सुदूरपश्चिम प्रदेशसभा अधिवेशनः सरकारविरुद्ध कड्किए सांसद

A+ A A-

सुदूरपश्चिम प्रदेशसभाको हिउँदे अधिवेशन आजबाट सुरु भएको छ । वर्षे अर्थात् बजेट अधिवेशन सकिएको झण्डैं पाँच महिनापछि बसेको अधिवेशनको पहिलो बैठकमा प्रदेशसभामा प्रतिनिधित्व गर्ने तीन दलका शीर्ष नेताहरूले शुभकामनासहित समसामयिक विषयमा सरकारको ध्यानाकर्षण गराएका छन् ।

बैठकको सुरुवातमै सत्तारुढ दल नेपाल कम्युनिस्ट पार्टी (नेकपा)का प्रमुख सचेतक तारा लामा तामाङले सरकारलाई जनभावनाअनुरूप तीव्र गतिमा काम गर्न सुझाए ।

प्रदेश सरकारले गरेको राजधानी तोक्ने निर्णयको कार्यान्वयनजस्ता महत्त्वपूर्ण विषयमा सरकारको ध्यानाकर्षण गराउँदै उनले कानुन कार्यान्वयन र छाउपडी प्रथाको अन्त्यका लागि समेत सरकार तदारुकताका साथ अघि बढ्नुपर्नेमा जोड दिए ।

कांग्रेस संसदीय दलका नेता डा. रणबहादुर रावलले प्रदेश सरकारका केही मन्त्री विनालगामको घोडाजस्तै भएको आरोप लगाए । उनले भने, ‘आर्थिक प्रलोभनले सरकारका मन्त्रीले नै मनपरी गर्न थालेका छन् । मुख्यमन्त्री अब धेरै शालीन भएर बसिरहने हो भने प्रदेश सरकार नरहन सक्छ ।’

दुई वर्षसम्म सरकार असफल रहेको जिकिर गर्दै उनले सामाजिक विकास मन्त्रालय र भूमि, व्यवस्था, कृषि तथा सहकारी मन्त्रालयमा मनपरी भइरहेको प्रतिपक्षको ठहर रहेको बताए ।

अर्को प्रतिपक्षी दल राष्ट्रिय जनता पार्टी राजपाका सांसद मालामती कुमारी रानाले समेत सरकार भ्रष्टाचारमा अघि बढेको र कानुन कार्यान्वयनमा फितलो बनेको आरोप लगाइन् ।

वर्र्षेे अर्थात् बजेट अधिवेशन सकिएको झन्डै पाँच महिनापछि सुदूरपश्चिम प्रदेशसभाको हिउँदे अर्थात् पाँचौं अधिवेशन सुरु भएको हो । प्रदेशसभाको अर्को बैठक मंगलबार दिउँसो १२ः१५ बजे आह्वान गरिएको छ । सो दिन प्रदेशसभा स्थापना भएको अवसरमा ‘प्रदेशसभा दिवस’ मनाउनेसमेत सचिवालयले तयारी गरेको छ ।

प्रकाशित मिति: सोमबार, माघ ६, २०७६ १८:११