रिडिमा धार्मिक मेलासँगै नौदिने दोस्रो रिडी महोत्सव सुरु

A+ A A-

पाल्पा, गुल्मी र स्याङ्जा जिल्लाको संगमस्थल रिडीमा आज माघे संक्रान्ति मेला लाग्यो । सो धार्मिक मेलाको अवसरमा कालीगण्डकीको रुरुधाम क्षेत्रमा स्नान गर्न र ऋषिकेश देवताको दर्शनका लागि भक्तजनहरूको भीडभाड बढेको छ ।

बराह पुराणका अनुसार कालीगण्डकीको तिरमा तपस्या गरेर बसिरहेका महर्षि देवदत्त ऋषिको तपस्या भंग गर्नका लागि स्वर्गबाट देवराज ईन्द्रले अति राम्री अप्सरा प्रम्लोचना पठाई ऋषिको तपस्या भंग गराएको कथन छ । ऋषि र अप्सराको मिलनपछि एउटी मानवी कन्याको जन्म भएको र उनको जन्म भएपछि ऋषि र प्रम्लोचनाको मृत्यु भएको किंवदन्ती छ । आमा बुबा दुवै मृत्य भएपछि ती कन्यालाई रुरु मृगले दूध खुवाएर बचाएकाले उनलाई रुरु कन्या नाम राखिएको र उनै बालिकाको तपस्याबाट त्यस क्षेत्रको नाम रुरु क्षेत्र रहन गएको किवंदती छ ।

माघे संक्रान्तिको अवसरमा कालीगण्डकीमा स्नान गर्नाले सम्पूर्ण पाप नाश हुने जनविश्वास छ । रुरुक्षेत्रमा परापूर्वकालदेखि नै जेठी, माइली र कान्छी संक्रान्तिको रूपमा धार्मिक मेला लाग्दै आएको छ । धार्मिक मेलामा नेपालका विभिन्न जिल्लालगायत भारतको उत्तर प्रदेशदेखि महाराष्ट्रसम्मका हिन्दु धर्मावलम्बीहरू कालीगण्डकीको स्नान र ऋषिकेश भगवानको दर्शन गर्न आउने गरेका छन् ।

यो धार्मिक मेलासँगै अर्को नौदिने दोस्रो रिडी महोत्सव पनि आजैदेखि सुरु भएको छ । महोत्सवमा राष्ट्रिय कलाकारदेखि स्थानीय कलाकारहरूका विभिन्न प्रस्तुति रहने आयोजकले बताएका छन् ।

मेलामा नेपालका रुकुम, रोल्पा, डोल्पा, मनाङ, मुस्ताङबाट ल्याइएका काम्लो, कम्मल, राडी, पाखी, बा“सबाट उत्पादित डाला, पाथी, काइँयोलगायतका घरेलु सरसमान बिक्रीका लागि राखिएको छ । मेलामा होटल व्यबसायदेखि स्थानीय कृषि उत्पादनसमेत बिक्रीवितरणका लागि रिडी बगरमा स्टलहरू राखिएका छन् । मेलामा गुल्मीको गुण, पाल्पाको सुन्तला, काजुलगायतका समानहरू बिक्रीका लागि राखिएका छन् ।

मेलामा नेपाली सेनाको गोरखदल गणले मेलामा आउने भक्तजन र अवलोकनकर्ताहरूलाई स्वास्थ्य सेवा दिने उद्देश्यले एकदिने निःशुल्क स्वास्थ्य शिविर सञ्चालन गरेको छ । उक्त गणले बिरामीको निःशुल्क चेकजाँचका साथै औषधिसमेत निःशुल्क प्रदान गरेको छ ।