छोरी शिक्षा बीमा गर्न दैलोमै पुग्यो प्रदेश सरकार

A+ A A-

प्रदेश २ का हरेक छोरीको बैंक खाता खोलिएको छ । प्रदेश सरकारले गत आर्थिक वर्षदेखि ‘बेटी पढाऔं, बेटी बचाऔं’ अभियानअन्तर्गत छोरी शिक्षा बीमा कार्यक्रम सुरु गरे पनि प्रभावकारी नभएपछि प्रदेश सरकार आफैं दैलोमा बीमा गर्न पुगेको छ ।

एक वर्षको अवधिमा भनेअनुसारको बीमा कार्यक्रममा बालिकाहरू आवद्ध हुन नसकेपछि प्रदेश सरकारले सम्बन्धित जिल्ला र स्थानीय तहमा पुगेर बीमा गर्न लागेको हो । बिहीबारदेखि कतै प्रदेश सरकारका मन्त्री त कतै प्रतिनिधि पठाएर सप्ताव्यापी छोरी शिक्षा बीमा कार्यक्रमको शिविर नै आयोजना गरेकाे छ ।

प्रदेशका आठै जिल्लाका सबै तहबाट बीमा शिविर सुरु गरिएको छ । बालिकालाई बोझका रूपमा मानिँदै आएको तराईको सोच बदल्न सरकारले छोरी शिक्षा बीमा कार्यक्रम सुरु गरेको प्रदेश सरकारका मुख्यमन्त्री लालबाबु राउतले बताए ।

‘हामीकहाँ छोरीलाई बोझका रुपमा लिइन्छ । तर छोरी नै संसारको अस्तित्व हुन् । सरकारले नै छोरीको रक्षा गर्छ,’ उनले भने, ‘छोरीप्रति समाजले गर्ने व्यवहार परिवर्तन र उनीहरूको समृद्धिका लागि प्रदेश सरकारले बीमा कार्यक्रम सुरु गरेको हो । यसले उनीहरूको उच्च शिक्षामा पहुँच स्थापित गर्नेछ ।’

एक वर्षको अवधिमा १० हजार बालिकाको मात्रै बीमा भएको थियो । अपेक्षाअनुसार बीमा कार्यक्रममा छोरीहरू आवद्ध नभएपछि अभियान लिएरै घरदैलोमै शिविर आयोजना गरिएको मुख्यमन्त्री राउतले बताए । प्रदेश सरकारले बैंकसँग सम्झौता गरि सुरुमा १३ हजार रुपैयाँ जम्मा गरेको छ । छोरीको नाममा खाता खोलेर उक्त खातामा सरकारका तर्फबाट रकम जम्मा गरिनेछ ।

उक्त रकम बालिका २० वर्ष पुगेपछि उनको इच्छाअनुसार नै निकाल्न पाउनेछिन् । यद्दपि २० वर्ष नपुग्दै बिहे गरेको खण्डमा यो रकम नपाइने प्रदेश सरकारले जनाएको छ । २० वर्षपछि प्रदेश सरकारका तर्फबाट जम्मा भएको बीमांकबापत १ लाख र बैंककाे तर्फबाट २५ हजार थप गरी कुल १ लाख २५ हजार रुपैयाँ प्राप्त गर्नेछन् ।

प्रकाशित मिति: शुक्रबार, माघ ३, २०७६ ०९:२६