाई नगरपालिकाका विभिन्न सामुदायिक विद्यालय र क्लबहरूमा सीबारेको उक्त पुस्तक वितरण गरिनुका साथै चर्चासमेत गरिएको हो । नेकपा मोरङका सदस्य तथा रतुवामाई नगर कमिटी अध्यक्ष शिवनारायण राजवंशी र जिल्ला कमिटी सदस्य दुर्गा विष्टले उक्त पुस्तकबारे चर्चा गर्दै वितरण गरेका हुन् ।

सीले ल्याएको आर्थिक समृद्धि र विकासका योजनालाई कसरी नेपालमा लागू गर्दा देशको विकास गर्न सकिन्छ भन्ने धारणाका साथ पुस्तक वितरण गर्नुका साथै चर्चा गरिएको होे ।

सरकारले नेपालमा भएका पर्याप्त स्रोत साधन र जनशक्तिको प्रयोग गरेर सिको सिद्धान्त र अवधारणा लागू गर्न सके नेपाल पनि एउटा समृद्ध राष्ट्र बन्न सक्ने कार्यक्रममा चर्चा गरिएको थियो ।

त्यस्तै, मोरङको सुन्दर हरैंचा–६ मा पनि इस्ट नेपाल टेक्निकल कलेजको आयोजनामा सीले राष्ट्रमा गरेको आर्थिक समृद्धिका साथै उल्लेखनीय विकास र योगदानलाई समेटेर तयार पारिएको उक्त पुस्तक वितरण गरिएको छ ।

त्यसैगरी, प्रदेश १ को राजधानी विराटनगरमा बिहीबार सम्पन्न राष्ट्रियसभा निर्वाचनमा मतदान गर्न आएका प्रदेशसभा सदस्य, १ सय ३७ वटै स्थानीय तहका प्रमुख र उपप्रमुख, विभिन्न दलका नेता कार्यकर्ता सबैलाई सो पुस्तक वितरण गरिएको छ ।

पुस्तक लिँदै उदयपुरको त्रियुगा नगरपालिकाका मेयर बलदेव चौधरीले आर्थिक विकासमा सीका विचार लागू गर्न सके मुलुकले काँचुली फेर्न समय नलाग्ने बताए ।

प्रकाशित मिति: शुक्रबार, माघ १०, २०७६ १७:१४