डोटीमा एक सातामा ८८ वटा छाउगोठ भत्काइए

A+ A A-

डोटीमा पुस २६ गते देखि सुरु भएको छाउपडी गोठ भत्काउने अभियानले तीव्रता पाएको छ । शनिबारसम्ममा जिल्लामा ८८ वटा छाउगोठ भत्काइएको जिल्ला प्रहरी कार्यालय डोटीले जनाएको छ ।

बडीकेदार गाउँपालिकाको–३, सिन्दुरेपानीबाट सुरु भएको अभियानले सोही गाउँपालिकाका विभिन्न वडामा रहेका ७१ वटा गोठ भत्काइएका छन् । त्यसैगरी जिल्लाका अन्य स्थानीय तह जोरायल गाउँपालिकामा तीनवटा र पुर्विचौकी गाउँपालिकामा १४ वटा छाउगोठ भत्काइएको जिल्ला डोटीका प्रहरी नायव उपरीक्षक दिलीपसिंह देउवाले जानकारी दिए ।

गृह मन्त्रालयले ९ मा प्रमुख जिल्ला अधिकारीलाई छाउपडी नियन्त्रण गर्न निर्देशन पत्र पठाएसँगै गोठ भत्काउन प्रहरी टोली पनि परिचालन गरिएको थियो । डोटीमा जति गोठ भत्काइए ती सबै प्रहरी प्रशासनले जबर्जस्ती रूपमा नभई स्थानीय सरकारसँग समन्वय गरी स्थानीयवासीको सहभागिता, सहयोग र रोहबरमा भत्काइएको प्रहरी नायव उपरीक्षक देउवाले बताए ।

गोठ भत्काउने अभियानमा स्थानीय बासिन्दा, जनप्रतिनिधि, प्रहरी प्रशासन, महिला सञ्जालको सहभागिता रहेको छ । जिल्लामा रहेका छाउगोठ भत्काउने अभियान सफल पार्न स्थानीय तहसँग समन्वय सहकार्य गर्नुका साथै आवश्यक मात्रामा सुरक्षाकर्मी पनि परिचालन गरिएको डोटीका प्रमुख जिल्ला अधिकारी टेकनारायण पौडेलले बताए ।

‘छाउगोठ कहाँ कति छन् भनेर सूचना लिएर भत्काउन स्थानीयको रोहबरमा प्रहरी खटाएका छौं । जिल्लामा तीव्र रूपमा सञ्चालन भइरहेको गोठ भत्काउने अभियानलाई सबैले सहयोग गर्नुपर्छ,’ उनले भने, ‘अब छाउगोठ बनाउन पाइन्न । डोटीलाई छाउपडी गोठमुक्त जिल्ला घोषणा गर्ने गरी गोठ भत्काउने अभियानलाई तीव्र पारिएको छ ।’

मुलुकी अपराध संहिता २०७४ को दफा १६८ को उपदफा ३ अनुसार महिलाहरू रजस्वला भएको अवस्थामा छाउपडीमा राख्न वा राख्न बाध्य पार्नेलाई तीन महिना कैद र ३ हजार रुपैयाँ जरिमानाको व्यवस्था छ ।

प्रकाशित मिति: आइतबार, माघ ५, २०७६ ११:३९