निजी र सरकारी घरबाटै पार्टी हाँक्छन् नेकपाका नेता

A+ A A-

नेपाल कम्युनिस्ट पार्टी (नेकपा)सँग हाल दुईवटा पार्टी कार्यालय छन् । धुम्बाराहीस्थित पासाङल्हामु प्रतिष्ठान भवन र कोटेश्वरको पेरिसडाँडामा नेकपाका विशाल कार्यालय भवन छन् ।

धुम्बाराहीस्थित भवनका लागि नेकपाले मासिक मासिक २ लाख २५ हजार भाडा तिर्छ । अर्को नेकपाको पार्टी कार्यालय पेरिसडाँडामा जनवर्गीय संगठनका कार्यालय छन् । तर पार्टीका शीर्ष नेताहरू भने निजी र सरकारी निवासबाटै पार्टी प्रवेशदेखि पार्टीका आन्तरिक गतिविधिहरू गरिरहेका छन् ।

बुधबार नेकपाका अध्यक्ष पुष्पकमल दाहाल (प्रचण्ड)ले निजी निवास खुमलटारमा विभिन्न दलका कार्यकर्तालाई पार्टी प्रवेशको कार्यक्रम राखे । उनको घरमा हुने यो कार्यक्रम पहिलो होइन् । यसअघि पनि प्रचण्ड निवासबाट पार्टीका विभिन्न गतिविधि भइरहन्थे । कार्यकर्ता निस्फिक्री नेता निवासमा पुग्छन्, कार्यक्रममा सहभागी हुन्छन् ।

नेकपा उच्च तहका नेताहरू सामूहिकताभन्दा व्यक्ति केन्द्रित भइरहेका छन् । प्रचण्डले समाजवादी पार्टीका सहायक प्रवक्ता रामप्रसाद रिजालसहित दुई दर्जन नेता कार्यकर्ता निवासमै बाेलाएर नेकपामा प्रवेश गराए ।

उनले २३ भदौ २०७६ मा नेत्रविक्रम चन्द (विप्लव) नेतृत्वको नेकपाका रामेछाप र सिन्धुपाल्चोका जिल्ला इन्चार्ज यादव ढुंगेल र गोपाल श्रेष्ठलाई पनि घरमै बोलाएर पार्टी प्रवेश गराएका थिए ।

पार्टी प्रवेशदेखि गुटका भेलासम्म नेताकै निजी निवासमा हुन थालेका छन् । पार्टीका प्रस्तावित उपाध्यक्ष बामदेव गौतमले अर्का अध्यक्ष केपी ओलीबाहेकका नेतालाई घरमा बोलाएर बैठक गरेपछि नेकपाभित्र सभामुख चयनको विषय विवादमा परेको थियो ।

प्रचण्डले २२ भदौ २०७६ मा नेपाल कम्युनिस्ट पार्टी मदनवादीका प्रवक्ता विष्णुप्रसाद ढुंगानालगायतका नेता कार्यकर्तालाई पनि खुमलाटारस्थित उनकै घरमा बोलाएर पार्टी प्रवेश गराए ।

त्यही दिन थारू कल्याणकारिणी सभाले ७ भदौ २०७२ मा टीकापुरमा भएको घटनाका बन्दीहरूलाई रिहाइ गर्न प्रचण्डलाई ज्ञापनपत्र बुझायो । ज्ञापनपत्र बुझ्न उनले पार्टी कार्यालय जाने आवश्यकता महसुस गरेनन्, घरमै बाेलाएर ज्ञापनपत्र बुझे ।

प्रचण्डले पार्टी प्रवेश र ज्ञापनपत्र बुझ्ने मात्र होइन, विभिन्न देशबाट नेपाल भ्रमणमा आएका मन्त्रीलाई पनि खुमलटारस्थित घरमै बोलाएर भेटवार्ता गर्ने गरेका छन् ।

१० फागुन २०७५ मा बेलायतका राज्यमन्त्री मार्क ल्याङकष्टरलाई पनि उनले खुमलटारर्मो बाेलाएर भेटे । जब कि उनको त्यो भेट नेकपा अध्यक्षका रूपमा थियो ।

ओली पनि बालुवाटारमै केन्द्रित

नेकपाका अध्यक्ष तथा प्रधानमन्त्री केपी शर्मा ओलीले पनि पार्टीका काम सरकारी निवास बालुवाटारबाटै गर्दै आएका छन् । पछिल्लो समयमा स्वास्थ्यमा समस्या भएका कारण उनी बाहिर निस्केका छैनन् ।

तर बिरामी हुनुभन्दा अघि पनि उनका अधिकांश भेट बालुवाटार र निजी घर भक्तपुरको बालकोटमा हुनेगर्थ्याे ।

३ जेठ २०७५ मा तत्कालीन एमाले र नेकपा माओवादी केन्द्रबीच एकता भयो । एकतालगत्तै केन्द्रीय कमिटीको पहिलो बैठक पनि सरकारी निवास बालुवाटारमै बसेको थियो ।

बैठकलाई अध्यक्षद्वयले सम्बोधन गरेका थिए । पार्टी कार्यालमा गर्नुपर्ने अधिकांश कार्यक्रम प्रधानमन्त्रीको सरकारी निवास र प्रचण्डको निजी निवासमा भइरहँदा पनि नेता र कार्यकर्ता भने चुपचाप छन् ।

पार्टी एकता घोषणा भएको दिन प्रधामन्त्रीले सरकारी निवास बालुवाटारमैै रात्रिभोज दिए। रात्रिभोजमा बालुवाटार पार्टी कि सरकारी खर्चमा सजाइएको थियो भन्ने विषयमा नेताहरूले अहिलेसम्म सूचना सार्वजनिक गरेका छैनन् ।

तत्कालीन नेकपा एमालेको केन्द्रीय कमिटीको अन्तिम बैठक र नेकपाको पहिलो बैठक पनि बालुवाटारमा नै बसेको थियो ।

नेकपाका सचिवालय बैठक पनि प्रधानमन्त्रीको सरकारी निवास बालुवाटारमा नै बस्छ । पार्टी एकता हुनुअघि पनि एकता संयोजन समितिका सबैजसो बैठक बालुवाटारमा नै बस्थे ।

नेकपासँग बल्खुमा अर्को पनि पार्टी कार्यालय छ । तर यो कार्यालय भूकम्पले भत्काएपछि हाल प्रयोगमा छैन । सो भवन निर्माणका लागि पनि पार्टीले ठूलो रकम खर्च गर्ने तयारी गरिरहेको छ ।

नेकपाका शीर्ष नेताहरू पार्टी कार्यालयसमेत विरलै मात्र पुग्छन् । दुईवटा पार्टी कार्यालय हुँदाहुँदै गत १२ पुसमा दुवै अध्यक्षले प्रधानमन्त्रीको सरकारी निवास बालुवाटारमा नेकपानिकट पत्रकारहरूको संगठनका केन्द्रीय नेतृत्वको शपथग्रहण गराएका थिए ।

स्थायी कमिटी सदस्य पनि घरमै बोलाउँछन्

अध्यक्षद्वय र नेकपाका नेतृत्व तहका नेताहरू मात्र होइनन् स्थायी कमिटी सदस्य पनि घरबाटै पार्टीका काम गर्छन् । केही अघि नेकपा स्थायी कमिटी सदस्य लेखराज भट्टले पनि कैलालीको गोदावरीमा रहेको घरमा पार्टी प्रवेश कार्यक्रम राखेका थिए ।

नेकपाका केन्द्रदेखि जिल्लासम्म आफ्नै पार्टी कार्यालय छन् । प्रदेशस्तर नेतासमेत घरबाटै पार्टीका काम गर्छन् ।

प्रकाशित मिति: बिहीबार, माघ ९, २०७६ १६:३४