उपसभामुख कांग्रेसलाई दिन प्रचण्ड सहमतः रामचन्द्र पौडेल

A+ A A-

नेपाल कम्युनिस्ट पार्टी (नेकपा) का कार्यकारी अध्यक्ष पुष्पकमल दाहाल (प्रचण्ड) र नेपाली कांग्रेसका वरिष्ठ नेता रामचन्द्र पौडेलबीच भेटवार्ता भएको छ ।

मंगलबार बिहान प्रचण्ड निवास खुमलटारमा दुई नेताबीच भेटवार्ता भएको हो । भेटवार्तामा उपसभामुख निर्वाचनका विषयमा कुरा भएको पौडलेले शिलापत्रसँग बताए ।

पौडेलले भने, ‘म र प्रचण्डजीबीच भेटवार्ता भएको हो । भेटवार्तामा उपसभामुखका बारेमा कुरा भएको छ । मैले उपसभामुख नेपाली कांग्रेसलाई दिन प्रस्ताव गरें । उहाँले मेरो प्रस्ताव सकारात्मक रूपमा लिनुभएको छ । उहाँले उपसभामुख कांग्रेसलाई दिँदा आफूलाई कुनै समस्या नहुने बताउनुभयो ।’

सत्तारुढ दल नेपाल कम्युनिस्ट पार्टी (नेकपा) ले आइतबार सचिवालयको बैठकबाट अग्नि सापकोटालाई सभामुखको उम्मेदवार बनाउने निर्णय गरेको थियो । लामो रस्साकस्सीका बीच सभामुख टुङ्गो लगाए पनि उपसभामुख कसलाई बनाउने भन्ने टुंगो लागेको छैन ।

केही दिनपहिला सत्तारुढ दल र राजपाबीच प्रदेश–२ मा दुवै दलका उम्मेदवारलाई राष्ट्रियसभामा जिताउने सहमति भएको छ । यो सहमति अगाडि बढे राजपालाई सरकारमा ल्याउने तयारी नेकपाले गरेको छ । उपसभामुख राजपालाई दिएर सरकारमा ल्याउने तयारी गरेको छ ।

तर प्रतिपक्षी दल नेपाली कांग्रेस उपसभामुख आफूलाई दिए सभामुखमा उम्मेदवारी नदिने बताउँदै आएको छ । आज भएको भेटमा पनि उपसभामुख नेपाली कांग्रेसले मागेको पौडेलले बताए ।

आजको भेटमा संक्रमणकालीन कानुनका बारेमा पनि कुरा भएको पौडेलले बताए । उनले भने, ‘सत्य निरुपण तथा मेलमिलाप र बेपत्ता आयोगका बारेमा कुरा भयो । यी सबै विषयलाई अन्तर्राष्ट्रिय समुदायलाई साथमा लिएर अब टुंग्याउनुपर्छ भन्ने विषयमा सहमत भयौं । यो विषय पनि अब छिट्टै टुंगिन्छन् ।’

यदि प्रचण्डले भनेको नेकपाले मानेमा उपसभामुख नेपाली कांग्रेसले पाउनेछ ।