अभिनेत्री अस्मिता भन्छिन्ः विपिनसँग काम गर्ने मन छ

A+ A A-

अभिनेत्री अस्मिता लामिछाने अहिले चर्चामा छिन । चर्चामा आउनुको कारण उनले फिल्म हलमा १२ सत्ताईस गरिरहेकी छिन ।

शुक्रबार प्रदर्शनमा आएको फिल्म ‘१२ सत्ताईस’मा उनी मुख्य नायिकाको भूमिकामा छिन् । उनी यसमा एक्सन अवतारमा देखिएकी छन् । फिल्ममा सह–निर्देशकको भूमिकामा काम गर्दै आएकी उनको यो फिल्ममा पहिलो अभिनय भने होइन ।

उनले योभन्दा पहिला ‘गुलेली’ मा अभिनय गरिसकेकी छन् । तर फिल्म अझै प्रदर्शनमा आएको छैन । हलमा रिलिज भएको पहिलो डेब्यू फिल्म ‘१२ सत्ताईस’ हो । पहिलो पटक आफ्नो फिल्म हलमा हेरिसकेपछि उनको प्रतिक्रिया भने यस्तो छ ।

अभिनय कताकता मिलेन

एकदम रमाइलो भयो, कति कुराहरूमा चाहिँ यो नगरेको भइदिएको भए हुने थियो भन्ने कुराको फिल हुँदो रहेछ । हलमा एक सय प्रतिशत गरेको जस्तो त कहिले पनि फिल नहुने रहेछ । मेरो अभिनय कहाँ कतै के मिलेनजस्तो अनुभव भयो । आफैंले आफैंलाई देख्दा चाहिँ गर्व महसुस भयो ।

म हिरोइनजस्तो भन्दा पनि राम्रो अभिनेत्री चाहिँ भएछुजस्तो लाग्यो । आफैंले आफैंलाई कहिल्यै पनि पूर्ण भएको भन्न मिल्दैन । केही आफ्ना कमजोरी अवश्य देखें । अब अर्को पटक काम गर्दा यी कुरा सुधार्नुपर्छ भन्ने चाहिँ भएको छ ।

दर्शकले मलाई फुर्क्याउनुभयो

जतिले चलचित्र हेर्नुभयो, सबैले तिमीले बबाल गर्‍यौ । तिम्रो भविष्य एकदमै उज्ज्वल छ भनेर भन्नुभएको छ । मलाई के लाग्छ भने यसले मेरो करिअरमा एउटा इँटा भने अवश्य थपेको छ ।

मेरो परिवारलाई विशेष गरेर बुबाआमालाई फिल्म हेर्न भनेको छु । अब उहाँहरूले कस्तो प्रतिक्रिया दिनुहुन्छ, त्यसले मेरो काममा थप हौसला आऊला ।

मैले अर्काे फिल्ममा पनि अभिनय गरेकी छु । त्यसको काम अझै सकिन बाँकी छ । अब नेपाली फिल्म अगाडि कसरी बढाउने होला, फिल्म क्षेत्रलाई कसरी सहयोग गर्न सकिएला भन्ने लाग्न थालेको छ ।

विपिनसँग काम गर्न मन छ

फिल्म क्षेत्रमा केही जिम्मेवारी थपिएको जस्तो महसुस गरेकी छु । म बरु वर्षमा एउटा मात्र सिनेमा गर्छु तर राम्रो गर्छु भन्ने सोचमा छु । हेरौं, दर्शकले कति साथ दिनुहुन्छ । मलाई एक्सन भूमिका गर्न पाए हुन्थ्योजस्तो लाग्थ्यो । यो फिल्ममा म त्यही भूमिकामा बढी जमेजस्तो लागेको छ । अब विपिन कार्कीसँग काम गर्ने मन छ ।

प्रकाशित मिति: आइतबार, माघ ५, २०७६ १७:५२