काष्ठमण्डप पुनर्निर्माणका लागि महानगरले दियो थप ५ करोड

A+ A A-

काष्ठमण्डप पुनर्निर्माणका लागि काठमाडौं महानगरपालिकाले थप ५ करोड रुपैयाँ अनुदान दिएको छ । यसअघि नै २ चरणमा ५ करोड ५० लाख रुपैयाँ अनुदान दिएको महानगरपालिकाले यस पटक थप ५ करोड रुपैयाँ दिएको हो ।

प्रदेश ३ का सांसद राजेश शाक्यको नेतृत्वको काष्ठमण्डप पुनर्निर्माण समितिलाई काठमाडौं महानगरपालिकाका मेयर विद्यासुन्दर शाक्यले आज ५ करोड रुपैयाँको चेक हस्तान्तरण गर्दै अस्तव्यस्त, ध्वस्त र जीर्ण बनेका सम्पदा पुनर्निर्माण अभियानमा महानगरपालिका जुटेको बताए ।

उनले काष्ठमण्डप पुनर्निर्माणका लागि आर्थिक अभाव नहुने गरी महानगरपालिका सहयोग गर्न तयार रहेको पनि बताए ।

१ वैशाख २०७५ मा काष्ठमण्डप पुनर्निर्माण समिति गठन गरेर पुनर्निर्माणको कामलाई अघि बढाइएको हो । सो समितिलाई महानगरपालिकाले सुरुमा ५० लाख रुपैयाँ दिएको थियो । सो रकमले कार्यालय व्यवस्थापन गर्नेलगायतबाट काम सुरु गरेको समितिलाई महानगरपालिकाले दोस्रो चरणमा ५ करोड रुपैयाँ अनुदान दिएको थियो ।

‘सुरुमा हामीले ५० लाख अनुदान दिँदा र जग खन्दै गर्दा धेरैले काष्ठमण्डप बन्ला र ? भनी आशंका गरेका थिए’, चेक हस्तान्तरण कार्यक्रमलाई सम्बोधन गर्दै मेयर शाक्यले भने, ‘दोस्रो चरणमा ५ करोड दिएपछि ओहो अब त काष्ठमण्डप बन्ला जस्तो छ भन्ने धेरै भए । अहिले हामीले फेरि ५ करोड दिएका छौँ । अब सबै ढुक्क भए हुन्छ, काष्ठमण्डप बन्छ, बन्छ ।’

मेयर शाक्यले काठमाडौं महाहानगरपालिका मूर्त–अमूर्त सम्पदा निर्माण, पुनर्निर्माणको अभियानमा जुटेको भन्दै आफ्नो कार्यकालभित्रै महानगरभित्रका सबै सम्पदा निर्माण, पुनर्निर्माणको कामलाई सम्पन्न गरेरै छाड्ने प्रतिवद्धता पनि व्यक्त गरे ।

‘कुनै पनि कार्यक्रम गर्दा हामीले सर्वसम्मत निर्णय गरेर गरेका छौँ’, मेयर शाक्यले भन्नुभयो, ‘मूर्त–अमूर्त सम्पदा निर्माण, पुनर्निर्माणमा हामी सक्षम छौँ । हामीले कुनै पनि विदेशी दाता गुहार्नुपर्ने अवस्था छैन । हामी आफैँले सम्पन्न गर्न सकेनौँ भने प्रदेश र केन्द्र सरकारसँग सहयोग माग्छौँ । हामीलाई विदेशी गुहार्नुपर्ने आवश्यकता छैन ।’

उनले काष्ठमण्डप पनि निर्धारित समयभित्रै सम्पन्न गर्ने प्रतिवद्धता व्यक्त गरे । उनले कुनै पनि चोक–चोकमा पुनर्निर्माणका काम बाँकी छ भने वडामार्फत् आउन आग्रह गर्दै कुनै पनि पुनर्निर्माणका काम बाँकी नराख्ने पनि उनले प्रतिवद्धता व्यक्त गरे ।
उनले रानीपोखरी र धरहराको काम पनि यही कार्यकालभित्र सम्पन्न हुने प्रतिवद्धता पनि व्यक्त गरे । कार्यक्रमलाई सम्बोधन गर्दै संघीय सांसद कृष्णगोपाल श्रेष्ठले पनि आर्थिक अभावमा काष्ठमण्डपको काम नरोकिने र महानगरपालिका सम्पदा संरक्षण अभियानमा जुटेको छ भन्ने प्रमाण काष्ठमण्डप पुनर्निर्माण भएको बताए ।

पुनर्निर्माण समितिका अध्यक्ष राजेश शाक्यले ५५ प्रतिशत काम सम्पन्न भएको भन्दै तोकिएको ३ वर्षको अवधिमा काम सम्पन्न गरेरै छाड्ने प्रतिवद्धता व्यक्त गरे । ‘अहिले पहिलो तल्लाको छाना छाउने अवस्थामा पुगेका छौँ’, उनले भने, ‘दोस्रो तल्लाको झ्याल राख्ने काम पनि भइरहेको छ । हामी निर्धारित समयमै काम सम्पन्न गर्छौं ।’

उनले १ वैशाख २०७५ क्षमा पूजा गरेर काम सुरु गरेको र अहिलेसम्म निरन्तर रूपमै काम अघि बढेको भन्दै सहयोग गर्ने सबैलाई धन्यवाद दिनुभयो ।

‘हामीले सत्यमोहन जोशी र तत्कालीन पर्यटनमन्त्री रवीन्द्र अधिकारीको उपस्थितिमा क्षमा पूजा गरेर काम अघि बढाएका हौँ । अहिले काम सन्तोषजनक रूपमा अघि बढेको छ’, उनले भने, ‘गत साउनसम्ममा हामीले १ सयवटा थाम उठाउन सफल भएका थियौँ ।’

प्रकाशित मिति: बिहीबार, माघ ९, २०७६ १८:२६