राष्ट्रियसभा निर्वाचनः १८ सदस्यका लागि मतदान सुरु

A+ A A-

राष्ट्रियसभाका एकतिहाइ सदस्यको निर्वाचनअन्तर्गत आज मतदान सुरु भएको छ । सातवटै प्रदेशमा बिहान १० बजेदेखि मतदान सुरु भएको छ । निर्वाचनबाट राष्ट्रियसभामा १८ जना सदस्य निर्वाचित हुनेछन् ।

निर्वाचनअन्तर्गत प्रदेश ५ मा प्रदेश सरकारका मुख्यमन्त्री शंकर पोखरेलले पहिलो मतदान गरेका छन् । यस्तै, कर्णाली प्रदेशमा पनि मुख्यमन्त्री महेन्द्रबहादुर शाहीले मत खसालेपछि मतदान सुरु भएको हो । सुदूरपश्चिममा पनि मदान सुरु भएको छ । मतदानका लागि प्रदेशसभाका सदस्य, नगरपालिकाका प्रमुख/उपप्रमुख र गाउँपालिका अध्यक्ष/उपाध्यक्ष मतदानस्थल रहेको डोटी पुगिसकेका छन् ।

प्रदेशबाट निर्वाचित हुने दुई राष्ट्रियसभा सदस्य पदका लागि चारको उम्मेदवारी परेको छ । महिलातर्फ नेकपाले शारदा भट्ट तथा अन्य समूहतर्फ तारामान स्वार र नेपाली कांग्रेसले महिलातर्फ तुलसी देवकोटा तथा अन्य समूहतर्फ प्रतापसिंह ठगुन्नालाई उम्मेदवार बनाएको छ ।

निर्वाचनमा पाँच सय ५० प्रदेशसभा सदस्य (सातै प्रदेश) र एक हजार पाँच सय ६ स्थानीय तहका प्रमुख, उपप्रमुख गरी २ हजार ५६ मतदाता छन् । निर्वाचनमा प्रदेशसभा सदस्यको मतभार ४८ र स्थानीय तहका प्रमुख, उपप्रमुखको मतभार १८ हुनेछ ।

राष्ट्रियसभा सदस्य निर्वाचनका लागि प्रदेश १ मा मोरङको विराटनगर, प्रदेश २ मा धनुषाको जनकपुर, बागमती प्रदेशको ललितपुरको जाउलाखेल, गण्डकी प्रदेशको कास्कीको पोखरा, प्रदेश ५ को दाङको घोराही, कर्णाली प्रदेशको सुर्खेतको वीरेन्द्रनगर र सुदूरपश्चिम प्रदेशको डोटीको सिलगढीमा निर्वाचन अधिकृतको कार्यालय स्था

मतदान साँझ ५ बजेसम्म हुनेछ । यस्तै प्रदेश ५ मा तीन सिटका लागि ९ जना उम्मेदवारी चुनावी मैदानमा रहेका छन्, भने ३ सय ५ जना मतदाता रहेका छन् । तीन पदका लागि नेपाल कम्युनिस्ट पार्टी (नेकपा),कांग्रेस, समाजबादी पार्टी र राष्ट्रिय जनमोर्चा पार्टीबाट गरि ९ जनाको उम्मेदवारी परेको हो ।

नेपाल कम्युनिस्ट पार्टी नेकपाको तर्फबाट दाङका जगप्रसाद शर्मा, रुपन्देहीबाट गोपाल भटराई र कपिलवस्तुबाट बिमला घिमिरे उम्मेदवार छन् । कांग्रेसबाट दाङकी गिरिजादेवी न्यौपाने, अर्घाखाँचीका बालकृष्ण पाण्डे र बाँकेका मेराजअहमद हलवाईले उम्मेदवारी दिएको मुख्य निर्वाचन अधिकृत रितेन्द्र थापाले जानकारी दिएका छन् ।

त्यसैगरी, समाजवादी पार्टीका तर्फबाट बाँकेबाट सुनिल सिंघल र बर्दियाका कृष्णप्रसाद यादवले उम्मेदवारी दर्ता गरेका छन् । राष्ट्रिय जनमोर्चाका तर्फबाट कपिलवस्तुका शिव पौडेलले उम्मेदवार रहेका छन् ।

प्रदेश २ मा राष्ट्रियसभा सदस्यको चार पदका लागि भइरहेको निर्वाचनमा नेपाल कम्युनिस्ट पार्टी (नेकपा) सँग राष्ट्रिय जनता पार्टी नेपाल राजपा र कांग्रेससँग समाजवादी पार्टीले गठबन्धन बनाएर आ–आफ्ना उम्मेदवारलाई चुनावी मैदानमा उतारेका छन् ।

महिला एक पदका लागि हुने निर्वाचनमा नेकपाको तर्फबाट तुलसाकुमारी दाहाल र कांग्रेसको तर्फबाट नगिना यादव, दलित एक पदका लागि हुने चुनावको लागि नेकपाको तर्फबाट राधेश्याम पासवान र समाजवादी पार्टीको तर्फबाट रामपृत पासवान प्रतिस्पर्धामा छन् भने अल्पसंख्यक १ पदका लागि कांग्रेसबाट भोला पंजियार र राजपाबाट शेखरकुमार सिंहले उम्मेदवारी दिएका छन् ।

राष्ट्रिय सभामा रिक्त हुने १९ सिटमध्ये १८ जना बहुमतीय प्रणालीबाट चयन हुने निर्वाचन आयोगले जनाएको छ। १८ सिटका लागि विभिन्न दलका गरी ४५ जना उम्मेदवार छन्। एक सिटमा सरकारको सिफारिसमा राष्ट्रपतिले मनोनित गर्नेछन् । निर्वाचन हुने १८ पदमध्ये महिला समूहबाट सात, दलितबाट दुई, अपांग र अल्पसंख्यकबाट दुई र खुलातर्फ सात जना छन् ।

प्रकाशित मिति: बिहीबार, माघ ९, २०७६ १०:५०