श्रीमानको साख जोगाउन बिमलाको प्रदेशसभामा ‘इन्ट्री’

A+ A A-

गत मंसिर १४ गते प्रदेशसभा सदस्यका लागि दाङ क्षेत्र नम्बर ३ (ख) मा भएको उपनिर्वाचनमा नेपाल कम्युनिस्ट पार्टी (नेकपा) की बिमलाकुमारी खत्री (वली) विजयी भइन् । २४ माघ २०७५ मा दाङको घोराही–लमही सडक खण्डमा भएको सवारी दुर्घटनामा परी श्रीमानको मृत्यु भएपछि उपनिर्वाचनमा उम्मेदवार बनेर विजयी भएकी बिमलाले प्रदेशसभामा पहिलो अनुभव गरेकी छिन् ।

आइतबार बसेको संसदको पाँचौं अधिवेशन एवं हिउँदे अधिवेशनमा कालो कोट, कालो ब्याग अनि हरियो साडीमा प्रदेशसभामा प्रवेश गरेकी वली बैठक चलुन्जेल चनाखो बनेर सुनिरहिन् । प्रदेशसभामा जनमोर्चाकी सांसद तारा जिसी, समाजदवादी फोरमका सांसद सन्तोषकुमार पाण्डेय, नेपाली कांग्रेसका सांसदहरू फकरूद्दिन खाँ, निर्मला क्षत्री, नेकपा सांसद दिपेश थारू र भूमिश्वर ढकाल रोस्ट्रममा उभिएर बोल्दा चनाखो बनेर कुराहरू चाखपूर्ण रूपले सुनिरहेकी थिइन् ।

सभामा बोल्ने सबैले उनलाई बधाई दिइरहँदा उनी भने मुस्कुराउँथिन् मात्र । पहिलो बैठकमा रोस्ट्रममा नपुगे पनि प्रदेशसभामा प्रवेश गर्दा नै नौलो अनुभूति भएको उनले सञ्चारकर्मीलाई बताइन् । उनले श्रीमानले गर्न नभ्याएका अधुरा कामहरूलाई प्रदेशसभामा आवाज उठाएको बताइन् ।

‘म अब उहाँ (श्रीमान्) को सपना पूरा गर्न सभामा उपस्थित भएकी हुँ,’ आँखामा आँसु टिलपिल पार्दै उनले भनिन् । कुराकानीका क्रममा श्रीमानको नाम लिँदा बिमला बहकिन खोज्थिन् । गत १८ मंसिरमा पद तथा गोपनीयताको शपथ खाएकी बिमलाले संसदमा सधैं जनताको पक्षमा उभिने प्रतिवद्धता व्यक्त गरिन् ।

को हुन् बिमला ?

बुबा कालीराम खत्री र आमा लालकुमारी खत्रीकी कान्छी छोरीका रूपमा २०४१ साल माघ २२ गते जन्मिएकी हुन् विमला । उनै बिमलाले उत्तरकुमार वलीसँग २०६५ साल वैशाख महिनामा प्रेम विवाह गरेकी थिइन् । उनका दुई सन्तान छन् । पुख्र्यौली माइती घर रूकुम पूर्वको रूकुमकोट भए पनि उनी नेपालगञ्ज उपमहानगरपालिका– ५, गणेशपुरमा हुर्किएकी हुन् । कालीराम र लालकुमारीका चार छोरीमध्ये बिमला कान्छी हुन् । नीडर, इमानदार र सक्रिय रूपमा काम गर्दै श्रीमान् उत्तरकुमार वलीको साख जोगाउने कसरतमा उनी छन् ।

प्रकाशित मिति: आइतबार, माघ ५, २०७६ १९:५२