चुरे दोहनमा सरकार नै अग्रसरः पूर्वराष्ट्रपति यादव

A+ A A-

अवैध खोला दोहनको विरोध गर्दा टिपरले किचेर हत्या गरिएका दिलीपकुमार महतोको १३औं दिनको पूण्यतिथिमा चुरे क्षेत्रमा वृक्षारोपण गरिएको छ । पूर्वराष्ट्रपति डा. रामवरण यादवको सहभागितामा वृक्षारोपण गरिएको हो ।

वृक्षरोपणपछि यादवले चुरे दोहनमा नीतिगत रूपमै सरकार अग्रसर देखिएको बताए । ‘जुनसुकै योजना निर्माण गर्दा पनि चुरे मासेरै गरिएको छ । क्रसर व्यवसायीले अवैध धन्दा चलाउँछन् । तर सरकारले नीतिगत रूपमै चुरे दोहन गरेको छ,’ उनले भने, ‘चुरे मासिँदै जाँदा तराई मरूभूमि बन्दैछ ।’

यादवले चुरे फँडानी तथा अवैध दोहनविरूद्ध सचेत युवा र तिनै तहका सरकारलाई आफ्नो दायित्व पूरा गर्न आग्रह गरे । सरकारले पटक–पटक विकासको नाममा जंगल मासेर राजमार्ग विस्तार गर्न लागेकोमा उनले आपत्तिसमेत जनाए । ‘सरकारले सुखी नेपाली, समृद्ध नेपालको नारा दिएको छ । तर, वन मासेर पानी तल जाँदै छ । पानी अभावले खेतीपाती कम भएको छ । उत्पादन घटेको छ, खानै पाएन भने कसरी सुखी हुन सकिन्छ ?’, उनले प्रश्न गरे ।

कार्यक्रममा कांग्रेस केन्द्रीय सदस्य एवं पूर्वमन्त्री महेन्द्र यादवले दिलीपको हत्याले समाजलाई ठूलो क्षति भएको बताउँदै सरकारले दोषीलाई हदैसम्म कारबाही गर्नुपर्ने बताए । यसैबीच पूर्वराष्ट्रपति डा. यादवले अवैध उत्खननविरूद्धका अभियन्ता स्व. दिलीप महतोको १३औं दिनको पूण्यतिथिको उपलक्ष्यमा उनको घर पुगेर श्रद्धाञ्जलीसमेत व्यक्त गरेका छन् । दिलीपको १३औं दिनको पुण्य तिथिको अवसरमा मिथिला नगरपालिका–५, विश्रामपुरको चुरे क्षेत्रमा बिरुवा रोपिएको हो ।

दिलीपको नाममा प्रतिस्ठान स्थापना

स्व. दिलीपको नाममा सहिद ओमप्रकाश पर्यावरण संरक्षण प्रतिस्ठान स्थापना गरिएको छ । प्रतिष्ठानको तदर्थ समितिको संयोजकमा संगम महतो रहेका छन् भने सदस्यहरूमा पशुपति महतो, लक्ष्मीकुमारी महतो, सुरेन्द्र महतो र वीरेन्द्र महतो छन् । त्यस्तै, सल्लाहकार परिषदमा प्रदेशसभा सदस्य रामअशिष यादव, सुरेश शर्मा, सोमप्रसाद शर्मा, राजकरण महतो र महेन्द्र महतोलगायत रहेका छन् ।

प्रकाशित मिति: बुधबार, माघ ८, २०७६ ०९:१६