कसरी आयाे सभामुखमा जनार्दन र हरिबोलको नाम ?

A+ A A-

सत्तारुढ दल नेपाल कम्युनिस्ट पार्टी (नेकपा) ले अहिलेसम्म सभामुख चयन गर्न सकेको छैन । १४ असोजमा तत्कालीन सभामुख कृष्णबहादुर महराले राजीनामा दिएपछि उक्त पद रिक्त छ ।

सभामुख चयनको विषयलाई लिएर नेकपाका दुई अध्यक्षबीच दूरी बढेको आशंका पनि गरिएको थियो । हुन पनि दुई अध्यक्षबीच आइतबारबाट एकैपटक बिहीबार मात्रै भेटवार्ता भएको छ ।

प्रधानमन्त्रीसमेत रहेका पार्टी अध्यक्ष केपी शर्मा ओली र कार्यकारी अध्यक्ष पुष्पकमल दाहाल ‘प्रचण्ड’बीचको भेटवार्तामा सभामुख उम्मेदवारबारे छलफल भएको बताइएको छ । छलफल सकारात्मक रहेको प्रचण्डको सचिवालयले बताएको छ ।

आज शुक्रबार प्रधानमन्त्रीे निवास बालुवाटारमा दुई अध्यक्षबीच भएको छलफलपश्चात् भने सभामुख उम्मेदवार चयन प्रक्रियामा ‘नयाँ ट्वीस्ट’ देखिएको छ । अर्थात्, एकाएक यसअघि सभामुखमा चर्चा नभएका व्यक्तिलाई अघि सार्ने सहमति भएको बुझिएको छ ।

पूर्वमाओवादीका तर्फबाट जनार्दन शर्मा र हरिबोल गजुरेलमध्ये एक जनालाई सभामुख बनाउने विषयमा दुई अध्यक्षबीच सहमति भएको प्रचण्डनिकट स्रोतले दाबी गरेको छ ।

चर्चामा धेरै आए

एकताभन्दा पहिला तत्कालीन नेकपा माओवादी केन्द्रको भागमा सभामुख परेको थियो । माओवादीका तर्फबाट कृष्णबहादुर महरा सभामुख भएका थिए । तत्कालीन सभामुख महरा यौन दुर्व्यवहारको आरोपमा पुर्पक्षका लागि थुनामा छन् ।

रिक्त सभामुख पदमा सुरुमा तत्कालीन एमालेका तर्फबाट संविधानसभाका अध्यक्ष भइसकेका सुवासचन्द्र नेम्वाङको नाम आएको थियो । केही हप्तापछि त्यसमा थपिए तत्कालीन माओवादी केन्द्रका तर्फबाट अग्नि सापकोटा । अध्यक्ष तथा प्रधानमन्त्री ओलीले आफ्ना विश्वास पात्र नेम्वाङलाई सभामुख बनाउन चाहेका थिए । तर, अर्का अध्यक्ष प्रचण्डले सापकोटालाई अघि बढाए ।

नेम्वाङ र सापकोटाबीच कसलाई सभामुख बनाउने भन्ने विषयमा कुरा मिल्न सकेन । अर्कोतिर उपसभामुख डा. शिवमाया तुम्बाहाम्फेले पनि सभामुखमा दाबी गरिरहेकी छन् ।

नयाँ समीकरणबाट उपसभामुख तुम्बाहाम्फे र नेम्वाङ बाहिरिएका छन् । त्यसको साथै तत्कालीन माओवादीको तर्फबाट चर्चामा आएका सभामुखका दाबेदार मानिएका देव गुरुङ सुरुमै बाहिरिएका हुन् । त्यसपछि अग्नि सापकोटाको चर्चा सुरु भयो । सापकोटामा पनि सहमति हुन नसकेपछि उनको ठाउँमा पम्फा भुसालको चर्चा भयो ।

डा. तुम्बाहाम्फेको ठाउँमा भुसाल अगाडि सार्दा महिलाको स्थानमा महिला हुने र आफ्नो भागमा परेको सभामुखको कोटा गुमाउनु नपर्ने गरी प्रचण्डले प्रस्ताव गरेका थिए । तर, त्यो प्रस्तावमा पनि सहमति हुन सकेन ।

शुक्रबारबाट दुई नयाँ नाम चर्चामा आएका छन् । अध्यक्षद्वयबीच बिहीबार बिहान बालुवाटारमा भएको छलफलमा शर्मा र गजुरेलमध्ये एकलाई सभामुख बनाउने सहमति भएको बताइएको छ । सभामुख उम्मेदवार चयनमा देखिएको रस्साकस्सीलाई टुंग्याउन मध्यमार्गी बाटो अपनाउने सहमति भएको नेता देवेन्द्र पौडेलले जानकारी दिए । उनले भने, ‘बिहीबार दुई अध्यक्षबीच छलफल हुँदा मध्यमार्गी बाटो अपनाउने सहमतिमा पुग्नुभएको थाहा पाएको थिएँ । त्यही भएर नयाँ साथीहरूको चर्चा भएको होला ।’

भागवण्डामै सभामुख

पार्टी एकता भएको ढेड वर्ष बितिसक्दा पनि नेकपामा योग्य व्यक्तिभन्दा पनि तत्कालीन एमाले र माओवादीको भागवण्डा गर्ने प्रवृत्ति कायमै छ । जबसम्म एकताको सम्पूर्ण काम संगठित सदस्यसम्म पुग्दैन, त्यति बेलासम्म तत्कालीन एमाले र माओवादी केन्द्रको कुरा पनि रहिरहने बताउँछन् नेकपाका केन्द्रीय सदस्य आनन्दप्रसाद पोखरेल । उनी भन्छन्, ‘फरक पार्टी र फरक स्कुलबाट आएर एकता भएको हो । घूलमिल हुने क्रम जारी छ । त्यसकारण केही समय तत्कालीन एमाले र माओवादी केन्द्र भन्ने कुरा रहन्छ नै, जुन स्वाभाविक पनि हो ।’

प्रकाशित मिति: शुक्रबार, माघ ३, २०७६ १६:४३