लमजुङमा २३ अर्बभन्दा बढी लगानीका पाँच जलविद्युत् आयोजना निर्माणाधीन

A+ A A-

लमजुङ जिल्लामा २३ अर्ब रुपैयाँभन्दा बढी लगानीमा पाँच जलविद्युत् आयोजना निर्माणाधीन अवस्थामा छन् । दोस्रो ठूलो दोर्दीखोला तथा दोर्दी काेरिडाेरमा विभिन्न पाँच जलविद्युत् आयोजना धमाधम निर्माण भइरहेका हुन् ।

पिपुल्स हाइड्रोपावर कम्पनीद्वारा ५४ मेगावाटको सुपर दोर्दी ‘ख’, हिमालयन पावर पार्टनरको २७ मेगावाटको दोर्दीखोला, लिबर्टी इनर्जी लिमिटेडको २५ मेगावाटको माथिल्लो दोर्दी ‘ए’ जलविद्युत आयोजना निर्माणाधीन छन् ।

त्यस्तै, दोर्दीखोला जलविद्युत् कम्पनीले १२.१ मेगावाटको दोर्दी–१, छ्याङ्दी खोला हाइड्रोपावर कम्पनीको ४ मेगावाट क्षमताको जलविद्युत् आयोजना दोर्दी काेरिडाेरमा निर्माणाधीन छन् ।

तीमध्ये अधिकांशको ५५ देखि ९० प्रतिशत निर्माण कार्य सम्पन्न भइसकेको छ । त्यस्तै, दोर्दी काेरिडाेरमै रहेको छ्याङ्दी खोलामा यसअघि दुई मेगावाटको छ्याङ्दी जलविद्युत् आयोजना निर्माण सम्पन्न भइसकेको छ ।

साे निर्माणाधीन आयोजना निजीक्षेत्र र स्थानीयको लगानीमा निर्माण भइरहेको बताइएको छ । यी आयोजना निर्माण सम्पन्नपश्चात् १२५ मेगावाट बिजुली उत्पादन हुनेछ । निर्माण भएका आयोजनाबाट एक वर्षदेखि पाँच वर्षभित्र विद्युत् उत्पादन गर्ने लक्ष्य छ ।

दोर्दी खोलामा हिमालयन पावर पार्टनरले निर्माण गरेको २७ मेगावाटको दोर्दी खोला र लिबर्टी इनर्जी लिमिटेडले निर्माण गरेको २५ मेगावाटको माथिल्लो दोर्दी ‘ए’ जलविद्युतकाे निर्माण अब एक वर्षभित्र पूरा हुने अवस्थामा छन् ।

यी आयोजनाको निर्माण ९० प्रतिशतभन्दा बढी निर्माण कार्य सम्पन्न भएको आयोजनाले जनाएको छ ।त्यस्तै, दोर्दी काेरिडाेरमै छ्याङ्दी खोला हाइड्रोपावर कम्पनीले सोही खोलामा ४ मेगावाटको जलविद्युत् आयोजना निर्माण गरिरहेको छ । गत एक वर्षदेखि आयोजनाको निर्माण कार्य भइरहेको छ ।

दोर्दी काेरिडाेरकै सबैभन्दा ठूलो क्षमताको पिपुल्स हाइड्रोपावरले निर्माण गरेको ५४ मेगावाटको सुपर दोर्दी ‘ख’को ५५ प्रतिशत र दोर्दी खोला जलविद्युत कम्पनीद्वारा निर्माणाधीन १२.१ मेगावाटको दोर्दी–१ को निर्माणकार्य ७० प्रतिशतभन्दा बढी सम्पन्न भएको बताइएको छ ।

दोर्दी काेरिडाेरको सबैभन्दा माथिल्लो तटमा पिपुल्स हाइड्रोपावरले सुपर दोर्दी ‘ख’ (५४ मेगावाट) आयोजना झण्डै कुल ८ अर्ब ८० करोड रुपैयाँकाे लागतमा निर्माण भइरहेको छ । सो आयोजनामा प्रभावित क्षेत्रका बासिन्दा र जिल्लावासीको मात्र २७ करोड रुपैयाँ लगानी रहेको छ ।

२७ मेगावाटको दोर्दी खोला जलविद्युत् आयोजना ३ अर्ब ८६ करोड रुपैयाँकाे लगानीमा निर्माण भइरहेको छ । यस आयोजनामा गैरआवासीय नेपाली संघ (एनआरएनए) ३६ र स्थानीय सर्वसाधारणको ३० प्रतिशत तथा आईएमई ग्रुपकाे ३४ प्रतिशत लगानी छ ।

त्यस्तै, लिबर्टी इनर्जी कम्पनीले निर्माण गरिरहेको माथिल्लो दोर्दी ‘ए’ (२५ मेगावाट) को कुल ४ अर्ब ६३ करोड रुपैयाँकाे लागतमा निर्माण थालिएको हो । दोर्दी खोलामै लमजुङ विद्युत् विकास कम्पनी (लेड्को) को सहायक कम्पनी दोर्दीखोला जलविद्युत् कम्पनीले दोर्दी–१ (१२.१ मेगावाट) आयोजना निर्माण गरिरहेको छ ।

यस आयोजना करिब २ अर्ब ३९ करोडको लागतमा निर्माण भइरहेको बताइएकाे छ । दोर्दी काेरिडाेरमै रहेको छ्याङ्दी खोलामा यसअघि २ मेगावाटको छ्याङ्दी जलविद्युत् आयोजना निर्माण सम्पन्न गरिसकेका प्रवर्द्धक छ्याङ्दी खोला हाइड्रोपावर कम्पनीले सोही खोलामा चार मेगावाटको जलविद्युत् आयोजना ८० करोड रुपैयाँभन्दा बढीकाे लगानीमा निर्माण भइरहेको आयोजनाले जनाएको छ । रासस

प्रकाशित मिति: सोमबार, माघ ६, २०७६ ११:५५