कैलालीमा क्षयरोग उपचार तथा अनुसन्धान केन्द्र सञ्चालनमा

A+ A A-

कैलालीमा क्षयरोग उपचार प्रेषण तथा अनुसन्धान केन्द्र सञ्चालनमा आएको छ । बेल्जियमकी राजकुमारी एस्ट्रिड र स्वास्थ्य तथा जनसंख्यामन्त्री भानुभक्त ढकालले लक्ष्मीनारायण क्षयरोग उपचार तथा अनुसन्धान केन्द्रको संयुक्त रूपमा उद्घाटन गरेका हुन् ।

गोदावरी नगरपालिका– ६, श्रीपुरमा सञ्चालनमा ल्याइएको सो केन्द्रमा दामियन फाउन्डेसनको आर्थिक तथा प्राविधिक सहयोग रहेको छ भने मानव संशाधन विकास प्रतिष्ठानकोे भौतिक पूर्वाधारमा सहयोग रहेको प्रदेश स्वास्थ्य निर्देशनालय दिपायलले जनाएको छ ।

राजकुमारी नै मानार्थ रहेको डेमिन फाउन्डेसन नामको एक गैरसरकारी संस्था र स्वास्थ्य निर्देशनालय र स्थानीय संघसस्थाको सहयोगमा निर्माण गरिएको केन्द्रमा जटिल प्रकारका क्षयरोगीको उपचार गरिनेछ । प्रदेशस्तरीय क्षयरोग उपचार तथा अनुसन्धान केन्द्र स्थापना भएपछि क्षयरोगका बिरामीलाई उपचारका लागि सहज हुने विश्वास गरिएको छ ।

नौ वर्षअगाडि सो स्थानमा धनगढी इन्टरनेसलन कलेज निर्माण गर्ने योजना अगाडि बढाइएको थियो। मानव संशाधन प्रतिष्ठान धनगढीले महायज्ञको आयोजना गर्दै कलेज स्थापना गर्ने भनेर स्थानीयबाट १ करोड ८० लाख संकलन गरेको थियो ।

तर सो स्थानमा कलेज स्थापना हुन नसकेपछि क्षयरोग उपचार तथा अनुसन्धान केन्द्र स्थापना गरिएको हो । कैलालीको श्रीपुरमा निर्माण गरिएको लक्ष्मीनारायण क्षयरोग प्रेषण केन्द्रको उद्घाटन गर्दै मन्त्री ढकालले अन्य ठाउँको तुलनामा सुदूरपश्चिममा स्वास्थ्य समस्या बढी भएकाले यस क्षेत्रमा राज्यले विशेष ध्यान दिने बताए ।

उनले यस क्षेत्रमा चिकित्सकको अभाव सामाधानका लागि पनि आफूले पहल गर्ने बताए । आजको भोलि चिकित्सकको अभाव पूर्ति नभए पनि परिणाममा देखिने गरी मन्त्रालयले काम गर्ने उनले बताए ।

प्रकाशित मिति: सोमबार, माघ ६, २०७६ १९:१२