चुनावको मुखमा बाहिरियो राजपाभित्रको असन्तुष्टि

A+ A A-

राष्ट्रिय जनता पार्टी नेपाल (राजपा)भित्रको असन्तुष्टि सार्वजनिक भएको छ । राजपा नेपालका ७ केन्द्रीय पदाधिकारीले पार्टी संयोजकलाई लिखित असन्तुष्टि पेस गरेका हुन् ।

राजपा र सत्तारुढ नेपाल कम्युनिस्ट पार्टी (नेकपा)ले गठबन्धन गरी राष्ट्रियसभाको चुनाव लडिरहेका बेला यस प्रकारको असन्तुष्टि सार्वजनिक भएको हो । राष्ट्रियसभाको निर्वाचन ९ माघमा रहेको छ ।

संघीय सरकारमा सहभागी हुने विषयमा पदाधिकारीहरूका बीचमा बृहत् छलफल गर्नुपर्ने असन्तुष्ट पदाधिकारीहरूले माग गरेका छन् ।

पार्टीका केन्द्रीय ७ पदाधिकारीले अध्यक्षमण्डलले गरेका एकलौटी निर्णय नमान्ने सङ्केत गरेका छन् । विज्ञप्तिमार्फत् असन्तुष्टि जनाउनेमा राजपाका वरिष्ठ उपाध्यक्षद्वय सर्वेन्द्रनाथ शुक्ल, वृशेषचन्द्र लाल, उपाध्यक्ष त्रेयगोविन्द चौधरी, रमेशप्रसाद यादव, सत्यनारायण मण्डल, महामन्त्रीद्वय डा. विजयकुमार सिंह र जितेन्द्र सिंह रहेका छन् ।

एउटा पत्र ५ जनाले तथा दुई नेताले छुट्टाछुट्टै पत्र अध्यक्षमण्डललाई पठाएका छन् । राजपा सरकारमा जाने चर्चा भइरहेको भन्दै पत्रमा भनिएको छ, ‘यसबीचमा भएका भेटघाटहरूका समाचारले यसको पुष्टि पनि गर्छ ।’

‘पार्टीमा छलफल नै नगर्ने तर बाहिरै मिलाएर मन्त्री बन्न लागेपछि आमकार्यकर्ताको प्रतिनिधित्व गर्दै हामीले विरोध गर्नुपरेको हो’, पत्रमा हस्ताक्षर गर्नेमध्येका एक उपाध्यक्षले भने, ‘चोर बाटोबाट निर्णय गर्न लागेको सूचना पाएका छौँ ।’

राष्ट्रियसभा निर्वाचन हुनुभन्दा २ दिनअघि यस प्रकारका विरोध गरेर असन्तुष्ट पक्षको पत्रले दबाब नै बनाएको विश्लेषकहरूको दाबी छ । अहिले प्रदेश २ मा राजपा र नेकपाका नेताहरू संयुक्त रूपले राष्ट्रियसभा निर्वाचनको प्रचारमा लागेका छन् ।

सरकार बनाउने स्थिति

राष्ट्रियसभा चुनावलाई लिएर नेकपा र राजपाको गठबन्धन भएपछि केपी ओली नेतृत्वको सरकारमा राजपाका केही नेताहरू पनि सहभागी हुने चर्चा चलिरहेको छ । राजपा अध्यक्षमण्डलका शीर्ष नेताहरूले यससम्बन्धमा केही नबोले पनि पार्टीकै दोस्रो तहका केही नेताहरूले समाजिक सञ्जालमा लेख्न थालेपछि सरकारमा जाने चर्चा सुरु भएको छ ।

केही नेताले सांसद रेशम चौधरीलगायतका नेताहरूमाथि लगाइएको मुद्दा खारेजी गरेपछि सरकारमा जाने सङ्केत गरेका छन् । उपसभामुख पनि राजपालाई दिने चर्चा रहेको छ ।

उपसभामुखका लागि भारत निकट मानिने सांसद चन्दा चौधरीको नाउँ चर्चामा रहेको छ । चौधरीका नजिकका व्यक्तिहरू अहिले लागिपरेका छन् ।

सरकारमा जाने कार्यलाई रोक्न समाजवादी पार्टीका अध्यक्ष उपेन्द्र यादवलगायतका नेताहरू राजपा–समाजवादी पार्टी एकताको चर्चा चलाउन थालेका छन् । समाजवादी पार्टीसँगको एकताका लागि राजपाको पहिलो शर्त थियो– सत्ता बहिर्गमन ।

कारण जेसुकै भए पनि समाजवादी पार्टी सरकारबाट बाहिरिसकेको छ । तर, समाजवादीले सरकार छाडेपछि भने राजपा नेताहरू नै सत्तामा गएपछि प्रदेश सरकार पनि हातबाट जाने यादवले खतरा देखिरहेका छन् ।

अध्यक्षमण्डलका सदस्यद्वय महन्थ ठाकुर र राजेन्द्र महतोको सल्लाहमा नै नेकपा र राजपालाई कसरी बढाउने सबै काम भइरहेको छ । पार्टीलाई कसरी अगाडि वढाउने सम्बन्धमा राष्ट्रियसभाको निर्वाचनपछि नै पत्ता खोलिने महतो निकटका एक प्रभावशाली नेताले बताए ।

प्रकाशित मिति: मंगलबार, माघ ७, २०७६ १९:५३