टर्च बालेर मध्यरातमा पनि मूर्ति बनाउँदै जनकपुरका मूर्तिकार

A+ A A-

जनकुपुरधामका लक्ष्मी पण्डितलाई खाना खान पनि फुर्सद छैन । उनलाई सोध्ने वा ढोकभेट गर्ने सबैलाई आँखाकै इशारामा जवाफ फर्काउँछन् । देवीदेवताका मूर्ति बनाउने पण्डित जति बेला पनि काम गरिरहेकै हुन्छन् ।

यति धेरै ब्यस्त हुन्छन् कि उनी रातिको खाना खाइसकेपछि पनि मध्यरातमा टर्च बालेर मूर्ति बनाउने काममै खटिन्छन् । सरस्वती पूजा नजिकै आउँदै छ । यस पूजाका लागि मूर्तिको बढी माग हुन्छ ।

‘एक दिनमा ५०/६० मूर्तिको अर्डर आउँछ’ उनले भने । तत्काल उनले ५० वटा मूर्ति बनाउनुपर्ने बताए । ‘मूर्ति बनाउन निकै दुःख छ । तर, केही दिनभित्रै ५० वटा बनाएर दिनुपर्छ । त्यसैले रातदिन नभनी काम गरेको छु’, पण्डितले थपे ।

सरस्वती पूजा नजिकिँदै गर्दा जनकपुरमा मूर्तिको कारोबार ह्वात्तै बढेको छ । हिजोआज जनकपुरका अधिकांश चोक तथा चौराहमा मूर्ति बनाउनेहरू देखिन्छन् । मूर्तिकारहरूका अनुसार सरस्वती पूजा र विश्वकर्मा पूजामा मूर्तिको मागसँगै कमाइ पनि बढी हुने गर्छ ।

सरस्वती पूजामा मात्रै १ लाखभन्दा बढी कमाइ हुने गरेको मूर्तिकारहरू बताउँछन् । जनकपुरमा सरस्वती पूजाको समयमा मात्र १ हजारभन्दा बढी मूर्तिको कारोबार हुन्छ । यसपालि धेरै मूर्तिकारहरू रोजगारीका लागि खाडी मुलुक गइसकेकाले मूर्तिको माग पूर्ति गर्न भारतबाट पनि केही मूर्तिकारहरू जनकपुर आएको मूर्तिकार श्यामकुमार पण्डितले बताए ।

गत वर्षभन्दा यस वर्ष प्रत्येक मूर्तिमा २ सयदेखि ३ सय रुपैयाँ बढेको छ । मूर्तिकार पञ्चा पण्डितले मिहिनेत, मूर्तिको गुणस्तरीयता हेरेर मूल्य लिने गरेको बताए । थोरै मूर्तिकार भएको र माग धेरै भएकाले रातिसम्म काम गर्नुपरेको उनले बताए ।

मूर्ति बनाउने कालिगढ थोरै हुँदा अग्रिम रकम लिएपछि मात्र मूर्ति बनाउन थालेका छन् । पहिले आफैं बनाउँदा घाटामा गएकाले हाल मागका आधारमा मात्रै बनाउन थालेको उनी बताउँछन् । उनीहरूको सालभरिको कमाइ हुने यही समय हो ।

प्रकाशित मिति: मंगलबार, माघ ७, २०७६ १३:१८