१३ प्रतिशतले घट्यो बाँकेमा लागुऔषधको घटना

A+ A A-

बाँके जिल्लामा लागुऔषध सेवन र कारोबारको घटना १३ प्रतिशतले घटेको छ ।

लागुऔषध नियन्त्रण ब्यूरो शाखा कार्यालय नेपालगञ्जका प्रमुख प्रहरी निरीक्षक वीरबहादुर थापाका अनुसार, प्रभावकारी सूचना संयन्त्र, चेकजाँचमा कडाइ, प्रहरी सक्रियता र ब्यूरो कार्यालयको स्थापनाका कारण यस वर्ष ती घटनामा कमी आएको हो ।

जिल्ला खुला सिमाना भएकाले भारत र नेपाल दुवैतर्फबाट लागुऔषध प्रयोगकर्ता र कारोबारी बढ्दै जान थालेपछि यसको रोकथामका लागि प्रहरीले संरचनागत व्यवस्थासहित आफ्नो सक्रियता बढाएको हो ।

खुला सिमानाका कारण भारतबाट ब्राउनसुगर, कोरेक्स, नाइट्रोजेपाम ट्याब्लेटलगायतका लागुऔषध नेपालमा भित्रिने र नेपालबाट गाँजा र चरेसलगायतको लागुऔषध भारतमा जाने गरेको जनाइएको छ ।

विशेषतः सीमा नाकामा दुवै मुलुकका प्रहरीले कडाइ गरेपछि अहिले लागुऔषधको कारोबार घटेको उनले बताए ।

जिल्लामा अहिले ठूलो परिमाणको काराेबार घटे पनि सानो परिमाणमा लागुऔषध ओसारपोसार भने भइरहेको प्रहरी निरीक्षक थापाले बताए ।

चालू आर्थिक वर्षको ६ महिनामा जिल्ला प्रहरी कार्यालयले १ सय ६३ जना लागुऔषध प्रयोगर्तालाई कारबाही गरेको छ । बाँके जिल्ला कारागारमा मात्र अहिले करीब २ सयभन्दा बढी कैदी लागुऔषध मुद्दाकै रहेको जनाइएको छ ।

लागुऔषधको कुलतमा फसेकाहरुको उपचारका लागि बाँकेमा सातवटा पुनःस्थापन केन्द्र खोलिएका छन् । लागुऔषधको क्षेत्रमा काम गर्ने संघसंस्थाका अनुसार जिल्लामा एक हजारभन्दा बढी लागुओषध प्रयोगकर्ता छन् ।

लागुऔषध प्रयोगकर्ताको पुनःस्थापना गरेर समस्या समाधान गर्नुपर्ने लागुऔषधविरुद्धका अभियन्ता अभिराज क्षत्रीको सुझाव छ ।

कानुनले लागुऔषधको सेवन र कारोबारलाई अपराध मानेको छ । लागुऔषध प्रयोगकर्ता तथा ओसारपसारकर्तालाई लागुऔषध परिमाणको कसुर हेरेर जन्मकैदसम्मको सजायको व्यवस्था गरेको अधिवक्ता वसन्त गौतमले बताए । रासस

प्रकाशित मिति: मंगलबार, माघ ७, २०७६ १६:३७