एमसीसी नेपालको हितमा छ, संसदबाट पास हुन्छ : मन्त्री ढकाल

A+ A A-

संघीय सरकारका स्वास्थ्य तथा जनसङ्ख्यामन्त्री एवम् कानुन, न्याय तथा संसदीय व्यवस्थामन्त्री भानुभक्त ढकालले अमेरिकाको मिलेनियम च्यालेन्ज कर्पोरेसन (एमसीसी) नेपालको हितमा भएको बताएका छन् ।

हातहतिहार, बारुद र कुनै सशस्त्र बलसँग यसको कुनै सम्बन्ध नभएको र विकास परियोजना भएकाले यो नेपालको हितमा नै हुने उनको भनाइ छ ।

मङ्गलबार प्रेस सङ्गठन नेपाल, डडेल्धुरा शाखाले गरेको पत्रकार सम्मेलनमा मन्त्री ढकालले यस्तो बताएका हुन् । ‘यस विषयले संसदमा प्रवेश पाएपछि बहस, छलफल हुन्छ । अहिले नगरेर पछि पछुताउनु भन्दा त अहिले त्यो परियोजना कार्यान्वयनमा लैजानुपर्छ’, उनले भने, ‘मलाई लाग्छ, संसदले सहजै अनुमोदन गर्छ ।’

‘घरमा लोग्ने–स्वास्नीबीच त विवाद हुन्छ । पार्टीभित्र पनि विवाद हुनु सामान्य कुरा हो । हरेक विषयमा नेकपामा विवाद छ भनेर धेरै मान्छे बेलुका आनन्दले सुत्छन् । भोलिपल्ट हाम्रा नेताहरूले सर्वसम्मत निर्णय गर्दा झस्किन्छन्’, उनले भने ।

कतिपय कुराहरू फजुल हुन् भनेर कतिचोटि प्रमाणित गरिसकेका र पार्टी एकता हुँदैन भनेर सन्तुष्टि लिने मानिसहरू पनि धेरै भएका त एकता गरेरै छोडिएको उनको भनाइ थियो ।

‘सरकारै बन्दैन भन्थे, बाहिरबाट समर्थन चाहिन्छ भन्थे, एउटै गरेर बनाइयो’, उनले भने, ‘लोग्ने र स्वास्नीमा भएका सामान्य विवाद त छलफल गर्नुपर्छ, यस्तो ठूलो पार्टीमा असन्तृष्टि आउनु स्वाभाविक हो । चिन्तनहरू आउँछन् । पार्टीमा छलफल गरेर अगाडि बढ्नुपर्छ ।’

प्रतिपक्ष नेपाली कांग्रेसलाई लक्षित गर्दै उनले भने, ‘नेकपाको एकता देखेर छटपटाहटमा छन् । विचराहरूप्रति सहानुभूुति राख्न सकिन्छ । पद, अवसर नपाएर हाम्रा कार्यकर्तामा बेलाबेलामा जुन कुण्ठाहरू व्यक्त हुन्छन् । त्यसले हाम्रा कार्यकर्ता भन्दा विपक्षीहरूलाई बाँच्नका लागि राहात मिलेको छ ।’

‘डडेल्धुराका अस्पताल व्यवस्थापन समितिले पूर्णता पाउँछ’

डडेल्धुराका अस्पतालको व्यवस्थापन समिति रिक्त रहेकाले चाँडोभन्दा चाँडो पूर्णता पाउने मन्त्री ढकालले बताए । अहिले धेरै अस्पतालका व्यवस्थापन समिति सरकारले एकमुस्ठ खारेज गरेकाले डडेल्धुराका अस्पताल व्यवस्थापन समिति रिक्त रहेको उनको भनाइ थियो ।

‘खारेज गरिसकेपछि औचित्यका आधारमा धेरै ठाउँमा खारेज गर्नुहुँदैन भनेर सम्बन्धित मन्त्रालयले लेखेर पठाएका समितिहरू कायम रहे तर डडेल्धुरा अस्पताल डडेल्धुरामा परेन’, उनले भने, ‘अहिले संघको अस्पताल भएकाले आफू मन्त्री भएर आइसकेपछि केन्द्रमा नै केन्द्रीय समिति बनाएर त्यसको माध्यमबाट हेर्ने व्यवस्था मिलाउने कि भनेर अहिले छलफलमा रहेको छु ।’

सम्बन्धित ठाउँको जनताको प्रतिनिधित्व हुनेगरी व्यवस्थापन समिति राख्नुपर्छ भन्ने आफ्नो मान्यता रहेको उनले बताए । समितिहरूले वैधता प्राप्ति गर्नका लागि सरकारबाट गठन आदेशको माध्यमबाट त्यसले पूर्णता पाउने उनको भनाइ छ ।

‘अहिले आन्तरिक छलफलबाट मन्त्री परिषद्मा लैजाने तयारीको नजिक नजिक पुगेका छौँ । त्यसैले यहाँको व्यवस्थापन समितिले चाँडोभन्दा चाँडो पूर्णता पाउँछ’, उनले भने ।

डडेल्धुरा अस्पताल डडेल्धुरामा डाक्टर नहुँदा भएको समस्यालाई मध्यनजर गर्दे दरबन्दीअनुसारका चिकित्सक पदपूर्तिका लागि लागिपरेको उनले बताए ।

सयमा सय कहिले हुन्छ भन्ने घोषणा गर्न नसके पनि हिजोभन्दा आज सुधार उन्मुख छ । क्रमशः माथिमाथि लैजाँदै यसलाई पूर्ण रूपमा कार्यान्वयन गर्ने मन्त्रालयबाट पहल गर्ने र प्रतिबद्धताका साथ काम गर्ने उनको भनाइ छ ।

छाउपडी प्रथाले स्वास्थ्य सूचकाङ्क घट्यो

अन्य प्रदेशभन्दा सुदूरपश्चिम प्रदेशमा छाउपडी प्रथा बढी मात्रामा भएकाले सुदूरपश्चिमको स्वास्थ्य सूचकाङ्कमा प्रभाव पारेको मन्त्री ढकालले बताए । छिमेकी राष्ट्र भारतमा कलिलै उमेरमा काम गर्न जाने, केटाकेटीमै विवाह गर्ने भएकाले सुदूरपश्चिममा स्वास्थ्य सूचकाङ्कमा कमी आएको उनको भनाइ छ ।

‘यहाँका सक्षम व्यक्तिहरू बाहिर जाने गरेका कारणले पनि घटेको हुन सक्छ । यस विषयमा म अध्ययन गरेर तपाईंकोमा आएको छैन’, उनले भने, ‘सुदूरपश्चिममै यस्तो अवस्था हो भने यसलाई कसरी बढाउन सकिन्छ भनेर अध्ययन गरेर यस क्षेत्रमा लाग्न जरुरी छ ।’

नागरिक समाजले बुझायो ज्ञापनपत्र

नागरिक समाज डडेल्धुराले मन्त्री ढकाललाई ३ बुँदे ज्ञापनपत्र बुझाएको छ । ७ पहाडी जिल्लाको केन्द्रमा रहेको डडेल्धुरा अस्पतालको स्तरोन्नतिका लागि प्रदेश तथा केन्द्र सरकारले निर्णय गरेअनुरूप कार्यान्वयनका लागि पहल गनुपर्ने भन्दै ज्ञापनपत्र बुझाएको नागरिक समाज डडेल्धुराका संयोजक रमेश जोशीले बताए ।

सरकारलाई पटक पटक ज्ञापनपत्र पेस गरे पनि राज्य पक्षबाट आवश्यक पहल नभएकामा खेद प्रकट गर्दे ज्ञापन त्र बुझाएको उनको भनाइ छ ।

यी हुन् ३ बुँदे माग

१. सुदूरपश्चिमको ७ पहाडी जिल्लाको १ मात्र भरपर्दो स्वास्थ्य संस्था डडेल्धुरा अस्पतालमा दरबन्दीअनुसार चिकित्सक तथा कर्मचारीको आवश्यक उपकरणको यथाशीघ्र व्यवस्थापनका लागि जोडदार माग गर्दछौँ ।

२. सुदूरपश्चिमको ७ पहाडी जिल्लाको केन्द्र डडेल्धुरामा रहेको डडेल्धुरा अस्पताललाई मेडिकल कलेजको रूपमा विकास र विस्तार गरी सुदूरपश्चिमवासीलाई सहज र सुलभ स्वास्थ्य सुविधा प्रदान गर्नेगरी जनताको मौलिक अभिकार सुनिश्चित गरियोस् ।

३. डडेल्धुरा जिल्लाको भौगोलिक विकटतामा रहेको परशुराम नगरपालिकास्थित जोगबुढा अस्पताल जोगबुढामा आवश्यक चिकित्सक, स्वास्थ्यकर्मी तथा उपकरणको अभाव रहेकाले तत्काल व्यवस्था गरियोस् ।

प्रकाशित मिति: मंगलबार, माघ ७, २०७६ १५:४६