उम्मेदवारी खारेजीको माग गर्दै कांग्रेसले दियो उजुरी

A+ A A-

नेपाल कम्युनिस्ट पार्टी (नेकपा) र राष्ट्रिय जनता पार्टी (राजपा)का तर्फबाट अल्पसंख्यकमा संयुक्तका उम्मेदवार शेखरप्रसाद सिंहको उम्मेदवारी खारेजीको माग गर्दै निर्वाचन आयोगमा उजुरी परेको छ ।

बिहीबार हुने राष्ट्रियसभा सदस्य निर्वाचनमा नेकपा–राजपाको तर्फबाट अल्पसंख्यकमा संयुक्त उम्मेदवार सिंहले कैद भुक्तान नगरेको भन्दै उनको उम्मेदवारी खारेजीको माग गरिएको हो ।

कांग्रेस जनकपुरले कैद भुक्तान नगरेका व्यक्तिलाई उम्मेदवार बनाएको भन्दै सोमबार जिल्ला निर्वाचन कार्यालयमा उजुरी दिएको हो । सप्तरीको कोइलाडी गाउँपालिका–४ का सिंहविरुद्ध २०४४ असार ३० गते कुटपिट तथा अंगभंग मुद्दामा जिल्ला अदालतबाट दुई वर्ष कैद सजाय तोकिएको थियो ।

सर्वोच्च अदालतको पूर्ण इजलासले २०५६ पुस १ गते पुनरावेदनको हिस्सा नहुने अन्तिम आदेश गरेको थियो । कांग्रेसका तर्फबाट अल्पसंख्यक कोटाबाट उम्मेदवारी दिएका भोला पञ्जियारले सिंहको उम्मेदवारी खारेजी माग गरेका हुन् ।

राजपाको तर्फबाट उम्मेदवारी दिएका सिंहले कुटपिट मुद्दामा उनीसहितकाले दुई वर्ष कैद र जरिवानाकाे सजाय सप्तरी जिल्ला अदालतबाट पाएकाले उनी राष्ट्रियसभा सदस्यको उम्मेदवार हुन अयोग्य देखिएको कांग्रेसको दाबी छ । राष्ट्रियसभा सदस्य निर्वाचन ऐन २०७५ को दफा १३ बमोजिम उजुरी निवेदन दिएको पञ्जियारले बताए ।

अदालतबाट फौजदारी कसुरमा दोषी ठहर भइसकेका सिंहले सर्वोच्च अदालतको फैसलासमेत अटेर गर्दै कैद भुक्तान गरेका छैनन् । ‘राज्यले अपराधी घोषित गरिसकेको व्यक्तिलाई राज्यको सर्वोच्च अंगमा उम्मेदवार हुन पाउने अधिकार समेत हुँदैन’, उनले भने ।

उजुरीपछि के हुने भन्नेबारे आज निर्णय हुने भएको छ । उजुरीको विषयमा निर्वाचन अधिकृत राजुकुमार खतिवडाले उम्मेदवारको पक्ष बुझेर आज यस सम्बन्धमा निर्णय गर्ने बताएका छन । उम्मेदवार सिंहमाथि लागेको आरोपको विषयमा जिल्ला अदालत सप्तरीले पुनरावेदन अदालत राजविराजलाई २०५५ असार ११ गते कैद जरिवानाको लगत कट्टा भइसकेको पत्र पठाएको थियो ।

‘वादी सिंह तथा विपक्षी चित्रा पन्त समेत भएको सा.दे.न. ३८६६ को लिखत दर्ता बदर मुद्दाबाट देखिएको २०४७ ।०३।०७ गतेमा सिंह समेतलाई सगरमाथा अञ्चल अदालत राजविराज बेञ्चको फैसलाले लागेको कैद दिन ९ र जरिवाना ६ रुपैयाँ यस अदालतमा नकाटिएको सन्दर्भमा सम्बन्धित कुटपिट मुद्दाको सक्कल मिसिल सर्वोच्च अदालतमा गइसकेकाले सो कैद लागे नलागेको बारेमा सर्वोच्च अदालतमा जवाफ मगाउन सोधी पठाएको र वादी देवनारायण चौधरी प्रतिवादी सिंह भएको कुटपिट मुद्दामा यस अदालतमा कसिएको लगतबाट देखिएको सप्तरी अदालतको फैसलाले लागेको कैद २०५५।०२।१५ मा बसेको समितिको निर्णयले लगत कट्टा भएको हुँदा सोहीअनुसार जवाफ पठाइएको छ’, पत्रमा लेखिएको छ ।

सिंहले भने मतदाता भ्रमित पार्न सल्टिसकेको केस बाहिर ल्याएको आरोप लगाएका छन् । आफूमाथि तोकिएको कैद र जरिमानाको लगतकट्टाको प्रतिलिपि सुरक्षित राखिएको दाबी गरे ।

प्रकाशित मिति: मंगलबार, माघ ७, २०७६ ११:०१