भारतीय प्रधानमन्त्री मोदी नेपाल आउने

A+ A A-

भारतीय प्रधानमन्त्री नरेन्द्र मोदीले यसै वर्ष नेपाल आउने बताएका छन् । विराटनगरमा निर्माण सम्पन्न भएको नेपाल–भारत एकीकृत जाँच चौकीको संयुक्त उद्घाटनमा सम्बोधन गर्ने क्रममा मोदीले नेपाल भ्रमणमा यसै वर्ष आउने तयारी गरिरहेको बताए । नेपालका प्रधानमन्त्री केपी शर्मा ओली र भारतीय प्रधानमन्त्री मोदीले संयुक्त रूपमा जाँचचौकी उद्घाटन गरेका हुन् ।

यसअघि २०१८ मा वीरगन्जमा निर्माण भएको जाँचचौकी उद्घाटन गरिएको थियो । सम्बोधनमा मोदीले भने, ‘मलाई नेपाल र नेपाली नागरिकको मायाले पछ्याइरहेको छ । यसै वर्ष आउने पक्का गरेको छु । नेपाली नागरिकको दर्शन गर्न आतुर छु । पक्कै पनि नेपाली दाजुभाइसँग समय बिताउन आउनेछु ।’

यस्तै, उनले नयाँ वर्ष २०२० को शुभकामना दिँदै यो नयाँ वर्ष मात्रै नभएर नयाँ युगको सुरुवात भएको पनि बताए । ‘नयाँ वर्ष मात्र होइन, नेपाल–भारत सम्बन्धबीचको नयाँ युग पनि सुरु भएको छ । हामी दुईबीचको सम्बन्धमा यो युग स्वर्णिम युगका रूपमा स्थापित हुनेछ,’ उनले भने, ‘हामी छिमेकी मात्र होइनौं, भाषा, संस्कृति र परिवारको पनि सम्बन्ध छ ।’

सम्बोधनका क्रममा मोदीले मेरा प्यारा नेपाली दाजुभाइ भन्दै अघि भने, ‘२०१५ को भूकम्पले नेपालमा त्रासदिपूर्ण अवस्था सिर्जना गर्‍यो । मेरा प्यारा नेपाली दाजुभाइले त्यो त्रासदीपूर्ण अवस्थाको डटेर सामना गर्नुभयो । हामीले पनि गाेरखा र नुवाकोट जिल्लाका घर पुनर्निर्माणमा सहयोग गर्‍यौं । हाम्रो सहयोगमा ४५ घर पुनर्निर्माण भइसकेका छन् । बाँकी ५ हजार पनि छिट्टै पुनर्निर्माण हुनेछन् भन्ने आशा लिएको छु ।’

मोदीले भारतले क्रस बोर्डर कनेक्टिभिटीलाई प्राथमिकता दिएको बताए । क्रस बोर्डर कनेक्टिभिटीबाटै नेपाल–भारतबीच विकास र सुमृद्धिमा आपसी सहयोग भएको भन्दै उनले आगामी दिनमा पनि अन्य जाँच चौकी निर्माण गर्ने जानकारी दिए ।

नेपालका प्रधानमन्त्री केपी शर्मा ओलीले भारत र नेपालबीच छिमेकीको मात्र सम्बन्ध नभएको बताए । उनले दुई देशबीच सदियौंदेखि आपसी सम्बन्ध भएको भन्दै पूर्वाधार विकासमा एकअर्काको सहयोग अपरिहार्य भएको बताए । प्रधानमन्त्री ओलीले भारतीय प्रधानमन्त्री मोदीलाई नेपाल भ्रमण वर्षको अवसरमा नेपाल आउन निम्तो पनि दिए ।

ओलीले भारतसँग संस्कृति, इतिहास, परिवार, भाषा र संस्कारको सम्बन्ध भएकाले यस्ता संयुक्त कार्यक्रमले दुई देशबीचको सम्बन्ध थप उचाइमा पुग्दै गएको बताए । कार्यक्रमकाे अन्त्यमा भारतीय प्रधानमन्त्री मोदीले नेपालीमा बोल्दै भने, ‘तपाईंहरू सबैलाई धेरैलाई शुभकामना दिन्छु, फेरि भेट होला नमस्कार ।’

प्रकाशित मिति: मंगलबार, माघ ७, २०७६ ११:५७