डोटीका हिमाली भेगमा वन्यजन्तुको चोरी शिकार बढ्दो

A+ A A-

जिल्लाका उच्च भेगमा हिमपात सुरु भएपछि वन्यजन्तुको चोरी शिकारी बढेको छ । जिल्लाका जोरायल, मन्नकापडी, नापानी, देउताल, मुस्ताल, गनगडेउडार, अनारखोला, मुथे, चौकुने, बोगटान, अल्लेवन तथा खप्तड क्षेत्रनजिकका जंगलमा वन्यजन्तुको चोरी शिकारी बढेको छ ।

उच्च लेकारी भेगमा दिनहुँ चाेरी शिकार भइरहेको स्थानीयवासी डम्मर मौनीले बताए । वन्यजन्तुको शिकार गर्नेहरू बन्दुक, भाला, खुकुरी लिएर दिनहुँ जंगल जान थालेकाे उनले जानकारी दिए । जिल्लाका लेकाली भेगमा बाक्लो हिमपात सुरु भएसँगै वन्यजन्तु बस्ती तथा झाडीतिर आउने भएकाले शिकारी शिकार खेल्न जाने गरेका हुन् ।

शिकारीले कालिज, बँदेल, मृग, घोरल, जरायो, रतुवालगायतका वन्यजन्तुको शिकार गरी सुकुटी बनाएर स्थानीय बजारमा बिक्री गर्ने गरेका छन् । शिकार खेल्न स्थानीय आफ्नो छुट्टै समूह बनाई एक/दुई हप्तासम्म जंगलमै बस्ने गरेकाे जोरायल गाउँपालिका–५ का नीरज विष्टले बताए ।

हिमपात भएको समयमा वन्यजन्तुको शिकार गर्न सजिलो हुने भएकाले उनीहरू अहिले हिमपातको मौका छोपी जंगल जान थालेकाे स्थानीयवासीको भनाइ छ ।

यस्तै, कतिपय शिकारीले कुकुरसमेत प्रयोग गरेर मृगको शिकारसमेत गर्ने गरेका छन् । शिकारीले मारेका वन्यजन्तुको मासु तथा सुकुटी प्रमुख व्यापारिक केन्द्र दिपायल, राजपुर, पिपल्ला, गैरालगायतका ठाउँमा खुलेआम रूपमा बिक्री वितरण हुने गरेको छ ।

खुलेआम रूपमा वन्यजन्तुको चोरी शिकारी हुँदासमेत सम्बन्धित निकायले त्यसको रोकथाम गर्न नसकेको स्थानीयवासीको आरोप छ ।

जिल्ला प्रहरी कार्यालयका प्रहरी प्रमुख तथा प्रहरी उपरीक्षक दिलीपसिंह देउवाले वन्यजन्तुको चोरी शिकार गर्नेलाई पक्राउ गरी कारबाही गरिने बताए ।

जिल्लाका उच्च भेगमा पर्ने तेलेलेक, देउताल र खप्तड राष्ट्रिय निकुञ्जमा हिमपात भएपछि वन्यजन्तु नापानी, मुथे, धनाडी, बगर, गोलादेउ, उदैनी, ढोलेपानी तथा दिपायल सिलगढीका विभिन्न जंगलमा आउने गर्छन् ।

राष्ट्रिय निकुञ्ज तथा वन्यजन्तु संरक्षण ऐन २०२९ अनुसार संरक्षित पक्षी तथा वन्यजन्तुको शिकार गर्नेलाई पाँच वर्षदेखि १५ वर्षसम्म कैद र नगद ५० हजार रुपैयाँदेखि १ लाख रुपैयाँसम्म जरिमाना हुन सक्ने कानुनी प्रावधान छ । रासस

प्रकाशित मिति: बिहीबार, माघ २, २०७६ १५:१८