पत्रकार कुटपिट गर्ने मेयरविरुद्ध किटानी जाहेरी दिइने

A+ A A-

जनकपुरधाम उपमहानगरपालिकामा पत्रकारहरूमाथि भएको कुटपिट घटनाको विरूद्ध नेपाल पत्रकार महासंघ धनुषाले जिल्ला प्रहरी कार्यालयमा किटानी जाहेरी दिने निर्णय गरेको छ । घटनाको दुई साता बित्दा पनि सम्बन्धित निकायले दोषीहरूलाई पक्राउ गरी कानुनी कारबाहीको प्रक्रिया अघि नबढाएपछि पत्रकारहरूले किटानी जाहेरी दिने निर्णय गरेका हुन् ।

मेयर लालकिशोर साहको निर्देशनमा पत्रकारहरूमाथि भएको दुव्र्यवहारको घटनाप्रति प्रमुख जिल्ला अधिकारी प्रदीपराज कणेलले सर्वदलीय बैठक बोलाइ समस्या समाधानका लागि पहलसमेत गरेका थिए । उनको रोहवरमा तत्काल सो समस्याको निराकरण गर्न राजनीतिक दल, पत्रकार महासंघ र जनकपुरधाम उपमहानगरबीच नाैबुँदे सहमतिसमेत भएको थियो ।

तर, सो सहमति कार्यान्वयन हुन नसकेको भन्दै पत्रकारहरूले संघर्ष समिति गठन गरी आन्दोलनका कार्यक्रम घोषणा गरिसकेका छन् । संघर्ष समितिको निर्णय बमोजिम मंगलबारदेखि पत्रकारहरूले हातमा कालोपट्टी बाँधेर काम गरिरहेका छन् ।

बुधबार बसेको संघर्ष समिति र वरिष्ठ पत्रकारहरूको बैठकले आन्दोलनलाई निरन्तरता दिँदै माघ १० गते उपमहानगरपालिकाका मेयर साहविरूद्ध किटानी जाहेरी दर्ता गराउने निर्णय गरेको हो । बैठकले उपमहानगरपालिकाले सीसीटीभीको भिडियो फुटेज डिलिट गर्नेलगायत प्रमाण मेटाउने काम गरेको आरोपसमेत लगाएको छ ।

त्यस्तै, महिलाहरूलाई प्रयोग गरी सामाजिक सञ्जाललगायत विभिन्न माध्यममा नियोजित रूपमा पत्रकारहरूको बदनाम गराउन खोजिएको भन्दै साइबर क्राइमको मुद्दा हाल्ने निर्णय गरिएको पनि संघर्ष समितिका संयोजक किरण कर्णले जानकारी दिएका छन् ।

ग्त २२ पुसमा जानकी मन्दिरको फुलबारीको जग्गा अतिक्रमणका विषयमा समाचार संकलन गर्न गएका कान्तिपुर टीभीका अमरकान्त ठाकुर, एपीवान टीभीका विकास साह, एबीसी टीभीका संवाददाता सुमित मिश्र र देशसञ्चारका राजा झा, उज्यालो नेटवर्कका पत्रकार सुभाष कर्णलगायतका पत्रकारहरूमाथि मेयर लालकिशोर साहका उपस्थितिमा कर्मचारीहरूले कुटपिट तथा दुर्व्यवहार गरेका थिए ।

मेयर साहमाथि जानकी मन्दिर फुलबारीको जग्गा अतिक्रमण गर्नका लागि ८५ लाख रूपैयाँ लिएको आरोप लागेको छ ।

प्रकाशित मिति: बुधबार, माघ ८, २०७६ १७:३९