अवैध उत्खननमा संलग्न कांग्रेस सांसद लामाविरुद्ध पक्राउ पुर्जी जारी

A+ A A-

नुवाकोटका कांग्रेस सांसद बहादुरसिंह लामासहित चार जनाविरुद्ध पक्राउ पुर्जी जारी गरिएको छ । सामुदायिक वनभित्र अवैध उत्खनन गरेको भन्दै प्रतिनिधिसभा सदस्य लामासहित चार जनालाई डिभिजन वन कार्यालय मकवानपुरले पक्राउ पुर्जी जारी गरेको हो ।

पूर्वी मकवानपुरको बकैयास्थित कालिवन क्षेत्रभित्र अवैध उत्खनन गरिरहेको अवस्थामा स्क्याभेटरसहित चालक नरेशराम महरालाई डिभिजन वन कार्यालय मकवानपुरका कार्यालय प्रमुख इमनाथ पौडेल नेतृत्वको टोलीले १३ पुसमा पक्राउ गरेको थियो ।

अनुसन्धानका क्रममा सामुदायिक वन समितिका अध्यक्ष हरिलाल स्याङ्तानलाई पनि वन कार्यालयले पक्राउ गरेको छ । चालकसहित नियन्त्रणमा लिइएको स्क्याभेटरका विषयमा अनुसन्धान गर्दा उक्त अवैध उत्खनन हिडुङ एण्ड थोकर कन्स्ट्रक्सन प्रालि, टोखा नगरपालिका–७, धापासी काठमाडौंको भएको खुलेको छ ।

कम्पनी सञ्चालक समितिका अध्यक्ष प्रतिनिधिसभा सांसद बहादुरसिंह लामा रहेको खुलेपछि लामविरुद्ध पक्राउ पुर्जी जारी गरिएको हो । कम्पनीका अर्का सञ्चालक नुवाकोट, पञ्चकन्या–५ का निर्मलप्रसाद सिटौला, चितवन, भरतपुर–९ का शिवहरि घिमिरे रहेको खुलेपछि कम्पनीका सञ्चालकलाई पुस १५ गते वन कार्यालयमा उपस्थित हुन पत्र काटेको थियो ।

जिल्ला अदालत नुवाकोटबाट दोस्रो पटक म्याद थप हुँदा पनि कम्पनीका कुनै प्रतिनिधि सम्पर्कमा नआएपछि २८ पुसमा पक्राउ पुर्जी जारी गरिएको हो । वन कार्यालयले उनीहरूको खोजी भइरहेको जनाएको छ । सञ्चालकसँगै बकैया–७ स्थित, अठारबिगाह सम्पर्क कार्यालयमा काम गर्ने नुवाकोटको विदुर–१० का सुवास डंगोलविरुद्ध पनि पक्राउ पुर्जी जारी गरिएको वन कार्यालयका प्रमुख पौडेलले जानकारी दिए ।