नेकपाको सभामुख भएपछि उपसभामुख को ?

A+ A A-

लामो शक्ति संघर्षपछि संसदले सभामुखको उम्मेदवार पाएको छ । आइतबार बसेको नेपाल कम्युनिस्ट पार्टी (नेकपा) को सचिवालय बैठकले सभामुखको उम्मेदवारमा आफ्नो दलका सांसद अग्नि सापकोटालाई घोषणा गरेको छ ।

सभामुखको टुंगो लागेसँगै उपसभामुखको खोजी हुन थालेको छ । संविधानमा सभामुख र उपसभामुख एउटै दलबाट हुन नपाउने व्यवस्था हुँदा नेकपाले उपसभामुख अर्को दललाई दिनुपर्ने हुन्छ । तर, नेकपाले कसलाई दिने भन्ने अहिलेसम्म टुंंगो लगाएको छैन ।

प्रदेश–२ मा राजपासँग नेकपाले केही दिनपहिला राष्ट्रियसभाको निर्वाचनमा गठबन्धन गरेको छ । यसलाई निरन्तरता दिने राजनीतिक चर्चा चल्न थालेको छ ।

मधेसी दललाई उपसभामुख दिने सम्भावना बढी रहेको नेकपाका स्थायी कमिटी सदस्य देवेन्द्र पौडेलले बताए । उनले भने, ‘सम्भवत: उपसभामुख राजपालाई दिन्छन् कि । यसबारेमा छलफल हुँदै छ । निर्णय भएको छैन ।’

भर्खरै प्रदेश–२ मा राष्ट्रियसभाको निर्वाचनमा नेकपासँग मिलेर जाने सहमति गरेको राजपाले आफूले उपसभामुख पाए स्वीकार्ने बताएको छ ।

अध्यक्ष मण्डलका सदस्य राजेन्द्र महतोले आफूहरूलाई यसबारे कुनै आधिकारिक जानकारी नआएको तर आएमा उपसभामुखको पद स्वीकार्ने बताए ।

उता, प्रमुख प्रतिपक्ष दल नेपाली कांग्रेसले पनि आफूलाई उपसभामुख दिएमा सभामुखमा समर्थन गर्ने बताएको छ । कांग्रेस प्रवक्ता विश्वप्रकाश शर्माले आफूहरूलाई उपसभामुख दिए सभामुखमा सघाउने बताए ।

उनले भने, ‘यदि उपसभामुख नेपाली कांग्रेसलाई दिएमा सभामुखमा उम्मेदवार नदिने बताए ।’

तर नेकपाले त्यो सत्तारुढ दल नेकपाले सहज रूपमा स्वीकार्ने देखिँदैन । उसले संविधानमा भएको व्यवस्थाअनुसार उपसभामुख अन्य दललाई दिए पनि प्रमुख प्रतिपक्ष दललाई दिने सम्भावना भने कम रहेको छ ।

महतोले भने, ‘आफूलाई अहिलेसम्म कुनै आधिकारिक जानकारी आएको छैन । यदि राजपालाई उपसभामुख दिए सहज रूपमा स्वीकारेर उपसभामुखमा उम्मेदवारी दिनेछौं ।’

सभामुखको निर्वाचनपछि उपसभामुखको निर्वाचन हुनेछ । धेरै लामो रस्साकस्सीपछि नेकपाले सभामुखको उम्मेदवारको टुंगो लगाएको छ । यससँगै अब उपसभामुखको खोजी सुरु भएको छ ।

यदि राजपाले उपसभामुखको उम्मेदवार पाएमा चन्द्रा चौधरी हुने सम्भावना रहेको बताइन्छ । तर, महतोले अहिले नै आफ्नो पार्टीले कुनै व्यक्तिलाई उपसभामुखको उम्मेदवार बनाई नसकेको बताए ।

संविधानमा नै फरक दल र फरक लिंगको व्यक्ति सभामुख र उपसभामुख हुने व्यवस्था छ । यदि नेकपाले राजपालाई उपसभामुख दिएमा चौधरी उपसभामुख हुने सम्भावना धेरै छ ।

प्रकाशित मिति: सोमबार, माघ ६, २०७६ १२:२९